YESAYA 47

“Iwe Babele,

musidzana wa ndeṅwa,

itsa kha khuluṋoni yau u dzule buseni ḽa mavu;

iwe musidzana wa Mukhaladia,

a u tsha ḓo pfi u mutete, u a tata.

₂Dzhia lwala u kuye vhukhopfu,

bvula ṅwenda we wa khurumela,

ganya musisi wau,

ṱangula milenzhe u wele milambo.

₃Ḓiṱangule vhathu vha u vhone wo sala fhedzi;

ndi ḓo lifhedza,

a thi nga sii na muthihi.”

₄Mutshidzi washu ndi Mukhethwa wa Israele;

u pfi Muṋe washu Mulangazwoṱhe!

₅“Dzula ho tou tshete,

u kokovhe u dzhene swiswini,

iwe musidzana wa Mukhaladia;

a u tsha ḓo pfi mufumakadzi wa mivhuso!

₆Ndo vha ndo sinyutshela vhathu vhanga,

nda vha fara unga a vha tshee vhanga,

nda vha kumedza zwanḓani zwau,

iwe wa si vha khathutshele,

na vho no vhaho vha maḓuvha wa vha hwesa dzhogo i gogonaho.

₇Wo vha u tshi vhona unga u ḓo ḓi dzula u mufumakadzi,

hezwi zwithu wa si vhuye wa zwi dzhenisa mbiluni,

kana wa elekanya uri zwi ḓo fhela hani.

₈“Edzou thetshelesa, iwe mudzia-u-funa-miḓifho,

u vhona unga wo tshila,

wo tsireledzea,

wa ri, ‘Muthu ndi nṋe,

a hu tshee na muṅwe a no nga nṋe!

A thi nga vhuyi nda vha tshilikadzi kana nda felwa nga vhana!’

₉Ndi zwone, kathihi fhedzi, nga ḓuvha ḽithihi,

zwoṱhe hezwo vhuvhili hazwo zwi ḓo itea –

naho u na manditi mangafhani,

wo kungela phamba dzi sa fheli,

u ḓo felwa nga munna na vhana, ha si sale na muthihi.

₁₀Wo vha u sa ofhi tshithu naho u vhuvhini hau,

u tshi ri a u vhonwi nga muthu,

mathina vhuṱali hau na nḓivho yau zwo u xedza,

wa ri, ‘Muthu ndi nṋe, a hu na muṅwe a no nga nṋe!’

₁₁U ḓo welwa nga khombo,

manditi au a nga si i thivhele;

u ḓo welwa nga phanzi i sa pfumelwi;

u ḓo tshenuwa wo phusukanywa ú songo humbula!

₁₂Fulufhela manditi au-ha na phamba dzau dzoṱhe

dze wa ḓinetisa ngadzo u bva hanani hau;

khamusi dzi ḓo u farisa;

khamusi dzi ḓo shushedza maswina au.

₁₃Wo ḓinetisa nga nyeletshedzo dzoṱhe dze wa dzi wana –

ndi zwone, vhabvumbi vhau nga vha bvele khagala,

havho vhaḓivhi vha zwa dziṋaledzi vhane vha u bvumbela

ṅwedzi nga ṅwedzi,

vha u tshidze kha zwine zwa u wela.

₁₄“Vha ḓo tou nga mathukhwi;

vha ḓo fhiswa nga mulilo;

a vha nga koni u ḓitshidza khavhuni dza mulilo;

hayo a si masimbe a vhududo,

a si mulilo wa u ora.

₁₅Zwine zwa ḓo itea ngezwi:

havho vhe wa ḓinetisa u tshi shumisana navho,

ni tshi vhambadzelana u bva hanani hau,

vha ḓo u ṱutshela vhoṱhe,

muṅwe na muṅwe a fara yawe nḓila;

a hu na ane a ḓo sala a tshi u tshidza!”