DOTORONOMIO 26

₁“Musi ni tshi swika shangoni ḽine Muṋe washu Mudzimu waṋu a ni ṋea uri ni ḽi dzhie ḽi vhe ḽaṋu, na dzula khaḽo, ₂ni fanela u dzhia zwiranzhe zwoṱhe zwa zwine na kaṋa shangoni ḽaṋu ḽine Muṋe washu Mudzimu waṋu a ni ṋea, na zwi vhea tshirunduni, na ya fhethu hune Muṋe washu Mudzimu waṋu a khethela dzina ḽawe, ₃na swika ha tshifhe ane ḽa ḓo vha ḽi diso ḽawe heḽo ḓuvha na mu vhudza na ri, ‘Ndi khou bula ṋamusi phanḓa ha Muṋe washu Mudzimu wau uri ndo dzhena shangoni ḽe Muṋe washu a fulufhedzisa vhomakhulukuku washu uri u ḓo ri ṋea.’

₄“Ndi hone tshifhe a tshi fanela u dzhia tshirundu kha iwe a tshi vhea fhasi phanḓa ha aḽiṱari ya Muṋe washu Mudzimu waṋu, ₅iwe wa konou bula phanḓa ha Muṋe washu wa ri, ‘Khotsi anga o vha e Muaramu a tendelekaho na shango. Vha tsela Egipita vhe vhathu vha si gathi vha dzula hone vha vhuya vha vha lushaka luhulu lwa maanḓa a sa konadzei. ₆Ndi hone Vhaegipita vha tshi ri itela tshiṱuhu vha tou ri kandeledza vha ri shumisa mushumo u lemelaho. ₇Riṋe ra ṱavhela Muṋe washu Mudzimu wa vhomakhulukuku washu mukosi, a ri pfa, a vhona u tambula hashu na u shengela hashu na u kandeledzwa hashu, ₈Muṋe washu a ri pfulusa Egipita nga maanḓa mahulu a sa konadzei na nga mishumo mihulu i ofhisaho na nga zwiga na maḓembe, ₉a ri ḓisa fhano a ri ṋea shango heḽino, shango ḽi elaho mukhaha na ṋotshi. ₁₀Zwino-ha nṋe ndo ḓisa zwiranzhe zwa zwe nda kaṋa masimuni khezwi, ndi zwe Muṋe washu a nṋea.’ Wo no ralo wa konou zwi vhea phanḓa ha Muṋe washu Mudzimu wau wa mu gwadamela wa mu luvha, ₁₁wa ḓiphiṋa nga zwivhuya zwoṱhe zwe Muṋe washu Mudzimu wau a ṋea muṱa wau – iwe na Vhalivi vhane wa dzula navho.

₁₂“Misi yoṱhe hó fhela miṅwaha miraru musi u tshi bvisa tshafumi tsha zwoṱhe zwe wa kaṋa, u ḓo zwi ṋea Vhalivi na vhatsinda na tsiwana na tshilikadzi uri vha kone u ḽa-vho miṱani yaṋu vha fure. ₁₃Zwenezwo u ḓo fanela u bula phanḓa ha Muṋe washu Mudzimu waṋu wa ri, ‘Ndo dzhia zwoṱhe zwo khethelwaho Muṋe washu muṱani wanga nda zwi kovhela Vhalivi na vhatsinda na tsiwana na tshilikadzi ndi tshi khunyeledza ndaela dzau dzoṱhe dze wa nndaya, a hu na na ndaela ye nda pfuka kana nda i hangwa. ₁₄A tho ngo ḽa tshafumi ndi tshi khou lila mufu, a tho ngo zwi bvisa muṱani wanga ndó kumala, a tho ngo zwi ṋekedza midzimu ya vho faho, ndo thetshelesa zwe Muṋe washu Mudzimu wanga a amba, ndo tevhedza zwoṱhe zwe a nndaya. ₁₅Zwino-ha, edzou nndavhelesa u ṱaḓulu vhudzuloni hau vhukhethwa, u shudufhadze lushaka lwau lwa Israele na shango ḽe wa ri ṋea unga wo fulufhedzisa vhomakhulukuku washu, shango ḽi elaho mukhaha na ṋotshi!’ ”

₁₆Ndi hone Mushe a tshi ri, “Ṋamusi ḽino Muṋe washu Mudzimu waṋu u khou ni laya uri ni tevhedze milayo hei yoṱhe na ndaela idzi dzoṱhe, ni dzi vhulunge ni dzi khunyeledze nga mbilu yoṱhe na nga zwoṱhe zwine na vha zwone. ₁₇Ṋamusi no bula na ri Yahavee ndi Ene Mudzimu waṋu, na ri ni ḓo tshimbila nḓilani dzawe, na vhulunga milayo yawe na ndayo dzawe na ndaela dzawe, na thetshelesa zwine a amba. ₁₈Muṋe washu Ene a bula uri ni ḓo vha lushaka lwawe vhukuma unga o ni vhudza, a ri ni vhulunge milayo yawe yoṱhe, ₁₉a ri u ḓo ni ṋea vhuhulwane na fhira tshakha dzoṱhe, na khoḓwa, na vha na bvumo na vhugala, na vha lushaka lukhethwa lwa Muṋe washu Mudzimu waṋu unga o ni fulufhedzisa.”