2 VHAMAKHABI 12

₁Musi ho no itwa pfano iyo, Lisiasi a vhuelela ha khosi, Majuda vha ḓiitela zwa vhulimi. ₂Hone vhavhusi vhaṅwe vhapo, Timoti, na Apholoniosi murwa wa Genaiosi, khathihi na Heronimosi na Demofoni, na Nikanoro mulangammbi wa vhahali vho rendelwaho Kipirosi, vha si vha litshe vha tshi tshila nga mulalo.

₃Vhathu vhaṅwe vha Jopa ndi vhone vhe vha ita vhuvhi ha tshiṱuhu vhukuma. Vho vhidza Majuda vhe vha vha vha tshi dzula navho, khathihi na vhafumakadzi vhavho na vhana, uri vha namele zwikepe zwe vha ḓa nazwo. Vho vha vho dzumba vhunwa havho. ₄Majuda vho vha vha sa humbuleli vhufhura, ngauri vho vha vhe vhathu vha no funa mulalo, nahone zwo vha zwo vhoxwa nga muḓi woṱhe, ndi zwe vha tshi vhidzwa vha mbo ḓi tenda. Hone vha tshi vho swika vhukati ha lwanzhe, vha vha mbwandamedza vhoṱhe maḓini, ha lovha vhane vha swika maḓana mavhili (200) vho nwela khothe.

₅Zwenezwo Judasi a tshi tou pfa zwa tshiṱuhu tsho itwaho vha hawe, a ramba mmbi yawe. ₆Vha rabela Mudzimu, Ene Muhaṱuli a sa khakhi, a bva a yo lwa na vhavhulahi vha Majuda ngae. Vha vha wela vhusiku vha funga vhuimazwikepe nga mulilo, vha fhisa zwikepe, vho shavhelaho henefho vha vha vhulaha nga banga. ₇Khoro dza muḓi dzo vha dzo valwa, ndi zwe a thoma u huma a tshi humbula u vhuya ngavhuya uri a vhulahe vhathu vhoṱhe vha Jopa. ₈Hone a pfa upfi vhanna vha Jamunia vha khou luka-vho vhunwa ha u ita Majuda vha no dzula navho tshiṱuhu tsho raloho, ₉a mbo ḓi vha tshoṱhela vhusiku, a fhisa vhuimazwikepe na zwikepe, khavhu ya mulilo ya vhonala muthu e Jerusalema, hune ha vha vhukule ha khilomitha dza mahumi maṱanu (50).

₁₀Majuda vha takuwa uri vha yo dia Timoti, hone vha sa athu tshimbila lwendo lu no swika khilomitha mbili, vha welwa nga mmbi ya Maarabu vhane tshivhalo tshavho tsha nga swika zwigidi zwiṱanu (5 000) vha tshimbilaho nga ṋayo na vha namelaho dzibere vha maḓana maṱanu (500). ₁₁Ha lwiwa nndwa tswuku, hone Mudzimu a farisa vhahali vha Judasi vha kunda. Vhatendeleki avho vho kundwaho vha luvhelela Judasi uri vha vhe dzikhonani, vha mu fulufhedzisa uri vha ḓo mu ṋea maṱambi avho na u mu farisa nga nḓila dziṅwe nnzhi. ₁₂Judasi a vhona uri vhukuma vha nga mu farisa nga nḓila nnzhi, a tenda u pfumedzana navho, vha vhofha ḽa vhukonani, vha anelana miano, Maarabu vha ṱuwa vha humela denndeni dzavho.

₁₃Judasi a ita na u dia muḓi muṅwe u no pfi Khasipini, wo fhaṱeledzwaho nga matombo na thulwi dza mavu, he ha vha hu tshi dzula vhannḓa vho vanganaho. ₁₄Vhathu avho naho vho govhelwa, vha fulufhela u khwaṱha ha mitsheṱo yavho na zwisiku zwavho zwo ḓalaho zwiḽiwa vha nyadza Judasi na vhahali vhawe, vha tshi vha sathula vha ita na u vha nyefula na u vha sema nga maṱamba a nengisaho. ₁₅Hone Judasi na vhahali vhawe vha rabela Khosi khulwane ya shango, we misi ya Joshua a thutha mitsheṱo ya Jerikho Vhaisraele vha si na thanda dza u i thutha kana mitshini ya u govhela muḓi. Zwenezwo vha mbo ḓi namela thulwi idzo dza mavu vho sinyuwa. ₁₆Vha thuba muḓi uyo nga u funa ha Mudzimu, vha vhulaha vhathu avho lu sa ṱalutshedzei, lwe muhuvhi u re henefho tsini wa vhonala u tshi nga wo ḓala nga malofha wa ita na u fhalala. Muhuvhi uyo u aṱama wo vha u tshi ita mitha dza maḓana maṋa (400).

