YESAYA 15

Muḓi wa Ara u re Muaba wo phusukanywa,

wo lozwiwa nga vhusiku vhuthihi fhedzi!

Muḓi wa Kiri u re Muaba wo phusukanywa,

wo lozwiwa nga vhusiku vhuthihi fhedzi!

₂Vhathu vha Diboni vha khou gonya thembeleni;

vha raha mivhundu vha yo ṋekedza zwiṱhavhelo

vha tshi lila;

vhathu vha Muaba vha gonya Nebo vha honḓa,

vha ima Medeba vha tshema.

Vho palula ṱhoho,

vho vheula ndebvu nga u pfa vhuṱungu.

₃Vhathu magondoni vho ambara madzanganda,

vha honḓa vhe nṱha ha ṱhanga dza nnḓu,

vha rothisa miṱodzi na mikotoni.

₄Vhathu vha Heshebono na Eliali vha ṱavha mukosi,

tshililo tshavho tshi pfala u swika Jahatsi.

Vhahali vha Muaba vha ṱavha mukosi nga nyofho,

a vha tshee na nungo.

₅Mbilu yanga i lilela Muaba;

ḽi nga kholomo ya miṅwaha miraru i sa tendi u hwala dzhogo,

i vho shavha ya vhuya ya swika Tsuara;

vha gonya mabama vho livha Luhithi,

vha tshimbila vha tshi lila;

vhaṅwe vha shavhela Horonaimi vha tshi tou gomela

nga u vhona ndozwo.

₆Zwisima zwa Nimirimu zwo xa,

hatsi ha puta,

miri ya fa,

a hu tshee na tshidala tsho salaho;

₇vhathu vha wela Govha ḽa Miṋengeledzi

vha tshi linga u shavha na thundu dzavho dzo salaho;

₈hoṱhe-hoṱhe masakhani a Muaba

hu pfala mukosi wa tshililo tshavho;

u honḓa havho hu pfala u swika Egilaimi;

tshigomelo tshavho tsha pfala na Bieri Elimu.

₉Ngei Dimoni mulambo wo tswuka nga malofha,

fhedzi hu kha ḓi ḓo ḓa zwihulu;

ee, vhoṱhe vho salaho Muaba vha ḓo vhulawa nga dzindau,

ha pondwa vho salaho shangoni.