HOSIA 8

₁Muṋe washu u ri, “Lidzani phalaphala! Goni ḽi khou fhufha nṱha ha Israele nnḓu ya Yahavee. Ndi nge vhathu vha vhofholola mulanga wanga vha shandukela mulayo wanga. ₂Vha lilela Nṋe vha ri, ‘Yahavee Mudzimu washu, ri a u tenda! Hufha ri Israele vhathu vhau!’ ₃Hone vho nengwa zwine zwa vha zwivhuya; ndi zwone, maswina avho a ḓo vha tovhola.

₄“Vho vhea mahosi e nda sa vha tele. Vha nanga vhavhusi ndi songo vha tendela. Vha dzhia siliva na musuku vha ḓivhumbela mudzimu ngazwo uri vha zwi tambise. ₅Inwi Vhasamaria, mudzimu waṋu wa mbohwana u a nnengisa! Mbiti dzanga dzi tou vha dugela. Vha ḓo kundwa u ita zwo kunaho u swika lini? ₆Itsho tshithu tshi na mushumo-ḓe kha ḽa Israele? Hufha tsho itwa nga mutsila, tshi nga si vhe Mudzimu. Heyo mbohwana ya Samaria i ḓo tshakekana. ₇Vha no zwala muya vha ḓo kaṋa tshiḓumbumukwe. Mavhele avho ha nga sheli thoro, ha nga vhi na vhukhopfu. Nangwe a shela thoro a ḓo ḽiwa nga vhatsinda. ₈Vhaisraele vho miliwa, tshakha dzi vho vha vhona, vha nga tshithu tshi si na mushumo, ₉ngauri vho yo ṱoḓa u fariswa nga Ashuru. Mbiḓi i tshimbila na dzimbiḓi, hone Efraimi o tou ṋea vhafunwa vhawe malamba a vhupombwe. ₁₀Hone nangwe vha tshi nga wana malamba aho vhone vhaṋe, musi ndi tshi vha kuvhanganyela tsengoni vha songo fulufhela uri zwi ḓo vha nakela musi khosi ya vhavhusi khosi ya Ashuru i tshi vha haṱula.

₁₁“Naho vhathu vha Efraimi vho fhaṱa aḽiṱari dzi si na mbalo dza u pfumelela vhutshinyi, zwino dzo no sokou vha dza u engedza hone vhutshinyi. ₁₂Ndo vha ṅwalela ndaela dzi si na mbalo, hone vha si zwi londe, vha zwi ita zwa vhatsinda. ₁₃Vha tshi ṋekedza zwiṱhavhelo vha itwa nga vhupangwa fhedzi; vha ri vha ḓo ḽa ṋama; Nṋe a zwi ntakadzi. Zwino ndi ḓo elelwa vhuvhi havho, vha ḓo rwelwa vhutshinyi havho; ndi ḓo vha humisela Egipita. ₁₄Vhaisraele vho hangwa Muvhumbi wavho vha ḓifhaṱela dzipfamo. Vhathu vha Juda vho tingeledza miḓi minzhi nga mitsheṱo. Hone miḓi yavho ndi ḓo i fhisa nga mulilo, u ḓo fhisa mitsheṱo yayo.”