BARUKHU 5

₁Iwe Jerusalema,

bvula khanzu yau

ya zwililo na vhuṱungu,

ambara lunako

lwa vhugala ha Mudzimu,

u si tsha lu bvula lini na lini.

₂Ambara khanzu

ya vhuvhuya i bvaho kha Mudzimu,

ṱhohoni u ambare tshiala tsha vhugala

ha Walininalini.

₃Mudzimu u ḓo sumbedza

tshakha dzoṱhe fhasi ha lutombo

lupenyo lwaṋu.

₄Mudzimu u ḓo ni rina dzina ḽa lini na lini

ḽi no pfi, “Mulalo-nga-vhuvhuya,

Vhugala-nga-u-luvha-Mudzimu.”

₅Iwe Jerusalema takuwa,

ima zwivhangani,

sedza Vhubvaḓuvha u vhone vhana vhau

vhó kuvhanganywa

u bva Vhubvaḓuvha na Vhukovhela

nga ipfi ḽa Ene Mukhethwa,

vha tshi khou pembela

nge Mudzimu a vha elelwa.

₆Vho ṱuwa

vha tshi khou tshimbila nga ṋayo

vha tshi khadiwa nga maswina avho,

hone Mudzimu u ḓo vha vhuedzedza

kha iwe

vhó hwalwa nga vhugala,

zwa nga vho dzula kha khuluṋoni

ya vhuhosi.

₇Mudzimu o laya a ri

thavha iṅwe na iṅwe ndapfu

na zwivhanga zwa lini na lini

zwi thuthwe,

magovha a ḓadzwe hu linganele,

uri Vhaisraele vha tshimbile

vho tsireledzea

vhe vhugalani ha Mudzimu.

₈Mudzimu o ri maṱaka

na muri muṅwe na muṅwe u nukhelelaho

zwi tsireledze Vhaisraele.

₉Vhukuma

Mudzimu u khou endedza Vhaisraele

vhó takala

nga tshedza tsha vhugala hawe,

nga khathutshelo yawe

na vhuvhuya hawe.