DANIELE 5

₁Khosi Beleshatsara o itela magota awe vhuṱambo vhuhulu, ha ḓa vha tshigidi, a nwa navho waini. ₂Musi Beleshatsara a tshi vho pfa u ḓifha ha waini, a ri hu ḓiswe midzio ya musuku na siliva ye khotsi awe Nebukhadnetsara a i dzhia thembeleni Jerusalema, uri khosi na magota ayo na vhafumakadzi vhayo na vhasadzi vhayo vha dziphuli vha nwe ngayo. ₃Ha mbo ḓiswa iyo midzio ya musuku ye ya dzhiwa thembeleni ya Mudzimu i re Jerusalema, khosi na magota ayo na vhafumakadzi vhayo na vhasadzi vhayo vha dziphuli vha nwa ngayo. ₄Vha nwa waini yavho vha renda midzimu yavho ya musuku na siliva, ya musinaseṱha na tsimbi, ya thanda na matombo.

₅Kathihi fhedzi ha vhonala munwe wa muthu, wa thoma u ṅwala galagani ya luvhondo lwa pfamo ya musanda, u livhana na murahu ha tshivheambone, khosi ya vhona itsho tshanḓa tshi tshi ṅwala. ₆Khosi ya tswukuluwa nga nyofho ya kulekana miraḓo, magona ayo a tou tetemela. ₇A ṱavha mukosi a ri hu ḓiswe vhabvumbi vhawe na vhaḓivhi vha zwa ṋaledzi na mingome. Khosi ya vhudza vhaṱali vha Babele ya ri, “Ane a nga kona u vhala zwe zwa ṅwalwa a nṱalutshedza zwine zwa amba, u ḓo ambadzwa dza muridili, a ambadzwa na geḓane ya musuku mukuloni, a ṋewa vhuimo ha vhuraru muvhusoni.”

₈Vhaṱali vha khosi vhoṱhe vha sendela vha kuvhangana, hone vha si kone u vhala zwo ṅwalwaho, vha si kone u ṱalutshedza khosi uri zwi amba mini. ₉Khosi Beleshatsara a dinalea zwihulu, a tswukuluwa u fhirisa, magota awe vha hanganea. ₁₀Ndi hone mufumakadzi mme a khosi, nga u pfa mukosi wa khosi na magota awe, a tshi ḓa nḓuni ya vhuṱambo. Mufumakadzi a ri, “Thovhele nga a lalame! Vha songo dinalea, vha songo tswukuluwa nga u ralo. ₁₁Muvhusoni wavho hu na munna ane muya wa midzimu mikhethwa wa dzula ngomu hawe. Misi ya vhokhotsi aṋu o wanala e na nḓivho na ṱhalukanyo na vhuṱali vhune ha nga ha midzimu. Khotsi aṋu khosi Nebukhadnetsara vho mu ita muhulwane wa vhadziamanditi na vhabvumbi na vhaḓivhi vha zwa ṋaledzi na mingome. ₁₂Muya wonoyo u mangadzaho na nḓivho yo raloho na vhuṱali ha u ṱalutshedza miloro na u piringulula dzithai na u piringulula zwi konḓaho u dzula kha uyo munna Daniele, we khosi ya dovha ya mu ira ḽa Beletheshatsara. Zwenezwo vhidzisani Daniele; u ḓo kona u ni vhudza uri izwi zwi amba mini.”

₁₃Daniele a mbo ḓiswa phanḓa ha khosi. Khosi ya amba na Daniele ya ri, “Ndi inwi Daniele, muṅwe wa mathubwa a Majuda e a ḓiswa nga khosi khotsi anga a tshi bva kha ḽa Juda naa? ₁₄Ndo pfa upfi muya wa midzimu u dzula ngomu haṋu, ha pfi ni na nḓivho na ṱhalukanyo na vhuṱali vhu mangadzaho. ₁₅Vhaṱali na vhabvumbi vho no ḓi ḓiswa ha nṋe uri vha vhale zwo ṅwalwaho vha mmbudze zwine zwa amba, hone a vho ngo kona u ṱalutshedza uri zwo ṅwalwaho zwi amba mini. ₁₆Vhunga ndo vhudzwa uri inwi ni a kona u ṱalutshedza na u piringulula zwi konḓaho, ndi zwone, arali na kona u vhala zwo ṅwalwaho, na nṱalutshedza uri zwi amba mini, ni ḓo ambadzwa dza muridili, na ambara na geḓane mukuloni waṋu, na ṋewa vhuimo ha vhuraru muvhusoni.”

