DANIELE 3

₁Khosi Nebukhadnetsara o vhuya a vhumbisa tshifanyiso tsha musuku, vhulapfu u ya nṱha tsha vha mithara dza 30, u aṱama tsha vha mithara tharu, tsha imiswa mudavhini wa Dura, shangoni ḽa Babele. ₂Khosi Nebukhadnetsara zwino a vhidza vhavhusi na magota na vhakoma na vhaeletshedzi na vhafaragwama na vhahaṱuli na vhahulwane vha mapholisa na vhahulwane vhoṱhe vha shango uri vha kuvhangane, vha vhe hone hu tshi hangulwa tshifanyiso tshe tsha imiswa nga khosi Nebukhadnetsara. ₃Ndi hone vhavhusi na magota na vhakoma na vhaeletshedzi na vhafaragwama na vhahaṱuli na vhahulwane vha mapholisa na vhahulwane vhoṱhe vha shango vha tshi kuvhangana u hangula itsho tshifanyiso tsho imiswaho nga khosi Nebukhadnetsara, vha ima henefho phanḓa ha tshifanyiso tshe tsha vha tsho imiswa nga khosi Nebukhadnetsara. ₄Muḓinḓa a vhidzelela nga ipfi ḽihulu a ri, “Inwi vhathu vha tshakha dzoṱhe na matsinde na dzinyambo, thetshelesani! ₅Ni tshi tou pfa hu tshi lila phalaphala na tshiṱiringo na mbila na dende na haripa na ṋanga na tshilidzo tshifhio na tshifhio, no fanela u gwadama na luvha tshifanyiso tsha musuku tsho imiswaho nga khosi Nebukhadnetsara. ₆Ane a si gwadame a luvha u ḓo mbo ḓi poswa ṋanḓoni ya mulilo u dugaho.”

₇Zwenezwo vhathu vha tshi tou pfa hu tshi lila phalaphala na tshiṱiringo na mbila na dende na haripa na ṋanga na tshilidzo tshifhio na tshifhio, vhathu vha tshakha dzoṱhe na matsinde oṱhe na nyambo dzoṱhe vha gwadama vha luvha tshifanyiso tsho imiswaho nga khosi Nebukhadnetsara.

₈Zwenezwo vhaṅwe Vhakhaladia vha ya vha pomoka Majuda. ₉Vha vhudza khosi Nebukhadnetsara vha ri, “Thovhele nga vha lalame lini na lini! ₁₀Thovhele vho vhea mulayo vha ri muṅwe na muṅwe a tshi pfa hu tshi lila phalaphala na tshiṱiringo na mbila na dende na haripa na ṋanga na tshilidzo tshifhio na tshifhio a gwadame a luvhe tshifanyiso tsha musuku, ₁₁vha ri a sa gwadami a luvha u ḓo poswa ṋanḓoni ya mulilo u dugaho. ₁₂Zwino hu na vhaṅwe Majuda vhe vha vha kumedza mafhungo a shango ḽa Babele, ndi Shadraka na Mishaka na Abedenego, havho vhathu a vha londi zwe thovhele vha amba, a vha shumeli midzimu yavho, vha hana u luvha tshifanyiso tsha musuku tshe thovhele vha tshi imisa.”

₁₃Nebukhadnetsara a sinyuwa zwihulu, a vhidzisa Shadraka na Mishaka na Abedenego, vha mbo ḓi ḓiswa phanḓa ha khosi. ₁₄Nebukhadnetsara a amba navho a ri, “Shadraka na Mishaka na Abedenego, ndi ngoho hu tshi pfi inwi a ni shumeli midzimu yanga nahone ni hana u luvha tshifanyiso tsha musuku tshe nda tshi imisa naa? ₁₅Zwino-ha musi ni tshi pfa hu tshi dovha u lila phalaphala na tshiṱiringo na mbila na dende na haripa na ṋanga na tshilidzo tshifhio na tshifhio, ni ḓo gwadama na luvha tshifanyiso tshe nda tshi vhumba naa? Arali na hana u tshi luvha, vhukuma ni ḓo mbo ḓi posiwa ṋanḓoni ya mulilo u dugaho. Ndi ufhio mudzimu ane a nga ni lamukisa zwanḓani zwanga?” ₁₆Shadraka na Mishaka na Abedenego vha fhindula khosi Nebukhadnetsara vha ri, “Mbudziso yavho a i ṱoḓi phindulo; ₁₇arali Mudzimu washu ane ra mu shumela a tshi kona u ri lamukisa ṋanḓoni ya mulilo u dugaho na zwanḓani zwa thovhele, u ḓo ri tshidza. ₁₈Hone nangwe a si ri lamukise, zwenezwo nga vha ḓivhe uri ri nga si shumele mudzimu wavho kana ra luvha tshifanyiso tsha musuku tshe vha tshi imisa.”

