YESAYA 46

₁Bele na Nebo,

inwi midzimu ya Babele!

No vha no fanela u hwala lushaka lwaṋu,

hone zwino inwi vhaṋe no kulea nungo na khothea!

Midzimu ye ya vha i tshi hwalwa nga vhathu

zwino yo no hweswa donngi na kholomo;

ndi muhwalo u lemelaho zwifuwo.

₂Yoṱhe yo kulea nungo ya khothea;

na zwifanyiso zwayo a i koni u zwi hwala;

na yone iṋe i hwalwa ya iswa vhuthubwani!

“Nthetsheleseni inwi vha muṱa wa Jakopo,

noṱhe inwi no salaho muṱani wa Israele!

Ndo ni tika ni tshee muvhilini wa mme aṋu,

nda ni hwala tshee na bebwa.

₄Mudzimu waṋu ndi Nṋe,

ndi ḓo ni hwala

na vhuya na vha vha maḓuvha na tshena mmvi.

No vhumbwa nga Nṋe,

ni ḓo takulwa nga Nṋe;

ndi ḓo ni tika nda ni lamukisa.

₅“Ni ḓo mpfanyisa na nnyi?

Ni nnyeḓanyisa na nnyi?

Ndi nnyi a no fana na Nṋe ane nda nga vhambedzwa nae?

₆Vhathu vha vula zwipatshi zwavho vha shulula musuku,

vha kala siliva nga zwikalo,

vha rendela mufuli wa musuku a vha fulela mudzimu,

vha konou gwadama vha u luvha.

₇Vha u takulela mahaḓani avho vha u hwala,

vha u vhea vhudzuloni hawo, wa ima henefho;

a u koni u sudzuluwa hune wa vha hone!

Naho muthu a u ṱavhela mukosi, a u fhinduli;

a u koni u mu tshidza khomboni.

₈Edzonu zwi elekanya ni dzivhuluwe!

Zwi dzheniseni mbiluni,

mashandukwa ndinwi!

₉Elelwani zwe nda ita kale:

tendani uri ndi Nṋe Mudzimu ndi ndoṱhe,

a hu na muṅwe a no nga Nṋe.

₁₀U bva mathomoni ndo dzula ndo amba

zwine zwa ḓo vha hone;

kale-kale zwi sa athu itea ndo dzula ndo zwi bula.

Nzudzanyo dzanga dzi nga si kundwe,

ndi ḓo ita zwoṱhe zwine nda tama u zwi ita.

₁₁Ndi khou vhidza munna a no bva vhubvaḓuvha;

u ḓo fhufha unga lurwanzhivha a tshi bva shangoni ḽa kule,

a khunyeledza zwe nda dzudzanya.

Zwe nda amba ndi ḓo zwi ita,

zwe nda dzudzanya ndi ḓo zwi bveledza.

₁₂“Thetshelesani inwi vhadzia-u-sa-pfa

vhane na vhona unga gundo ḽi kule!

₁₃Ḓuvha ḽa gundo ndi khou ḽi sendedza tsini,

a ḽiho kule;

gundo ḽanga a ḽi nga dzindelwi nga tshithu;

ndi ḓo tshidza Tsioni,

vhugala hanga nda vhu ṋea Israele.”