Thabelo ya Azaria na luimbo lwa vhaṱhannga vhararu
(Nyengedzo dzo dzheniswaho vhukati ha Daniele 3:23 na 3:24)
24/2Vhaṱhannga avho vhararu vha Majuda vha tshimbila-tshimbila vhukati ha khavhu dza mulilo vha tshi khou imbela Mudzimu nyimbo, vha tshi renda Muṋe washu, 25/2Henefho muliloni Azaria a ima a tou dzi, a rabela a tshi tou ṱavha mukosi a ri:
26/2“Nga hu rendwe Iwe,
wo fanela u huliswa,
Iwe Muṋe washu,
Mudzimu wa vhokotsi ashu,
nga hu rendwe vhugala ha dzina ḽau lini na lini!
27/4Iwe u ḓi ri itela zwi re zwone fhedzi,
mishumo yau yoṱhe ndi ya ngoho,
nḓila dzau dzo tou tswititi,
khaṱhulo dzau dzoṱhe ndi dzone.
28/5Zwoṱhe zwe wa ita uri zwi ri wele,
na zwo welaho Jerusalema muḓi mukhethwa wa vhokotsi ashu
ndi khaṱhulo ya ngoho yo fanelaho vhuvhi hashu.
29/6Vhukuma ro tshinya,
ro pfuka mulayo wau nga u u furalela,
ro tshinya zwihulu.
30/7Milayo yau a ro ngo i thetshelesa, a ro ngo i tevhedza, a ro ngo ita zwe wa ri laya, ndi musi zwo ri nakela.
31/8Zwino zwoṱhe zwe wa ita uri zwi ri wele, zwoṱhe zwe wa ri ita,
zwo vha zwo fanela vhukuma.
32/9Wo ri kumedza maswina ashu,
one mavhanga a nyadzaho mulayo,
a no fhira vhoṱhe nga vhuvhi.
Wo ri kumedza khosi ya tshiṱalula,
ene a no fhira mahosi oṱhe a ḽifhasi nga vhuvhi.
33/10Zwino ri nga amba ra ri mini?
Riṋe vhalanda vhau vhane vha u gwadamela vha u luvha
ro fuka ṱhoni na u nyadziwa.
34/11Hone u tshi itela dzina ḽau, u songo ri ṅala tshoṱhe,
u songo bva kha mulanga wau.
35/12U songo humisa khathutshelo yau kha riṋe,
u tshi itela Abrahamu khonani yau,
u tshi itela Isaka muḓinḓa wau,
na Israele mukhethwa wau,
36/13vhe wa vha fulufhedzisa u andisa vha lutsinga lwavho,
vha nga ṋaledzi dza lutomboni,
vha nga muṱavha wa khunzikhunzini ya lwanzhe.
37/14Yawee Muṋe washu, ro fhungudzea,
ri vho fhirwa nga tshakha dzoṱhe;
ṋamusi ro ṱukufhadzwa ḽifhasini ḽoṱhe nga mulandu wa vhutshinyi hashu.
38/15Misi ino a ri na muvhusi,
a ri na muporofita,
a ri na murangaphanḓa,
a ri na nduvho i fhiswaho kana tshiṱhavhelo
kana thevhula dzine ra u tevhulela kana zwioro,
a ri na fhethu ha u ṋekedza nduvho dzine ra nga u takadza ngadzo.
39/16Hone ngavhe mbilu dzashu dzi tshi ḓisola, muya u tshi ḓiṱukufhadza,
Iwe wa zwi takalela,
40/17unga tshiṱhavhelo tshi fhiswaho tsha thutha na mbohwana
kana zwigidi zwa ngwana dzo nonaho,
tshiṱhavhelo tshashu nga tshi tou ralo maṱoni au ṋamusi rí fhano muliloni,
wa zwi takalela u tshi vhona ri tshi u tevhela nga mbilu yoṱhe,
ngauri vhane vha u fulufhela a vha nga shoni.
41/18Zwino vhukuma ri u tevhela nga mbilu yoṱhe, ri a u ofha, ri a u rabela.
