JEREMIA 27

₁Musi Tsedekia ṅwana wa Josiasi khosi ya Juda a tshi kha ḓi bva u thoma u vhusa, ipfi ḽa amba na Jeremia ḽi tshi bva ha Muṋe washu: ₂Muṋe washu o mmbudza a ri, “Ḓivhaḓele dzhogo u i itele pfuṋelo dza nnzwa u i vhee mutsingani wau. ₃Zwenezwo u rume vhaḓinḓa vho ḓaho Jerusalema ha Tsedekia khosi ya Juda vha swikise mafhungo ha mahosi a Edomo na Muaba na Amoni na Tiro na Sidoni. ₄Vha vhudze vhaṋe vhavho uri, ‘Yahavee Mulangazwoṱhe Mudzimu wa Israele u ri: Vhudzani vhaṋe vhaṋu ni ri: ₅Ndi Nṋe ndo vhumbaho ḽifhasi na vhathu vhaḽo na phukha dzi re khaḽo nga maanḓa anga mahulu na nga tshanḓa tshó angalala; ndi ḽi ṋea ane nda funa. ₆Zwino mashango aṋu oṱhe ndi ḓo a ṋea gota ḽanga Nebukhadnetsara khosi ya Babele; ndi ḓo ita uri a vhuse na phukha dza ḓaka. ₇Tshakha dzoṱhe dzi ḓo shumela ene na ṅwana wawe na muḓuhulu wawe ha vhuya ha swika tshifhinga tshine shango ḽawe ḽa phusukanywa; ndi hone na ene a tshi vho ḓo vhuswa nga tshakha nnzhi na mahosi mahulwane.

₈“ ‘Huno arali luṅwe lushaka kana muṅwe muvhuso wa sa shumela Nebukhadnetsara khosi ya Babele, lwa sa tenda u ṋekedza mutsinga uri a lu vhee dzhogo, lwonolwo lushaka ndi ḓo lu vhulaha nga pfumo na nḓala na dwadze ndi vhuye ndi lu lozwe tshoṱhe nga tshanḓa tshawe. ₉Zwenezwo ni songo thetshelesa vhaporofita vhaṋu na mingome yaṋu na vhaṱalutshedzi vha miloro na vha no vhidza mimuya ya vho faho na ṅanga dzaṋu vhane vha ni vhudza vha ri: Ni nga si shumele khosi ya Babele. ₁₀Vha ni porofitela mazwifhi ane a ḓo ita uri ni thubelwe kule na mashango aṋu; ndi ḓo ni thatha na lovha. ₁₁Hone lushaka lune lwa ṋekedza mutsinga lwa vhewa dzhogo ya khosi ya Babele lwa mu shumela, lwonolwo lushaka ndi ḓo lu litsha lwa sala shangoni ḽalwo lwa lima masimu lwa dzula hone. Ho amba Nṋe Yahavee.’ ”

₁₂Na Tsedekia khosi ya Juda ndo mu fha ndaela yeneyo. Ndo ri, “Ṋekedzani mitsinga yaṋu ni vhewe dzhogo ya khosi ya Babele; shumelani ene na vhathu vhawe, ndi hone ni tshi ḓo tshila. ₁₃Iwe na vhathu vhau ni felani nga pfumo na nḓala na dwadze zwe Muṋe washu a ri zwi ḓo wela lushaka lune lwa sa ḓo shumela khosi ya Babele? ₁₄Ni songo thetshelesa maipfi a vhaporofita vhane vha ni vhudza vha ri, ‘A ni nga vhuyi na shumela khosi ya Babele’; vha khou ni porofitela mazwifhi. ₁₅Muṋe washu u ri, ‘A tho ngo vha ruma. Vha khou porofita mazwifhi nga dzina ḽanga. Na vha thetshelesa ndi ḓo ni thatha na lovha, khathihi na vhaporofita vhane vha khou ni porofitela.’ ”

₁₆Ndi hone ndi tshi vhudza na vhotshifhe na vhathu vhoṱhe nda ri, “Muṋe washu u ri, ‘Ni songo thetshelesa vhaporofita vhaṋu vhane vha ri: Hu si kale lupfumo lwa nnḓu ya Muṋe washu lu ḓo humiswa lu tshi bva Babele. Vha khou ni porofitela mazwifhi. ₁₇Ni songo vha thetshelesa. Inwi shumelani khosi ya Babele, ndi hone ni tshi ḓo tshila. Zwi farisani muḓi uyu u tshi ḓo sala u matumba? ₁₈Arali nangoho vhe vhaporofita, arali vhe na ipfi ḽa Muṋe washu, nga vha humbele Muṋe washu Mulangazwoṱhe uri thundu dzo salaho nḓuni ya Muṋe wa zwoṱhe na yo salaho pfamoni ya khosi ya Juda a re Jerusalema i si hwalwe-vho ya iswa Babele. ₁₉Muṋe washu u ri thikho na sambelo ḽihulu na zwigoloi na dziṅwe thundu dza thembeleni ni tshee nadzo fhano muḓini. ₂₀Nebukhadnetsara khosi ya Babele ho ngo ṱuwa nadzo zwiḽa a tshi kumba Jehoyakhini ṅwana wa Jehoyakimu khosi ya Juda a tshi bva Jerusalema a mu isa vhuthubwani Babele, e na vhahulwane vhoṱhe vha Juda na Jerusalema.’ ₂₁Hone zwino Muṋe washu Mulangazwoṱhe Mudzimu wa Israele a tshi amba nga zwithu zwo salaho nḓuni ya Muṋe washu na pfamoni ya khosi ya Juda na muḓini wa Jerusalema, u ri, ₂₂‘Na zwone zwi ḓo hwalwa zwa iswa Babele zwa dzula hone u swika ḓuvha ḽine nda ḓo zwi tevhelela. Ndi hone ndi tshi ḓo zwi dzhia nda zwi vhuedzedza hafhano fhethu. Ho amba Nṋe Yahavee.’ ”