₁₉Mafhungo hayo a sinyusa khosi Nebukhadnetsara zwihulu, a si tsha lavhelesa Shadraka na Mishaka na Abedenego nga vhulenda. A ri ṋanḓo i vhasedzwe kaṱanu na kavhili u fhira nga misi, ₂₀a vhudza vhahali vha maanḓa vha mmbi yawe uri vha vhofhe Shadraka na Mishaka na Abedenego vha vha pose ṋanḓoni ya mulilo u dugaho. ₂₁Zwenezwo vha mbo ḓi vhoxwa vho ḓi ambara khanzu na marukhu na miṅadzi na zwiambaro zwoṱhe vha poswa ṋanḓoni ya mulilo u dugaho. ₂₂Zwino nge khosi ya amba yo tou khwaṱhisa nahone ṋanḓo ya vha i tshi fhisa zwihulu, vhaḽa vhanna vho hwalaho Shadraka na Mishaka na Abedenego vha mbo ḓi fhiswa nga khavhu ya mulilo vha fa. ₂₃Vhanna avho vhararu, Shadraka na Mishaka na Abedenego vha wela ṋanḓoni ya mulilo u dugaho vha tshee vho vhofhiwa.

₂₄Khosi Nebukhadnetsara a mbo takuwa a ima nga milenzhe o akhamala, a vhudzisa vhaeletshedzi vhawe a ri, “A ro ngo vhofha vhanna vhararu ra vha posa muliloni naa?” Vhone vha fhindula vha ri, “Ndi zwenezwo thovhela.” ₂₅Ene a ri, “Ndi khou vhona vhanna vhaṋa vha tshi khou ḓitshimbilela tshivhindini tsha mulilo, vhá songo vhoxwa, vhá songo huvhala, wa vhuṋa u nga muruṅwa wa Mudzimu.” ₂₆Nebukhadnetsara a sendela muṋangoni wa ṋanḓo i dugaho mulilo a vhidzelela a ri, “Shadraka na Mishaka na Abedenego, inwi vhaḓinḓa vha Mudzimu Waṱaḓuluṱaḓulu, bvelani nnḓa! Iḓani fhano!” Shadraka na Mishaka na Abedenego vha ḓa vha tshi bva tshivhindini tsha mulilo. ₂₇Vhavhusi na vhakoma na magota na vhaeletshedzi vha khosi vha kuvhanganela avho vhanna vhararu vha vha sedza: mivhili yavho yo vha i songo swa nga mulilo, na luvhudzi na luthihi lwa ṱhohoni dzavho lwo vha lu songo vhuya lwa vhavhea, nguvho dzavho dzo vha dzi songo swa, vho vha vha sa vhuyi vha nukha na vhutsi. ₂₈Ndi hone Nebukhadnetsara a tshi ri, “Nga hu rendwe Mudzimu wa Shadraka na Mishaka na Abedenego, o ruma muruṅwa wawe u lamukisa vhaḓinḓa vhawe vhe vha mu fulufhela, vha nyadza zwe khosi ya amba, vha ri ndi khwiṋe vha tshi ṅala vhutshilo havho u fhira u shumela kana u luvha muṅwe mudzimu arali e si Mudzimu wavho fhedzi. ₂₉Zwenezwo nṋe ndi vhea mulayo ndi ri: Inwi vhathu vha tshakha dzoṱhe na matsinde oṱhe na nyambo dzoṱhe, ane a vhuya a nyefula Mudzimu wa Shadraka na Mishaka na Abedenego u ḓo paḓukanywa miraḓo, nnḓu yawe ya wiselwa fhasi ya itwa thulwi ya mathukhwi, ngauri a hu na muṅwe mudzimu ane a nga lamukisa vhathu nga u rali.” ₃₀Ndi hone khosi i tshi vhea Shadraka na Mishaka na Abedenego vhuimoni vhuhulwane shangoni ḽa Babele.