DANIELE (TSHIGIRIKI) 14

₁Musi khosi Asithiagese o no yo eḓedzwa na vhokhotsi awe, Khoreshe wa Pheresia a sala a tshi vhusa. ₂Daniele o vha e mbiluni ya khosi, a tshi huliswa u fhira khonani dzoṱhe dza khosi.

₃Vhababilonia vho vha vhe na mudzimu wa tshifanyiso u no pfi Bele; ḓuvha ḽiṅwe na ḽiṅwe wo vha u tshi ṋewa nkho dza fumi na mbili (12) dza vhukhopfu vhutete na nngu dza mahumi maṋa (40) na mvuvhelo ṱhanu na nthihi (6) dza waini. ₄Khosi yo vha i tshi luvha mudzimu uyo, ḓuvha ḽiṅwe na ḽiṅwe i tshi yo u gwadamela, hone Daniele o vha a tshi gwadamela Mudzimu wawe fhedzi.

₅Zwino khosi ya vhudzisa Daniele ya ri, “Ndi mini ni sa gwadameli Bele?” Daniele a fhindula a ri, “Ndi uri a thi luvhi midzimu ya zwifanyiso yo itwa nga zwanḓa zwa vhathu, ndi luvha Mudzimu a tshilaho fhedzi we a sika ḽiṱaḓulu na ḽifhasi, a no vhusa zwoṱhe zwi tshilaho.”

₆Zwino khosi Khoreshe a vhudzisa Daniele a ri, “Ndi mini ni sa tendi uri Bele ndi mudzimu u tshilaho? A ni vhoni uri u ḽa hani wa nwa hani ḓuvha ḽiṅwe na ḽiṅwe?” ₇Daniele a sea a ri, “Thovhele, vha songo fhuriwa, mudzimu uyo u tou vha vumba nga ngomu, nga nnḓa ndi musinaseṱha, a u athu vhuya wa ḽa kana wa nwa tshithu.”

₈Khosi ya sinyuwa ya vhidza vhaphrista vha Bele ya vha vhudza ya ri, “Arali na sa mmbudza uri a no ḽa zwiḽiwa izwi ndi nnyi, ni ḓo fa. ₉Hone arali na sumbedza uri vhukuma ndi Bele une wa zwi ḽa, hu ḓo fa Daniele, ngauri u khou nyefula Bele.” Daniele a vhudza khosi a ri, “Nga hu itwe zwe vha zwa.”

₁₀Zwino ho vha hu na vhaphrista vha Bele vha mahumi maṱanu na mavhili (70), hu sa katelwi vhafumakadzi vhavho na vhana vhavho. Ndi hone khosi i tshi ṱuwa na Daniele vha ya thembeleni ya Bele. ₁₁Vhaphrista vha Bele vha ri, “Nga vha vhone, riṋe zwino ri khou bvela nnḓa. Vhone thovhele vha ḓo vhetshedzela zwiḽiwa, vha vhekanya waini, vha konou vala vothi, vha ḽi shatela vha vhea luswayo lwa rinngi yavho. ₁₂Arali vha tshi vhuya nga matsheloni vha wana uri Bele a wo ngo zwi ḽa zwoṱhe, riṋe ri ḓo fa; arali zwo ḽiwa hu ḓo fa Daniele uyo a no ri zwifhelela.” ₁₃Izwo a zwo nga vha dina, ngauri fhasi ha ḓafula vho vha vho ita nzanyo i sa vhonali ine vha dzhena ngayo vha ḽa zwiḽiwa izwo.

₁₄Musi vho no ṱuwa, khosi ya vhetshedzela zwiḽiwa phanḓa ha Bele. Zwino Daniele a vhudza vhalanda vhawe uri vha ḓise milora, vha i balanganya hoṱhe afho thembeleni, zwi tshi vhonwa nga khosi i yoṱhe. Ndi hone vha tshi bvela nnḓa vha vala vothi vha ḽi shatela vha vhea luswayo lwa rinngi ya khosi, vha ṱuwa. ₁₅Vhusiku honoho vhaphrista vha dzhena sa nga misi vhe na vhafumakadzi vhavho na vhana, vha ḽa vha nwa zwoṱhe.

₁₆Nga matshelonitsheloni khosi ya vuwa, ya ya thembeleni i na Daniele. ₁₇Khosi ya vhudzisa ya ri, “Daniele, tswayo a dzo ngo kwatulwa naa?” Daniele a fhindula a ri, “Muhali, a dzo ngo kwatulwa.” ₁₈Musi khosi i tshi tou vula vothi ya sedza ḓafulani, ya ṱavha mukosi ya ri, “Iwe Bele u muhulwane, kha iwe a hu na vhufhura na kathihi!”

