JUDITHI 1

₁Wo vha u ṅwaha wa fumi na vhuvhili (12) wa muvhuso wa khosi Nebukhadinetsara, a tshi vhusa Vhaashuru muḓini muhulu wa Ninive. Misi yeneyo Ariphakhadi o vha a tshi khou vhusa Vhamedia muḓini wa Ekhibathana. ₂A fhaṱa mutsheṱo wa matombo u mona na muḓi wonoyo, tombo ḽiṅwe na ḽiṅwe ḽi na vhulapfu ha mitha tharu na vhuphara ha mitha na hafu. Mutsheṱo uyo vhulapfu hawo u ya nṱha wo vha u mitha dza mahumi mararu na ṱhanu (35), vhudenya u mitha dza mahumi mavhili na ṱhanu (25). ₃Dzikhoroni a fhaṱa thawara dza vhulapfu ha mitha dza mahumi maṱanu (50) u ya nṱha, tsindeni dza vha na vhudenya ha mitha dza mahumi mararu (30). ₄Dzigethe dza ita vhulapfu ha mitha dza mahumi mararu na ṱhanu (35) u ya nṱha, miṋango ya ita mitha dza mahumi mavhili (20) u aṱama hayo uri mmbi dzawe dzi kone u bva ngayo dzo vhambela, vha tshimbilaho nga ṋayo vha kone u bva na u dzhena vha sa thithiswi nga tshithu. ₅Zwino misi iyo khosi Nebukhadinetsara a bva pfumo a yo lwa na khosi Ariphakhadi mudavhini, muvhunduni wa Ragae. ₆A phalalwa nga vhathu vhoṱhe vha dzinguni ḽa zwivhangani, vhoṱhe vha no dzula u tsa na milambo ya Yufuratha na Thigirisi na Hidasipese, na khosi Ariokho wa Vhaelamu, henefho mudavhini. Ndi uri ho kuvhangana tshakha nnzhi u ḓa u lwa nndwa ya Vhakhaladia.

₇Zwino Nebukhadinetsara khosi ya Vhaashuru a ruma vhaḓinḓa vha livha kha vhadzulapo vhoṱhe vha Pheresia, na kha vhoṱhe vha dzulaho mashangoni a vhukovhela: Kilikia na Damasko, Libanoni na Anthilibanoni, kha vhoṱhe vha dzulaho u navha na khunzikhunzi ya lwanzhe, ₈tshakha dza Kharamele, Giliadi, Galelia Nṱha, na mudavhini woṱhe wa Esdreloni, ₉kha vhoṱhe vha re Samaria na miḓini yaḽo, na vhukovhela ha Jorodani u vhuya u swika Jerusalema, Bethani, Khelousi, Kadeshe, na mulambo wa Egipita, u ya Thaphanese, Ramisese, na shango ḽoṱhe ḽa Gosheni, ₁₀Thanisi, Memfisi na u fhira, na kha vhoṱhe vha dzulaho Egipita u vhuya u swika masakhani a Ethopia.

₁₁Hone vhathu vha dzulaho shangoni iḽo ḽoṱhe vha si zwi londe musi vha tshi rambwa nga Nebukhadinetsara khosi ya Vhaashuru, vha si mu phalale a tshi ya nndwani. Vho vha vha sa mu ofhi, vha tshi mu sedza sa muthu a re eṱhe o imedzanaho navho, vha humisa vhaḓinḓa vhawe vha si na tshithu, vho shona. ₁₂Ndi hone Nebukhadinetsara a tshi sinyutshela vhathu vha mashango ayo oṱhe, a ana nga khuluṋoni yawe na muvhuso wawe uri u ḓo lifhedza vha mashango ayo oṱhe a Kilikia na Damasko na Siria, na vhoṱhe vha dzulaho Muaba, Amoni, ḽa Judia ḽoṱhe, na vhoṱhe vha dzulaho ngafhi na ngafhi kha ḽa Egipita u vhuya u swika masakhani a malwanzhe ayo mavhili, a ita na u ana uri u ḓo vha lozwa nga pfumo.

₁₃Nga ṅwaha wa fumi na vhuṱanu na vhuvhili a bva pfumo na mmbi yawe u yo lwa na khosi Ariphakhadi, a mu kunda. A shakulisa mmbi yoṱhe ya Ariphakhadi, na vhanameli vha dzibere vhoṱhe na gariki dzawe dzoṱhe, ₁₄a thuba miḓi yawe yoṱhe. A livha Ekhibathana, a thuba thawara dzawo, a ṱangula fhethu ha makete, vhugala hayo a vhu shandula ṱhoni. ₁₅Ariphakhadi ene muṋe a mu fara thavhani dza Ragae, a mu runga nga pfumo, a mu lozwa tshoṱhe. ₁₆Ndi hone a tshi humela hayani na gogo ḽoṱhe ḽa vhahali vhe vha mu phalala: mmbi khulu-khulu ya vhahali. Henefho ene na mmbi yawe vha awela, vha ita vhuṱambo vha ḽa vha nwa ha vhuya ha fhela maḓuvha a ḓana na mahumi mavhili (120).