₁₇Ndi hone Daniele a tshi fhindula khosi a ri, “Nga vha ḓivhetshele zwifhiwa zwavho, pfufho dzavho nga vha dzi ṋee vhaṅwe. Naho zwo ralo ndi ḓo vhalela thovhele zwo ṅwalwaho nda vha ṱalutshedza uri zwi amba mini. ₁₈Thovhele, Mudzimu Waṱaḓuluṱaḓulu o ṋea khotsi avho Nebukhadnetsara vhuhosi na vhuhulu na vhugala na vhurena. ₁₉O mu hudza lwe vhathu vha tshakha dzoṱhe na matsinde oṱhe na nyambo dzoṱhe vha tetemela nga nyofho phanḓa hawe: o vha a tshi vhulaha ane a tou funa, a litsha ane a tou funa, a hudza ane a tou funa, a ṱukufhadza ane a tou funa. ₂₀Huno o sudzuluswa vhuhosini a bvulwa vhugala nge a ḓihudza, a vha na tshipimbi na tshiṱuhu, ₂₁a thathelwa kule na vhathu, mbilu yawe ya tou vha ya phukha tshoṱhe, a dzula na dzimbiḓi, a fula hatsi unga phulu, muvhili wawe wa welwa nga ṅwando, u swika a tshi ḓivha uri a no vhusa mivhuso ya vhathu ndi Waṱaḓuluṱaḓulu, Ene u vhea ane a funa uri a i vhuse. ₂₂Hone vhone Vho-Beleshatsara vhane vha vha ṅwana wa Nebukhadnetsara a vho ngo ḓiṱukufhadza, naho zwoṱhe hezwo vha tshi zwi ḓivha. ₂₃Vho nyadza Muṋe wa makole, vho ri midzio ya thembele yawe i ḓiswe ha vhone, vhone na magota avho na vhafumakadzi vhavho na vhasadzi vhavho vha dziphuli vha nwa waini ngayo, vha renda midzimu ya musuku na siliva na musinaseṱha na tsimbi, na thanda na matombo, i sa vhoni, i sa pfi, i sa ṱalukanyi tshithu, vha litsha u hulisa Mudzimu Ene a no vha ṋea mufemo a langa zwoṱhe zwine vha ita, nga tshanḓa tshawe. ₂₄Ndi zwe a ruma tshanḓa, tsha ṅwala maipfi haya. ₂₅Zwo ṅwalwaho zwi ri: minee, minee, thekhele pharasini. ₂₆Ayo maipfi a amba hezwi: minee (Mbalo): Mudzimu o vhala maḓuvha a vhuhosi havho a vhu fhelisa. ₂₇thekhele (Tshikalo): Vho vhewa nṱha ha tshikalo vha wanala vha tshi leluwa. ₂₈pherese (Phandekanyo): Muvhuso wavho wo fhandekanywa wa kovhekanywa Vhamedia na Vhapheresia.” ₂₉Beleshatsara a mbo ḓi ri Daniele a ambadzwe dza muridili, a ambadzwe na geḓane ya musuku mukuloni, hu ḓivhadzwe uri o vhewa kha vhuimo ha vhuraru muvhusoni. ₃₀Vhusiku honoho Beleshatsara khosi ya Vhakhaladia a mbo ḓi vhulawa. ₃₁Dariosi wa Mumedia o dzhia muvhuso e na miṅwaha ya 62.