JEREMIA 32

₁Ngeḽi fhungo ḽe ḽa ḓa ha Jeremia ḽi tshi bva ha Muṋe washu nga ṅwaha wa fumi wa musi khosi Tsedekia a tshi vhusa ḽa Juda, ú wa 18 wa muvhuso wa Nebukhadnetsara. ₂Zwenezwo mmbi ya khosi ya Babele yo vha i tshi khou govhela Jerusalema, muporofita Jeremia ó valelwa muṱani wa vhalindi vha pfamo ya musanda. ₃Tsedekia khosi ya Juda o vha o mu valela henefho, a tshi ri, “Ndi mini ni tshi porofita nga u ralo? Ni ri, ‘Muṋe washu u ri: Muḓi uyu ndi ḓo ṱuwa ndi tshi u kumedza khosi ya Babele ya u thuba. ₄Tsedekia khosi ya Juda a nga si ponyoke Vhakhaladia a shavha, tshawe hu ḓo tou vha u kumedzwa khosi ya Babele, a amba nae vho livhana zwifhaṱuwo, a mu vhona nga awe maṱo. ₅U ḓo hwala Tsedekia a mu isa Babele, a dzula hone ndi vhuye ndi ite zwine nda funa u mu ita. Nangwe a lwa na Vhakhaladia a nga si vha kunde. Ho amba Nṋe Yahavee.’ ”

₆Nga hetsho tshifhinga Jeremia a ri, “Ipfi ḽa Muṋe washu ḽo ḓa ha nṋe ḽa ri, ₇‘Hanamele ṅwana wa malume au Shalumu u ḓo ḓa ha iwe a ri: Rengani tsimu yanga i re Anathotho, vhunga inwi ni shaka ḽa tsini, zwo fanela uri inwi ni i rengulule.’

₈“Nangoho muzwala wanga Hanamele a ḓa ha nṋe henefho muṱani wa pfamo ya musanda nga he Muṋe washu a dzula o amba, a ri, ‘Rengani tsimu yanga i re Anathotho shangoni ḽa Benyamini; vhunga zwo ni fanela uri i vhe yaṋu, i rengululeni.’ Nṋe nda zwi ḓivha uri ipfi iḽo ndi ḽa Muṋe washu; ₉ndi hone ndi tshi rengulula iyo tsimu ya muzwala wanga Hanamele i re Anathotho, nda mu kalela tshelede i no ita mangwende a 17 a siliva. ₁₀Nda saina luṅwalo lwa pfano nda vhea luswayo, nda ṱoḓa ṱhanzi, nda kala iyo siliva tshikaloni. ₁₁Nda dzhia luṅwalo lwa vhuṱanzi ha u ri ndo renga – luṅwalo lwo swaiwaho lu re na pfano na nzudzanyo, na luṅwe lu si na luswayo – ₁₂nda lu ṋea Barukhu ṅwana wa Neria, ṅwana wa Maaseya, hu na muzwala wanga Hanamele na ṱhanzi dzo sainaho luṅwalo lwa pfano, na Majuda vhoṱhe vha re muṱani wa vhalindi vha pfamo ya musanda vha tshi zwi vhona, ₁₃nda laya Barukhu vha tshi zwi pfa nda ri, ₁₄‘Muṋe washu Mulangazwoṱhe Mudzimu wa Israele u ri: Dzhia maṅwalo haya vhuvhili hao, lwo swaiwaho na lu songo swaiwaho, a pfano na a thengiso, u a longe mvuvheloni ya vumba uri a si ṱavhanye u ṱahala. ₁₅Muṋe washu Mulangazwoṱhe Mudzimu wa Israele u ri: Hu ḓo dovha ha rengwa nnḓu na masimu na zwikovha zwa minḓirivhe shangoni heḽino.’

₁₆“Musi ndo no ṋea Barukhu ṅwana wa Neria ulwo luṅwalo lwa vhuṱanzi, nda rabela Muṋe washu nda ri: ₁₇Muṋe washu Muṋe wa zwoṱhe, wo vhumba ḽiṱaḓulu na ḽifhasi nga maanḓa au mahulu na nga tshanḓa tshau tshó angalala. A hu na tshine wa kundwa u tshi ita. ₁₈Vhathu vhane wa vha funa ndi zwigidi na zwigidi, hone wa rwa vhana u tshi vha rwela vhutshinyi ha vhokhotsi avho. Iwe u Mudzimu wa maanḓa a sa kondadzei, u pfi Muṋe washu Mulangazwoṱhe. ₁₉Nzudzanyo dzau dzo hula hani, mishumo yau a i konadzei. Maṱo au a vhona nḓila dzoṱhe dza vhathu; u pfufha muṅwe na muṅwe u tshi tevhedza kutshilele kwawe nga he zwa tea mishumo yawe. ₂₀Wo ita zwiga zwa maḓembe na zwimangadzo shangoni ḽa Egipita, na ṋamusi u kha ḓi zwi ita kha ḽa Israele na kha vhathu vhoṱhe, wa vha na bvumo, na ṋamusi. ₂₁Wo pfulusa vhathu vhau Israele wa vha bvisa Egipita nga zwiga na zwimangadzo nga tshanḓa tshau tsha maanḓa wó tshi angaladza nga maanḓa a ofhisaho. ₂₂Wo vha ṋea shango heḽino ḽe wa ana wa ri u ḓo ḽi ṋea vhokhotsi avho, shango ḽi no ela mukhaha na ṋotshi. ₂₃Vho dzhena vha ḽi dzhia ḽa vha ḽavho, hone a vho ngo u thetshelesa, a vho ngo tevhedza milayo yau, a vho ngo ita zwe wa vha vhudza uri vha zwi ite. Ndi zwe wa vha ḓisela khombo hei yoṱhe.