₁₇U bva henefho vha tshimbila lwendo lune lwa nga swika khilomitha dza ḓana na mahumi maṱanu (150), vha swika mulamboni wa Kharakhasi, he ha vha hu tshi dzula Majuda vhane vha pfi Vhathubia. ₁₈Hone Timoti vha si mu wane shangoni iḽo, nge a vha o no ṱuwa fhethu afho á songo vhuya a kona tshithu arali hu si u sia mmbi yo khwaṱhaho vhukuma fhethu huṅwe. ₁₉Dosithiosi na Sosipatere, vhalangammbi vhavhili vha Makhabiosi, vha bva vha yo lozwa mmbi yo siwaho nga Timoti. Ndi vhanna vha no fhira zwigidi zwa fumi (10 000). ₂₀Zwenezwo Makhabiosi a khethekanya mmbi yawe nga zwigwada, a vhea mulangagomane kha tshigwada tshiṅwe na tshiṅwe, ha yo londwa Timoti. Timoti o vha e na mmbi ya vhahali vha tshimbilaho nga ṋayo vha zwigidi zwa ḓana na mahumi mavhili (120 000), na vhanameli vha dzibere vha zwigidi zwivhili na maḓana maṱanu (2 500). ₂₁Musi Timoti a tshi pfa uri Judasi u khou swika, a ṱuwisa vhasadzi na vhana khathihi na mihwalo a vha rumela fhethu hu no pfi Kharanaimi, ngauri ndi fhethu hune ha konḓa u govhela, hu sa swikei zwavhuḓi, ngauri nḓila dzoṱhe dza u ya hone dzi fhira nga pharani tsekene. ₂₂Tshigwada tsha Judasi tsha vha tshone tsha u ranga u swika. Zwenezwo Muvhonazwoṱhe a ḓisumbedza, maswina vha farwa nga nyofho vha balangana vha livha masia oṱhe, muṅwe a shavhela ngeno muṅwe a shavhela ngei, vha ita na u huvhadzana nga u rungana vhó no hanganea nga nyofho. ₂₃Judasi a pandamedza vhavhi avho o tou halifha, a vha vhulaha nga banga a lozwa vhane vha nga swika zwigidi zwa mahumi mararu (30 000). ₂₄Timoti ene muṋe a fariwa nga vhahali vha Dosithiosi na Sosipatere, hone nga vhumbulu hawe vhuhulu a vha humbela uri vha si mu vhulahe, vha mu litshe a ṱuwe, ngauri o vha o fara mashaka a vhanzhi vhavho, vhaṅwe o vha a tshi langa vhana vha vhokhotsi avho, huno arali ene a vhulahwa, na vhenevho vho vha vha tshi nga lifhedzwa. ₂₅A khwaṱhisedza uri u ḓo vhuedzedza mashaka avho vhá songo huvhadzwa, vha vhuya vha tenda, vha mu litsha a ṱuwa vha tshi itela u tshidza vha havho.

₂₆Judasi a fhirela phanḓa a swika Kharanaimi na thembeleni ya Atharagathioni, henefho a vhulaha vhathu vha zwigidi zwa mahumi mavhili na zwiṱanu (25 000). ₂₇Musi o no kunda avho a vha lozwa, a sudzulusa mmbi yawe a i isa Efroni, muḓini wo tingeledzwaho nga mitsheṱo, he ha vha hu tshi dzula Lisaniasi. Nnḓa ha mitsheṱo ho vha ho ima vhaṱhannga vha zwifhanga vhe vha imiswa henefho uri vha i lwele, vha lwa nga vhuhali; ngomu hayo ho vha hu na mitshini minzhi ya nndwa, na matombo mahulwane o khokhwaho a u posa maswina a re nnḓa ha mitsheṱo. ₂₈Hone Majuda vha rabela Khosi khulwane, Ramaanḓa ane a phusukanya mitsheṱo ya maswina, vha thuba muḓi uyo vha vhulaha vhathu vhane vha ṱoḓou swika zwigidi zwa mahumi mavhili na zwiṱanu (25 000) vha re ngomu hawo.

