2 VHAKORINTA 10

₁Nṋe Paulo ndi ni humbela nga zwanḓa zwivhili – nṋe ane musi ri roṱhe nda pfi ndo vuḓa, ndi ngeno kule nda pfi ndi na vhuhali – ndi ni humbela nga Khristo, Ene o vuḓaho, wa vhulenda, ndi ri: ₂Ni songo nkombetshedza u ni ḽela vhuhali musi ndi tshi ḓa ngeo. Ndi na ngoho ya uri vhaḽa vhane vha ri sola vha ri ri tshila nga u tevhela zwa shango ḽino, a thi nga ofhi u vha ḽela vhuhali. ₃Naho ri tshi tshila fhano shangoni, nndwa ine ra vha khayo a ri i lwi nga zwihali zwa shango. ₄Zwihali zwine ra lwa ngazwo a si zwa vhathu, hone nga maanḓa a Mudzimu zwi kona u thutha mitsheṱo yo khwaṱhaho. Zwi thuthekanya vhunwa vhu lukwaho nga vhathu, ₅zwa ritha milavhu yoṱhe ye vha u ḓihudza vha rea nḓilani ya nḓivho ya zwa Mudzimu, ra thuba mihumbulo yoṱhe ya luvha Khristo. ₆Nahone zwenezwo inwi nó no vha vha pfaho tshoṱhe, ndi hone ri tshi ḓo laṱisa vha sa pfi.

₇Ni sedzese! Arali hu na muṅwe henefho ane a fulufhela uri ene ndi wa Khristo, onoyo nga a ḓivhe uri na riṋe ri vha Khristo unga ene. ₈Nangwe ndi tshi zuwa maanḓa e Muṋe washu a ri ṋea nda pfukanyana ndinganyo, a thi shoni; tenda e maanḓa a u ni fhaṱa, a si a u ni wisa. ₉Ndi zwine nda ri ndi songo nga ndi khou ni shushedza nga maṅwalo haya anga. ₁₀Ndi tshi ralo ndi uri hu pfi, “Maṅwalo one a na tshileme na maanḓa, hone a tshi vho swika nga tsha vhukoma ri vhona a si na tshileme, na kuambele kwawe ku tshi nyadzea.” ₁₁Onoyo ane a ralo nga a ḓivhe uri zwenezwo zwine ra amba ri tshi tou ṅwala maṅwalo rí kule, zwi kha ḓi vha zwenezwiḽa zwine ra ḓo ita ri na inwi henengeo.

₁₂Riṋe ri nga si vhuye ra edzisa u ḓifanyisa kana u ḓivhambedza zwashu na havho vhane vha ḓinakisa zwingafho. Vha ita zwa vhutsilu, ngauri muelo une vha ḓipima ngawo ndi we vha tou ḓivhetshela, vha ḓivhambedza na vhone vhaṋe. ₁₃Riṋe hone a ri nga ḓizuwi ra pfuka ndinganyo, ri ḓo guma nga mikano ye Mudzimu a ri vhetshela. Yone i katela na zwe ra shuma kha inwi. ₁₄Ri tshi vhuya ra swika na kha inwi a ro ngo pfuka mikano yashu; hufha ro vha ro no ni ḓisela mafhungo maḓifha a Khristo. ₁₅Zwi amba uri ri tshi ni zuwa a ri pfuki ndinganyo ngauri a ri khou ḓizuwa nga mishumo ya vhaṅwe. Ro lavhelela uri lutendo lwaṋu lu engedzee, uri ni ri vhone ro shuma zwihulu zwi fhiraho zwiḽa, na henefho ri sa pfuki mikano yashu. ₁₆Ndi hone-ha ri tshi ḓo ḓivhadza mafhungo maḓifha ra fhirela phanḓa, ra si tou guma nga inwi fhedzi, hone ri sa zuwi zwe ra wana muṅwe o no shuma muvhunduni wonoyo.

₁₇Hone Maṅwalo a ri, “Ane a zuwa nga a zuwe vhuvhuya ha Muṋe washu.” ₁₈Ane a wanala e ngohoni a si uyo ane a ḓikhoḓa, ndi a khoḓwaho nga Mudzimu.