₂₄“Edzou vhona uri Vhakhaladia vho govhela hani muḓi, vha ṱoḓa u u dzhia. Muḓi u ḓo kumedzwa vhone vha no khou u dia nga pfumo na nḓala na dwadze. Zwe wa amba zwo itea unga zwino u tshi khou zwi vhona. ₂₅Naho muḓi u tshi ḓo kumedzwa Vhakhaladia, Muṋe wa zwoṱhe Muṋe washu, u mmbudza wa ri, ‘Renga tsimu nga siliva, mafhungo ayo a vhe na ṱhanzi.’ ”

₂₆Ndi hone Muṋe washu a tshi mphindula a ri, ₂₇“Ndi Nṋe Yahavee Mudzimu wa vhathu vhoṱhe. Hu na tshine tsha nkunda naa? ₂₈Zwenezwo, Nṋe Yahavee ndi ri: Hoyu muḓi ndi ḓo ṱuwa ndi tshi u kumedza Vhakhaladia na Nebukhadnetsara khosi ya Babele, a u thuba. ₂₉Vhakhaladia vhane vha khou dia hoyu muḓi vha ḓo u dzhena vha u fhisa nga mulilo; vha ḓo u fhisa we lore, vha fhisa na nnḓu he vhathu vha nṱunga nga u dubisela Baali zwioro nṱha ha ṱhanga dzadzo, vha dovha vha tevhulela midzimu thevhula henefho.

₃₀“Vhathu vha Israele na Juda tshe vha ita ndi tshi ḓi zwi vhona ndi vhuvhi fhedzi, u bva hanani havho; ngoho vhathu vha Israele tshe vha ita ho vha u nṱunga nga u rabela zwe vha ita nga zwanḓa zwavho. ₃₁Tshee hoyu muḓi wa fhaṱwa u swika zwino wa ḓi ṱunga mbiti dzanga wa ntsinyusa, lune nda fanela u u sudzulusa nda si tsha u vhona. ₃₂Vhathu vha Israele na Juda vho nṱunga nga vhuvhi hoṱhe he vha ita – vhone na mahosi avho na vhahulwane, na vhotshifhe vhavho na vhaporofita vhavho, vhanna vha Juda na vhathu vha Jerusalema. ₃₃Vho mpfuralela vha si tsha nndavhelesa; naho ndo vha funza nda dovha, a vho ngo thetshelesa kana vha ita zwe nda vha laya. ₃₄Vho vhea midzimu yavho ya zwifanyiso i nengisaho nḓuni ine ya pfi ndi yanga vha i shata tshika. ₃₅Vho fhaṱela Baali dziaḽiṱari Govhani ḽa Hinomu, uri vhana vhavho vha vhatuka na vha vhasidzana vha vha ite zwiṱhavhelo zwa Molekhe, naho ndi songo vha vhudza uri vha ite nga u ralo, na u zwi humbula ndi songo vhuya nda zwi humbula uri vha ite zwi no nengisa nga u ralo; zwe vha ita ho vha hu u tou itisa vhathu vha Juda tshivhi.

₃₆“Ni tshi amba muḓi uno ni ri, ‘U ḓo kumedzwa khosi ya Babele nga pfumo na nḓala na dwadze’; hone Nṋe Yahavee Mudzimu wa Israele ndi ri: ₃₇Vhukumakuma ndi ḓo kuvhanganya vhathu vhanga vha tshi bva mashangoni e nda vha balanganyela khao nga mbiti khulu ndo sinyuwa zwihulu; ndi ḓo vha vhuisa hafhano fhethu vha dzula vha sa ofhi tshithu. ₃₈Vha ḓo vha vhathu vhanga, Nṋe nda vha Mudzimu wavho. ₃₉Ndi ḓo vha ṋea mbilu nthihi na maitele mathihi uri vha dzule vha tshi nnyofha, zwi tshi vha nakela na vhana vhavho. ₄₀Ndi ḓo vhofha mulanga navho u no ḓo vha wa lini na lini: A thi nga vhuyi nda litsha u vha tonda, ndi ḓo vha ṋea mbilu ya uri vha nnyofhe, uri vha si tsha ntshandukela. ₄₁Ndi ḓo takalela u vha tonda, ndi a fulufhedzea, ndi ḓo vha sima shangoni ḽino nga mbilu yanga yoṱhe, vha ṱoka midzi.” ₄₂Muṋe washu u ri, “Ndi ḓo ḓisela vhathu avha zwivhuya zwoṱhe zwine nda vha fulufhedzisa, zwa nga zwiḽa ndi tshi vha ḓisela khombo khulu. ₄₃Hafhano shangoni heḽino ḽine inwi na ri, ‘Ndi soga ḽi sa dzuli muthu kana tshifuwo, ngauri ḽo kumedzwa Vhakhaladia,’ hu ḓo dovha ha rengwa masimu. ₄₄A ḓo rengwa nga siliva, ha sainwa vhuṱanzi, ha vhewa luswayo, ha vha na ṱhanzi fhano shangoni ḽa Benyamini na miḓini yo tangaho Jerusalema na miḓini ya Juda, na miḓini i re mivhunduni na i re thungo ya lwanzhe, na Negeve, ngauri ndi ḓo ita uri zwi dovhe zwi vha nakele. Ho amba Nṋe Yahavee.”