₂₉Vha mbo ḓi takuwa henefho vha livha Skhithopholisi, hune ha vha khilomitha dza ḓana na mahumi mavhili (120) u bva Jerusalema. ₃₀Hone Majuda vha dzulaho henefho vha ṱanzilela vhuthu ha vhathu vha Skhithopholisi, vha ri vho ḓi vha fara zwavhuḓi na musi zwo vhifha. ₃₁Ndi zwe Judasi na vhahali vhawe vha vha livhuha, vha vha ṱuṱuwedza uri vha ḓi dzula vha tshi konana na Majuda. Vha fhedza nga u swika Jerusalema musi vhuṱambo ha Dzivhege ho no ḓi vha tsini.

₃₂Musi vhuṱambo uho vhu no pfi Pentekoste ho no fhira, vha si vhuye vha dzula, vha mbo ḓi yo dia Gorogiasi mulangammbi wa Edomo. ₃₃Ene a imedzana navho e na vhahali vha tshimbilaho nga ṋayo vha zwigidi zwiraru (3 000), na vhanameli vha dzibere vha maḓana maṋa (400). ₃₄Nndwa ya ṱangana, ha vhulahwa Majuda vha si gathi. ₃₅Muṅwe wa Majuda vha Vhathubia a no pfi Dosithiosi, munameli wa bere wa vhuhali, a kunda Gorogiasi, a mu fara nga tshiambaro tsha nndwa a mu khwikhwidza a tshi ri u ḓo fara uyo muteketelwa a tshi khou tshila. Hone munameli wa bere muṅwe wa tshigwada tsha Thirakhia a mbo ḓi wela Dosithiosi a mu tumula tshanḓa kha shaḓa. Gorogiasi a shavhela Maresha. ₃₆Huno Esdriasi na vhahali vhawe vho vha vho no lwa tshifhinga tshilapfu, vha vhuya vha neta. Ndi hone Judasi a tshi rabela Muṋe washu uri a ḓisumbedze zwauri u ima navho, u vha ranga phanḓa nndwani. ₃₇A konou ṱavha mukosi wa nndwa nga luambo lwa vhomakhulukuku wawe, a tshi imba na nyimbo, a wela vhanna vha mmbi ya Gorogiasi vhá songo vhuya vha zwi lavhelela, a vha shakulisa.

₃₈Judasi a kuvhanganya mmbi yawe a livha muḓini wa Adulamu. Vha tshi vhona vhege i tshi vho fhela, vha ḓikumulula vha tshi tevhedza maitele a Mulayo, vha luma Sabatha henefho. ₃₉Nga matshelo zwo vha zwi tshi vho ṱoḓea vhukuma uri vho faho nndwani vha swiṱwe. Ndi zwe vhahali vha ḓa ha Judasi vha humbela uri vhafu vha ladzwe zwaloni zwa vhomakhuluku wavho. ₄₀Hone vha tshi vha hwala, vha wana vhoṱhe vho kungela zwitungulo zwa nga midzimu ya Jamunia nga fhasi ha zwiambaro zwavho, zwithu zwine Mulayo wa iledza Majuda. Ndi hone vhoṱhe vha tshi ḓivha uri avho vho fela mulandu ufhio. ₄₁Zwenezwo vhoṱhe vha renda nḓila dza Muṋe washu Muhaṱuli a sa khakhi, a no dzumbulula zwo dzumbamaho, ₄₂vha konou rabela uri zwivhi izwo zwi thuthiwe tshoṱhe. Judasi, munna uyo wa muḓivhalea, a kaidza vhahali uri vha sendele kule na vhuvhi hoṱhe, ngauri zwe zwa itea nga mulandu wa vhuvhi ha vho rambalalaho vho zwi vhona nga avho maṱo. ₄₃Ndi hone a tshi kuvhanganya mali kha vhahali vhawe nga muthihi nga muthihi, ya ita zwigidi zwivhili (2 000) zwa dzidrakhima dza maseṱha, a i isa Jerusalema uri i vhe ya tshiṱhavhelo tsha u pfumelelwa vhutshinyi. Judasi a tshi ita izwo o shuma nga nḓila yavhuḓi ya tshihulwane, vhunga o vha a tshi ḓivha uri vhafu vha ḓo vuwa vhafuni, ₄₄ngauri arali ro vha ri sa lavheleli u vuwa ha vhafu, zwo vha zwi tshi ḓo vha zwa mahandana, vhu vhutsilu u rabelela vho no ḓi faho. ₄₅Hone arali izwo o zwi itela pfufho yavhuḓi yo lindelaho avho vho ḓiawetshelaho vhe vhavhuya, wo vha u muhumbulo mukhethwa wa muthu o ḓikumedzaho Mudzimu. Ndi zwe a ita uri vhafu vha pfumelelwe vha vhofhololwe kha vhuvhi uho.