₁₉Hone Daniele a sea, a dzivhisa khosi u dzhena thembeleni, a ri, “Nga vha dzou sedza fhasi, vha vhone uri idzi ndi ṋayo dza vhonnyi.” ₂₀Khosi ya ri, “Ndi khou vhona ṋayo dza vhanna na vhasadzi na vhana.” ₂₁Ndi hone khosi i tshi sinyuwa ya fara vhaphrista na vhafumakadzi vhavho na vhana. Vha sumbedza khosi nzanyo i sa vhonali ine vha ḓi dzhena ngayo vha ḽa zwi re ḓafulani. ₂₂Zwino khosi ya vha vhulaha, ya dzhia Bele ya ṋekedza Daniele, ene a pwashekanya Bele a thutha na thembele yawo.

₂₃Zwino henefho fhethu ho vha hu na ḓiragoni ḽihulu ḽe ḽa vha ḽi tshi luvhiwa nga Vhababilonia. ₂₄Khosi ya vhudza Daniele ya ri, “Vhonani, ni nga si hanedze uri mudzimu uyu u a tshila, u gwadameleni!” ₂₅Huno Daniele a fhindula a ri, “Nṋe ndi gwadamela Mudzimu Muṋe wanga, ngauri ndi Ene Mudzimu a tshilaho. ₂₆Muhali, arali vha ntendela, ndi ḓo vhulaha diragoni iḽi ndi si na banga kana mugopi.” Khosi ya ri, “Ndi a ni tendela.”

₂₇Zwino Daniele a dzhia tshikontiri na mapfura na mavhudzi a zwi vhilisa zwo ṱangana a ita zwimbundwa ngazwo, a kapudza ḓiragoni iḽo. Ḓiragoni ḽa ri u zwi ḽa ḽa balea thumbu. Daniele a vhudza khosi a ri, “Nga vha dzou vhona mudzimu une vha u luvha!”

₂₈Musi Vhababilonia vha tshi zwi pfa, vha sinyuwa vha vutshela khosi vha ri, “Khosi yo no vha Mujuda, yo lozwa Bele, ya vhulaha diragoni, ya vhulaha vhaphrista.” ₂₉Vha takuwa vha ya ha khosi vha ri, “Nga vha ri kumedze Daniele, ri sa ḓo vhulaha vhone na vha muṱa wavho.” ₃₀Khosi i tshi vhona uri vha khou ita lunzili, vha tshi tou kombetshedza, ya kombetshedzea u vha kumedza Daniele. ₃₁Vha posa Daniele bakoni ḽa dzindau, a dzula hone a fhedza maḓuvha maṱanu na ḽithihi. ₃₂Henefho bakoni ho vha hu na ndau ṱhanu na mbili, ḓuvha ḽiṅwe na ḽiṅwe dzo vha dzi tshi ṋewa mitumbu mivhili na nngu mbili, hone zwino dzo vha dzi songo ṋewa tshithu, uri dzi pfe nḓala dzi kone u ponda Daniele.

₃₃Zwino shangoni ḽa Judia ho vha hu na muporofita a no pfi Habakuku. O ṅwata tshinkwa a tshi longa ndiloni a tshi ṱanganya na tshisevho tshe a bika a tshi khou yo ṋea vhakaṋi tsimuni. ₃₄Huno muruṅwa wa Muṋe washu a mu vhudza a ri, “Dzhiani zwiḽiwa zwine na vha nazwo ni ise Babilonia ni yo ṋea Daniele bakoni ḽa dzindau.” ₃₅Huno Habakuku a fhindula a ri, “Muṋe wanga, Babilonia a thi athu vhuya nda hu vhona, na bakoni ḽa dzindau a thi hu ḓivhi!” ₃₆Zwino muruṅwa wa Muṋe washu a mu fara nga mavhudzi a mu hwala a ṱuwa nae nga luvhilo lwa tshiḓumbumukwe, a swika a mu tsitsa Babilonia u livhana na bako ḽa dzindau.

₃₇Zwino Habakuku a vhidzelela a ri, “Daniele, Daniele, dzhiani zwiḽiwa zwe na rumelwa nga Mudzimu!” ₃₈Daniele a ri, “Iwe Mudzimu, wo nkhumbula, a wo ngo ṱutshela vhane vha u funa.” ₃₉Zwino Daniele a vuwa a ḽa. Kathihi fhedzi muruṅwa wa Mudzimu a vhuedzedza Habakuku shangoni ḽa hawe.

₄₀Nga ḓuvha ḽa vhuṱanu na vhuvhili khosi Khoreshe a ya u lila Daniele. Musi a tshi swika bakoni, a sedza ngomu, a vhona Daniele o dzula henefho. ₄₁Khosi ya ṱavha mukosi muhulu ya ri, “Muhulwane ndi Iwe Muṋe wa zwoṱhe Mudzimu wa Daniele! A hu na Mudzimu muṅwe arali e si Iwe fhedzi!” ₄₂Ndi hone khosi Khoreshe a tshi bvisela Daniele nnḓa, hone vhe vha linga u lozwa Daniele a vha posa bakoni, kathihi fhedzi vha mbo ḓi pondiwa nga dzindau a tshi zwi vhona.