Vha fulufhelaho vho fulufhedziswa vhuawelo
1Zwiḽa zwe Mudzimu a ri fulufhedzisa zwauri ri ḓo dzhena hune a ḓo ri awedza zwi tshee zwo ralo. Zwenezwo ni vhone uri hu si vhe na muṅwe waṋu ane a kundwa u dzhena. 2Na riṋe ro pfa mafhungo maḓifha sa vhenevhaḽa. Hone naho vho a pfa ho ngo vha farisa tshithu ngauri a vho ngo a ṱanganedza nga lutendo. 3Vhane vha ḓo dzhena hune Mudzimu a ḓo vha awedza ndi riṋe fhedzi vhane ra mu fulufhela, sa zwe ha pfi,
“Ndo ana ndo sinyuwa nda ri,
‘Vha nga si dzhene
he nda vha ndi tshi ḓo vha awedza!’ ”
Mudzimu o ralo naho o ri u sika shango mishumo yawe ya vha yo fhela. 4A thi ri huṅwe Maṅwalo a tshi amba ḓuvha ḽa vhuṱanu na vhuvhili a ri, “Mudzimu o awela nga ḓuvha ḽa vhuṱanu na vhuvhili a si tsha shuma tshithu,” 5ngeno afha hu tshi dohwa ha pfi, “Vha nga si dzhene he nda vha ndi tshi ḓo vha awedza!” 6Vho thomaho u pfa mafhungo maḓifha vho landula Mudzimu, ndi zwe vha sa dzhene he a vha a tshi ḓo vha awedza. Hone hu na vhaṅwe vhane vha nga dzhena. 7Ndi zwe ha ri ho no fhela miṅwaha minzhi Mudzimu a dovha a vhea ḽiṅwe ḓuvha ḽi no pfi “ṋamusi.” Ndi amba fhaḽa he a amba nga Dafita, nga eneaḽa Maṅwalo e ra a bula ane a ri,
“Ṋamusi ni tshi pfa ipfi ḽa Mudzimu
ni songo ita tshipimbi.”
8Ngavhe Joshua a dzhenise vhathu vhuaweloni, ndi musi Mudzimu a sa ḓo ri ngavhuya a dovha a amba zwa ḽiṅwe ḓuvha. 9Zwenezwo vhathu vha Mudzimu vha kha ḓi vha na vhuawelo ho vha lindelaho ngei phanḓa. 10Ndi uri ane a dzhena hune Mudzimu a mu awedza u litsha mishumo yawe a awela sa zwe Mudzimu a litsha yawe a awela. 11Zwino-ha nga ri lwise nga nungo dzoṱhe u dzhena hune Mudzimu a ḓo ri awedza. Hu songo vhuya ha vha na muthihi washu ane a nyadza Mudzimu unga vhaḽa vho mu nyadza, vha vho fa nḓilani.
Ipfi ḽa Mudzimu ndi banga
12Ipfi ḽa Mudzimu ḽi a tshila, ḽi a shuma, ḽi na vhuhali vhu fhiraho ha banga ḽa mutsheahoṱhe, ḽi swika hune muhumbulo na muya na zwiendanungo na mwongo zwa ṱangana, ḽi khethekanya nyemulo na mihumbulo ya mbilu dza vhathu. 13A hu na na tshisikwa tshine tsha nga mu dzumbama, zwoṱhe zwi khagala phanḓa ha onoyo ane a ri sengisa, zwa nga zwo vhambelwa u shidzhwa.
Yesu Tshifhe Muhulu
14Ri na Tshifhe Muhulu a re muhulwane o no fhiraho vhukati ha maṱaḓulu, Ene Yesu Murwa wa Mudzimu, kha ri nambatele-ha lutendo lwe ra bula. 15A ri na tshifhe muhulu a kundwaho u ri pfela vhuṱungu a tshi vhona u shaya nungo hashu, aiwa, na Ene muṋe o lingwa unga riṋe nga nḓila dzoṱhe; phambano ndi nthihi fhedzi: Ene o vha a si na vhutshinyi. 16Kha ri sendele-ha tsini ha khuluṋoni ya Mudzimu, hune ra ṱanganedzwa nga vhuthu, ri sendele ri sa timatimi, uri ri kone u itelwa tshilidzi na vhuthu, ri lamulelwe musi ro hanganea.