42/19U songo ri litsha ri tshi shoniswa,
ri itele vhuthu u tshi tevhedza vhuthu hau,
na tshilidzi tshau tshihulu.
43/20Muṋe washu, ri lamulele
u tshi tevhedza mishumo yau i kanukisaho,
uri dzina ḽau ḽi dovhe ḽi rendiwe.
44/21Ita uri vhoṱhe vha no tambudza vhalanda vhau vha hanganee,
nga vha niwe nga ṱhoni, nungo dzavho dzi pwashekane.
44/22Vha sumbedze uri Muṋe wa zwoṱhe Mudzimu ndi Iwe u woṱhe,
wa vhugala hoṱhe ḽifhasini.”
46/23Zwino vhalanda vha khosi vho posaho vhaṱhannga vhararu ṋanḓoni ya mulilo, vha ḓi endela u vhasedza ṋanḓo nga mapfura na tshikonṱiri na nnzi na khuni, 47/24khavhu dza mulilo dza raha dza guma kha mitha dza mahumi mavhili na ṱhanu (25) nga nṱha ha ṋanḓo, 48/25dza fuḓa dza fhisa Vhakhaladia vha re henefho tsini na ṋanḓo vha swa vhe lore. 49/26Huno muruṅwa wa Muṋe washu a tsela ṋanḓoni ya mulilo a yo ima na Azaria na khonani dzawe, a bvisa khavhu dza mulilo afho ṋanḓoni. 50/27Muruṅwa a ita uri ngomu ha ṋanḓo hu nge hu khou vhudzula muya u re na ṅwando. Mulilo a wo ngo vhuya wa vha kwama kana wa vha pfisa vhuṱungu kana wa vha vhaisa.
Luimbo lwa vhaṱhannga vhararu
51/28Ndi hone vhaṱhannga avho vhararu vha tshi imba mazha vhe ngomu ṋanḓoni, vha tshi renda Mudzimu vha mu hulisa vha ri:
52/29Nga hu rendwe Iwe Muṋe washu,
Mudzimu wa vhokotsi ashu,
wo fanela u rendiwa wa huliswa lini na lini.
53/30Nga hu rendwe dzina ḽau ḽikhethwa ḽa vhugala,
ḽi rendwe zwihulu, ḽi huliswe zwihulu lini na lini.
53/31Nga hu rendwe Iwe thembeleni yau ya vhugala vhukhethwa;
wo fanela u rendwa wa huliswa u fhira zwoṱhe lini na lini.
54/32Nga hu rendwe Iwe wo dzulaho kha khuluṋoni ya muvhuso wau
wo fanela u rendwa wa huliswa u fhira zwoṱhe lini na lini.
55/33Nga hu rendwe Iwe wo dzulaho kha khuluṋoni yau nṱha ha Vhakherube
wó sedza fhasi-fhasi dindini
wo fanela u rendwa wa huliswa u fhira zwoṱhe lini na lini.
56/34Nga hu rendwe Iwe ú lutomboni lwa ḽiṱaḓulu,
wo fanela u rendwa wa huliswa lini na lini.
57/35Rendani Muṋe washu,
noṱhe inwi zwivhumbwa zwa Muṋe washu,
mu rendeni ni mu hulise lini na lini.
58/36Rendani Muṋe washu, inwi vharuṅwa vha Muṋe washu,
mu rendeni ni mu hulise lini na lini.
59/37Renda Muṋe washu, iwe ḽiṱaḓulu
mu rende u mu hulise lini na lini.
60/38Rendani Muṋe washu
inwi maḓi oṱhe a re nṱha ha lutombo,
mu rendeni ni mu hulise lini na lini.
61/39Rendani Muṋe washu,
noṱhe inwi mara a Muṋe washu,
mu rendeni ni mu hulise lini na lini.
62/40Rendani Muṋe washu, inwi ḓuvha na ṅwedzi,
mu rendeni ni mu hulise lini na lini.
