U vhulawa ha Jakopo na u farwa ha Pitrosi
1Misi yeneyo khosi Herude a thoma u tovhola tshivhidzo, a fara vhaṅwe vhavho; 2a vhuya a ri Jakopo mukomana wa Johanisi a vhulawe nga banga. 3A tshi vhona uri zwo takadza Majuda, a vho tou ṋaṋa, a farisa na Pitrosi. (Zwenezwo zwo itea tshi tshifhinga tsha vhuṱambo ha Vhurotho vhu si na mbilisa.) 4Pitrosi a ri u fariwa a hoṋelwa dzhele, a kumedzwa zwigwada zwiṋa zwa maswole maṋa maṋa uri zwi mu linde; ngauri Herude o vha a tshi ri u ḓo mu sengisa zwavhuḓi phanḓa ha vhathu Paseka yo no fhela. 5Nangoho Pitrosi a dzula henengei dzhele o lindwa, hone tshivhidzo tsha ḓi mu rabelela ha Mudzimu nga thabelo i sa tumuwi.
Pitrosi a tshi bviswa dzhele nga muruṅwa
6Vhusiku ha musi Herude a tshi ri ndi ḓo vuwa ndi tshi mu bvisela phanḓa ha vhathu, Pitrosi o vha o lala vhukati ha maswole mavhili, o vhoxwa nga geḓane mbili. Muṋangoni na hone ho vha ho vhewa vhalindi. 7Kathihi fhedzi ha vha ho no ima muruṅwa wa Muṋe washu henefho, kamara ya tshena nga tshedza! Muruṅwa a phaphatha Pitrosi kha lurumbu a mu karusa, a ri, “Ṱavhanya u vuwe!” Dziḽa geḓane dzi re zwanḓani zwawe dza mbo ḓi wela kule. 8Ndi hone muruṅwa a tshi ri, “Vhofha bannda u ambare na thovho dzau.” Pitrosi a ita nga u ralo. Muruṅwa a ri, “Ambara khanzu yau u ntevhele.” 9Nangoho Pitrosi a mu tevhela ha vha u bva hawe dzhele, a sa ḓivhi uri zwine muruṅwa a khou ita ndi vhukuma, a tshi ḓi ri khamusi u khou tou vhona bono. 10Vha fhira maswole a u thoma, vha ḓa vha fhira na a vhuvhili, vha vhuya vha swika na hu re na gethe ya tsimbi ine muthu a ri u fhira yone a mbo ḓi dzhena muḓini. Gethe ya vulea nga yoṱhe uri vha fhire, vha mbo ḓi bva, vha tshi swika mafhandeni a u thoma, kathihi fhedzi uyo muruṅwa a si tsha vhonala.
11Pitrosi ha vha hu hone a tshi dzivhuluwa, a ri, “Zwino ndi hone ndo zwi vhona uri ndi vhukuma! Muṋe wanga o ruma muruṅwa wawe a mponyokisa kha Herude na kha zwoṱhe zwe Majuda vha vha vha tshi ṱoḓa u nnyita!”
12A tshi vhona zwo ralo, a ya muṱani wa Maria mme a Johanisi, ane ḽiṅwe a pfi Markosi. Henefho ho vha ho kuvhangana vhathu vhanzhi vha tshi khou rabela. 13Pitrosi a tshi khokhonya vothi ḽa nnḓa, ha ḓa muṅwe mushumi wa musidzana a no pfi Roda a tshi ḓa u ṱolela. 14A tshi pfa uri ipfi ndi ḽa Pitrosi, a takala lwe a humela murahu nga u tou gidima a songo tsha vula na vothi, a vhudza vhathu uri a re muṋangoni ndi Pitrosi. 15Vhone vha ri, “Riṋe u songo ṱolou ri fhafhaḓela hafha.” Uyo musidzana a ḓi tou ima kha uri zwine a khou amba ndi ngoho, vhone vha vhuya vha ri, “Izwo kha a kundwe a tshi tou vha muruṅwa wawe.”
16Ngei muṋangoni Pitrosi o vha a tshi khou ḓi khokhonya. Vha tshi vula vha vhona nangoho e ene, vha akhamala. 17Ene a vha fhumudza nga tshanḓa, a konou vha toololela nga he Muṋe washu a mu bvisa dzhele. A vha vhudza a ri, “Mafhungo haya ni a vhudze-vho Jakopo na vhaṅwe Vhakhriste nga riṋe.” A ri u ralo a fhirela huṅwe.
18Ḽi tshi tsha hu si vhe hone u hanganea kha maswole, vha sa ḓivhi uri hu nga vha ho bvelela mini kha Pitrosi. 19Herude a mbo ri a ṱoḓiwe, hone a si wanale. Ndi hone a tshi sengisa aḽa maswole e a vha o linda Pitrosi, a fhedza nga u ri vha vhulawe.
Ngavhuya Herude a ṱuwa Judia, a tsela Khisaria a dzula tshifhinganyana henengei.
Lufu lwa Herude
20Herude o vhuya a sinyutshela vhathu vha Tiro na vha Sidoni. Vhone vha tshi vhona zwenezwo vha ḓa khae vhe tshigwada, vha kwengweledza Blastosi gota ḽa u langa pfamo uri a vha swikise vha pfumelelwe, ngauri shango ḽa havho ḽo vha ḽi tshi ṱunḓa shangoni ḽa Herude.
21Nga ḓuvha ḽe ḽa vha ḽo dzula ḽo tiwa Herude a ambara nguvho dzawe dza vhuhulwane, a dzula kha khuluṋoni a amba navho, 22vhathu vha tshi khou ḓi ṱavha mukosi vha tshi mu renda vha tshi ri, “A si muthu ane a khou amba hafha, ndi mudzimu!” 23Zwenezwo ha mbo ḓa muruṅwa wa Muṋe washu a rwa Herude nga vhulwadze nge a si hulise Mudzimu; a ḽiwa nga mbungu a fa.
24Ipfi ḽa Mudzimu ḽone ḽa ḓi anḓadzea ḽi tshi ya, ḽa ṱanganya mashango.
25Barnabasi na Saulo vhone vha ri u fhedza mushumo wavho wa sengosengo Antiokia, vha vhuelela Jerusalema, vho no vha na Johanisi ane ḽiṅwe a pfi Markosi.
