2 MAHOSI 14

₁Nga ṅwaha wa vhuvhili wa muvhuso wa Juasi ṅwana wa Juahasi khosi ya Israele, Amasia ṅwana wa Juasi a vha khosi ya Juda. ₂Amasia a tshi vha khosi o vha e na miṅwaha ya 25, a vhusa e Jerusalema a fhedza miṅwaha ya 29. Mme awe vho vha vha tshi pfi Jehoadana, wa Jerusalema. ₃Amasia o ita zwi takadzaho Muṋe washu, naho a songo swika kha makhulukuku wawe Dafita. O kanda vhuṱalani ha khotsi awe Juasi kha zwoṱhe. ₄Naho zwo ralo ho ngo thutha zwitembele zwa zwikwarani; vhathu vho ḓi ṋekedza zwiṱhavhelo vha fhisa zwioro henengei.

₅Musi muvhuso wa Amasia u tshi tou thoma u khwaṱha, a vhulaha magota vho vhulahaho vhamusanda khotsi awe. ₆Naho zwo ralo a si vhulahe vhana vha vhatuka vha idzo phondi, a tshi tevhedza zwo ṅwalwaho buguni ya mulayo wa Mushe he Muṋe washu a laya a ri, “Vhokhotsi vha songo fela milandu ya vhana vhavho, na vhana vha songo fela milandu ya vhokhotsi avho, muṅwe na muṅwe u ḓo fela vhutshinyi hawe.”

₇Amasia ndi ene we a kunda Vhaedomo vha 10 000 Govhani ḽa Muṋo, a thuba muḓi wa Sela nndwani, a ri u pfi Jokothiele, na ṋamusi u kha ḓi vhidzwa nga dzina ḽeneḽo.

₈Ndi hone Amasia a tshi ruma vhaḓinḓa ha Juasi ṅwana wa Juahasi, ṅwana wa Jehu khosi ya Israele, vha isa khaedu a ri, “Nga vha ḓe ri lwe.”

₉Hone Juasi khosi ya Israele a fhindula Amasia khosi ya Juda a ri, “Mutshutshungu wa Libanoni wo vhuya wa ruma muḓinḓa a ya ha mukedara wa Libanoni a ri, ‘Litsha ṅwananyana wau a vhingwe nga ṅwananga.’ Hu si kale ha fhira phukha dza Libanoni dza kandekanya uyo mutshutshungu. ₁₀Vha khou vhona vho kunda Vhaedomo, zwino vha vho ḓihudza. Nga vha ḓitakalele nge vha kunda, vha ḓidzulele zwavho hayani! Ndi mini vha tshi levha? A vha zwi vhoni uri vha khou ḓiṱulela khombo, vha dovha vha ṱulela shango ḽa Juda khombo?”

₁₁Hone Amasia a si zwi thetshelese. Ndi hone Juasi khosi ya Israele a tshi bva pfumo a yo lwa na Amasia khosi ya Juda, ha lwiwa Bethe Shemeshe kha ḽa Juda. ₁₂Vhajuda vha kundwa nga Vhaisraele, muṅwe na muṅwe a shavhela hayani hawe. ₁₃Juasi khosi ya Israele a thuba Amasia khosi ya Juda, ṅwana wa Juasi ṅwana wa Ahasia, henefho Bethe Shemeshe. Ndi hone Juasi a tshi ya Jerusalema a pwasha mutsheṱo wa Jerusalema u bva Khoroni ya Efraimi u swika Khoroni ya Khuḓa, tshikhala tshine tsha nga ita mitha dza 200. ₁₄Juasi a dzhia musuku woṱhe na siliva yoṱhe na thundu yoṱhe ye ya vha i thembeleni ya Muṋe washu na mbulungeloni dza pfamo ya musanda, a ita na u thuba pfarela, a vhuelela Samaria.

₁₅Mafhungo maṅwe a Juasi, na zwe a ita, na vhuhali hawe nndwani a tshi lwa na Amasia khosi ya Juda, o ṅwalwa buguni ya Histori ya Mahosi a Israele. ₁₆Juasi a dzama, a swiṱwa Samaria na mahosi a Israele, ṅwana wawe Jerobiamu a vha khosi vhudzuloni hawe.

₁₇Amasia khosi ya Juda, ṅwana wa Juasi, o tshila a fhedza miṅwaha ya 15 musi Juasi khosi ya Israele, ṅwana wa Juahasi ó no dzama. ₁₈Mafhungo maṅwe a Amasia o ṅwalwa buguni ya Histori ya Mahosi a Juda.

₁₉Vha langana Amasia Jerusalema, ene a shavhela muḓini wa Lakhishi, hone vha ruma vhathu vha mu tevhela Lakhishi vha mu vhulahela henengei. ₂₀Tshitumbu tsha Amasia tsha iswa Jerusalema tsho hwalwa nga bere, a swiṱwa zwaloni zwa musanda Muḓini wa Dafita. ₂₁Ndi hone vhathu vhoṱhe vha Juda vha tshi dzhia ṅwana wawe Azaria vha mu vhumba khosi vhudzuloni ha khotsi awe Amasia. O vha e na miṅwaha ya 16 a tshi vha khosi. ₂₂Azaria ndi ene we a vusa muḓi wa Elathi, a u vhuedzedza Juda musi Amasia o no dzama.

₂₃Nga ṅwaha wa 15 wa muvhuso wa Amasia ṅwana wa Juasi khosi ya Juda, Jerobiamu ṅwana wa Juasi a vha khosi ya Israele, a vhusa e Samaria a fhedza miṅwaha ya 41. ₂₄Jerobiamu a ita zwi sa takadzi Muṋe washu, a si vhuye a laṱa vhuvhi na vhuthihi ha Jerobiamu ṅwana wa Nebati we a ita uri Vhaisraele vha tshinye. ₂₅Ndi ene we a vhuedzedza masakha a Israele u bva Pharani ya Hamathi thungo ya devhula u swika Lwanzheni lwa Muṋo thungo ya tshipembe, zwi tshi tevhedza zwe zwa ambiwa nga Muṋe washu Mudzimu wa Israele, nga mulomo wa muḓinḓa wawe muporofita Jonasi ṅwana wa Amithai wa Gathi Hefere.

₂₆Muṋe washu o vha o vhona u tambula hu ṱungufhadzaho ha Vhaisraele vhoṱhe, vhahulwane na vhaṱuku. Ho vha hu si na ane a nga vha lamulela. ₂₇Muṋe washu o vha a songo ḓiimisela u lozwa Vhaisraele tshoṱhe fhano fhasi, ndi zwe a vha tshidza nga Jerobiamu ṅwana wa Juasi.

₂₈Mafhungo maṅwe a Jerobiamu na zwoṱhe zwe a ita na vhuhali hawe nndwani na zwe a vhuedzedza Damasko na Hamathi kha ḽa Israele (miḓi iyo yo vha i ya Jaudi), o ṅwalwa buguni ya Histori ya Mahosi a Israele. ₂₉Jerobiamu a dzama, a yo swiṱwa zwaloni zwa musanda. Ṅwana wawe Zakaria a vha khosi vhudzuloni hawe.