MUFUNZI 10

₁Thunzi dzo faho dzi tshinya mapfura a nukhelelaho u ḓifha, a vho nukha; vhutsilu vhuṱukuṱuku vhu tshinya vhuṱali na khuliso.

₂Mbilu ya muṱali yo tshingamela kha zwivhuya, ngeno ya tsilu yo tshingamela kha zwo vhifhaho. ₃Vhutsilu hawe vhu ḓo vhonwa na nga vhane a ṱangana navho nḓilani; u sumbedza muṅwe na muṅwe uri ene u tsilu.

₄Arali muvhusi a u sinyutshela, u songo ṅala mushumo; milandu mihulu i nga ḓi hangwelwa arali wa dzika.

₅Vhuṅwe vhuvhi he nda vhu vhona fhano fhasi ha ḓuvha ngovhu – ndi vhuvhi vhu no itwa nga vhavhusi: ₆Matsilu vha anzela u ṋewa vhuimo vhuhulwane, ngeno vhaḓivhalea vha tshi nga a vha vhoniwi, ₇nda vhona phuli dzo namela bere, vhavhusi vha tshi tshimbila nga milenzhe unga dziphuli.

₈Khunḓa i fasha muvei; wa pwasha mutsheṱo wa phuletshedza u tshi ṱoḓa u tswa, u nga ḓi lumiwa nga ṋowa. ₉Wa kungulusa matombo a a u huvhadza; wa fhanza khuni u a huvhala.

₁₀Arali mbaḓo yau ya gomala wa si i ṱuṱule, u tshi rema ngayo u tou vusa nungo dzoṱhe, hone we a ṱalifha nga zwe a vhona u ḓifhungudzela vhuleme. ₁₁Arali wa litsha ṋowa ya thoma u u luma u sa athu i phuphudza, u i phuphudza a zwi tsha farisa tshithu.

₁₂Zwine muṱali a amba zwi ita uri a takalelwe, ngeno tsilu ḽi tshi ḓilozwa nga zwiambo zwaḽo. ₁₃U thoma u amba zwi songo ḓaho, a fhedza nga u amba zwa tshipengo vhukumakuma; ₁₄tsilu ḽi tshi amba a ḽi fhumuli.

A hu na a no ḓivha uri hu ḓo bvelela mini; ndi nnyi ane a nga ri vhudza zwi no ḓo itea ro no fa? ₁₅Tsilu ḽi ḓinetisa nga u lopola haḽo, ḽi sa tsha wana nungo dza u ya hayani.

₁₆Arali khosi ya shango e mutukana, vhavhusi vhaḽo vha tshi ita minyanya hu tshee nga matsheloni, ḽeneḽo shango ḽi khomboni. ₁₇Shango ḽa mashudu ndi ḽine khosi yaḽo ya kona u humbula ya fhedza, na vhavhusi vhaḽo vha ḽa nga tshifhinga tsho teaho, vha kona u ḓifara sa vhanna vha si kambiwe.

₁₈Arali muthu a tshi bvafha u fulela nnḓu yawe, i ḓo na, ṱhanga ya mbombomela nga mulandu wa u teledza hawe.

₁₉Zwiḽiwa zwavhuḓi zwi a takadza; waini i ḓisa dakalo; ú na tshelede u a zwi wana zwoṱhe.

₂₀U songo nyefula khosi, naho hu nga mbilu; u songo nyefula mupfumi naho u nḓuni yau, tshiṋoni tshi sa ḓo vha vhudza zwe wa amba.