63/41Rendani Muṋe washu, inwi ṋaledzi dza lutomboni,
mu rendeni ni mu hulise lini na lini.
64/42Rendani Muṋe washu,
inwi noṱhe mvula na ṅwando,
mu rendeni ni mu hulise lini na lini.
65/43Rendani Muṋe washu,
noṱhe inwi mimuya na maḓumbu,
mu rendeni ni mu hulise lini na lini.
66/44Rendani Muṋe washu,
inwi mulilo na biso,
mu rendeni ni mu hulise lini na lini.
67/45Rendani Muṋe washu,
inwi murotho na biso,
mu rendeni ni mu hulise lini na lini.
68/46Rendani Muṋe washu,
inwi ṅwando na mvula,
mu rendeni ni mu hulise lini na lini.
69/47Rendani Muṋe washu,
inwi mahaḓa na phepho,
mu rendeni ni mu hulise lini na lini.
70/48Rendani Muṋe washu, inwi aisi na gabugu,
mu rendeni ni mu hulise lini na lini.
71/49Rendani Muṋe washu,
inwi vhusiku na masiari,
mu rendeni ni mu hulise lini na lini.
72/50Rendani Muṋe washu,
inwi tshedza na swiswi,
mu rendeni ni mu hulise lini na lini.
73/51Rendani Muṋe washu,
inwi lupenyo na makole,
mu rendeni ni mu hulise lini na lini.
74/52Ḽifhasi nga ḽi rende Muṋe washu,
nga ḽi mu rende ḽi mu hulise lini na lini.
75/53Rendani Muṋe washu,
inwi dzithavha na zwivhanga,
mu rendeni ni mu hulise lini na lini.
76/54Rendani Muṋe washu,
inwi zwoṱhe zwi melaho mavuni,
mu rendeni ni mu hulise lini na lini.
77/55Rendani Muṋe washu,
inwi zwisima zwa maḓi,
mu rendeni ni mu hulise lini na lini.
78/56Rendani Muṋe washu,
inwi malwanzhe na milambo,
mu rendeni ni mu hulise lini na lini.
79/57Rendani Muṋe washu,
inwi khovhe dza vhimbi na zwoṱhe zwi talaho maḓini,
mu rendeni ni mu hulise lini na lini.
80/58Rendani Muṋe washu,
noṱhe inwi zwiṋoni,
mu rendeni ni mu hulise lini na lini.
81/59Rendani Muṋe washu,
noṱhe inwi phukha dza ḓaka na zwifuwo,
mu rendeni ni mu hulise lini na lini.
82/60Rendani Muṋe washu,
noṱhe inwi vhana vha vhathu,
mu rendeni ni mu hulise lini na lini.
83/61Rendani Muṋe washu, inwi Vhaisraele,
mu rendeni ni mu hulise lini na lini.
84/62Rendani Muṋe washu,
inwi vhaphrista vha Muṋe washu,
mu rendeni ni mu hulise lini na lini.
85/63Rendani Muṋe washu, inwi vhalanda vhawe,
mu rendeni ni mu hulise lini na lini.
86/64Rendani Muṋe washu,
inwi mimuya na dzimbilu dza vhavhuya,
mu rendeni ni mu hulise lini na lini.
87/65Rendani Muṋe washu,
inwi vha fulufhedzeaho vha mbilu dza u ḓiṱukufhadza,
mu rendeni ni mu hulise lini na lini.
88/66Rendani Muṋe washu,
inwi Hanania na Azaria na Mishaele,
mu rendeni ni mu hulise lini na lini.
O ri lamukisa dindini,
a ri tshidza kha maanḓa a lufu,
a ri ṋula vhukati ha ṋanḓo i dugaho mulilo,
a ri bvisa ngomu muliloni.
89/67Rendani Muṋe washu,
u na vhuthu; lufuno lwawe ndi lwa lini na lini.
90/68Rendani Mudzimu wa midzimu,
noṱhe inwi ni no ofha Muṋe washu,
mu rendeni nga ni mu livhuhe; lufuno lwawe ndi lwa lini na lini.
