JUDITHI 3

₁Ndi hone vha tshi ruma vhaḓinḓa vha ya ha Holofenese vha humbela uri ḽi lale vha ri, ₂“Riṋe ri vhalanda vha Nebukhadinetsara khosi khulwane, ro tou shuvhama mavuni phanḓa havho. Nga vha ri ite zwine vha funa. ₃Pfulo yashu na masimu ashu oṱhe, na a goroi, maṱambi ashu a nngu na kholomo, na zwitumba zwa nngu na dennde dzashu ndi zwavho, nga vha ite zwine vha funa ngazwo. ₄Miḓi yashu na vha dzulaho khayo ndi zwavho, nga vha ite zwine vha funa ngazwo.”

₅Musi vhaḓinḓa avho vho no swikisa mafhungo ayo ha Holofenese, ₆Holofenese a ṱuwa na mmbi yawe a tsela khunzikhunzi ya lwanzhe, a dzhia vhahali vhawe a yo vha vhea miḓini yoṱhe yo tingeledzwaho nga mitsheṱo. Kha vhenevho a vhumba mmbi ya vhanna vho nanguludzwaho uri vha vhe vhatikedzi vhawe. ₇Vhathu vha miḓi iyo na vhoṱhe vha dzulaho mashangoni o ṋekanaho masakha nayo vha mu ṱanganedza vho fara khare dza maluvha, vha tshi khou tshina, murumba u tshi ṱambela tshanḓa. ₈Nangwe zwo ralo, a phusukanya zwitembele zwavho, a remekanya miri yavho mikhethwa, ngauri o vha o ruṅwa uri a thuthe midzimu yoṱhe ya mashango oṱhe, uri lushaka luṅwe na luṅwe lu sale lu tshi luvha Nebukhadinetsara fhedzi, vhathu vha lushaka luṅwe na luṅwe na tsinde ḽiṅwe na ḽiṅwe vha mu rabela vha tshi nga vha rabela mudzimu. ₉Holofenese a vhuya a swika Esdreloni tsini na Dothani, ha vha u sendela tsini na muṱoḓo muhulwane wa thavha dza Judia. ₁₀A ṱoka mishasha yawe vhukati ha Geba na Skithopholisi a dzula henefho a fhedza ṅwedzi woṱhe a tshi khou lugisela mmbi yawe mbuvha.