JEREMIA 42

₁Ndi hone vhahulwane vha mmbi vhoṱhe, khathihi na Johanani ṅwana wa Karia na Jesania ṅwana wa Hoshaya, na vhathu vhoṱhe, vhaṱuku na vhahulwane vha tshi ḓa ₂ha muporofita Jeremia vha mu humbela vha ri, “Nga vha dzou thetshelesa khumbelo yashu, vha rabele Muṋe washu Mudzimu wavho vha tshi rabelela tsalela hedzi dza vhathu dzoṱhe. Na vhone vha khou tou zwi vhona uri nangwe kale ro vhuya ra vha vhanzhi, zwino ro no tou sala ri vha si gathi. ₃Nga vha rabele uri Muṋe washu Mudzimu wavho a ri vhudze hune ra fanela u livha hone na zwine ra fanela u zwi ita.”

₄Muporofita Jeremia a fhindula a ri, “Ndo zwi pfa zwine na amba. Vhukumakuma ndi ḓo rabela Muṋe washu Mudzimu waṋu unga no humbela; ndi ḓo ni vhudza zwoṱhe zwine Muṋe washu a amba, a thi nga ni dzumbi tshithu.”

₅Zwenezwo vha amba na Jeremia vha ri, “Ngavhe Muṋe washu a tshi vha ṱhanzi i fulufhedzeaho ya ngoho, a ri vutshela arali ra sa tevhedza zwoṱhe zwine Muṋe washu Mudzimu wavho a vha ruma uri vha ri vhudze. ₆Arali zwi tshi takadza kana zwi sa takadzi, ri ḓo thetshelesa Muṋe washu Mudzimu washu ane ra khou vha ruma khae uri zwi ri nakele; ri ḓo thetshelesa Muṋe washu Mudzimu washu.”

₇Musi ho fhela maḓuvha a fumi ipfi ḽa Muṋe washu ḽa ḓa ha Jeremia. ₈Ndi hone a tshi vhidza Johanani ṅwana wa Karia na vhoṱhe vhahulwane vha mmbi vhe vha vha vhe nae na vhathu vhoṱhe, vhaṱuku na vhahulwane, a vha kuvhanganya. ₉A vha vhudza a ri, “Muṋe washu Mudzimu wa Israele we na nthuma khae uri ndi swikise khumbelo yaṋu, u ri, ₁₀‘Arali na dzula shangoni heḽi, ndi ḓo ni fhaṱa, a thi nga ni thuthi; ndi ḓo ni ṱavha, a thi nga ni tupuli, ngauri ndi pfa vhuṱungu zwe nda fanela u ni ḓisela khombo. ₁₁Ni songo ofha khosi ya Babele ane zwino na mu ofha. Ni songo mu ofha, Nṋe ndi na inwi, ndi ḓo ni tshidza nda ni vhofholola zwanḓani zwawe. Ho amba Nṋe Yahavee. ₁₂Ndi ḓo ni pfela vhuṱungu uri na ene a ni khathutshele mbilu a ni humisele shangoni ḽaṋu.’

₁₃“Hone arali na ri, ‘A ri nga dzuli shangoni ḽino,’ na litsha u thetshelesa Muṋe washu Mudzimu waṋu, ₁₄arali na ri, ‘Aiwa, ri ḓo pfulutshela Egipita, hune ra sa ḓo vhona nndwa kana ra pfa phalaphala ya nndwa kana ra pfa nḓala nga u shaya zwiḽiwa, ri yo dzula hone,’ ₁₅zwino ipfani ipfi ḽa Muṋe washu inwi tsalela dza vhathu vha Juda. Muṋe washu Mulangazwoṱhe Mudzimu wa Israele u ri, ‘Arali no ḓiimisela u ya Egipita, na pfuluwa na yo dzula hone, ₁₆zwenezwo pfumo ḽine na ḽi ofha ḽi ḓo ni ḽa henengei, na nḓala ine na i ofha i ḓo ni tevhela henefho Egipita, ni ḓo fela henengei. ₁₇Vhoṱhe vho ḓiimiselaho u pfulutshela Egipita vha yo dzula hone vha ḓo ḽiwa nga pfumo, vha fa nga nḓala na dwadze, a hu na na muthihi wavho a no ḓo sala a tshi tshila kana a ponyoka khombo ine nda ḓo vha ḓisela yone.’

₁₈“Muṋe washu Mulangazwoṱhe Mudzimu wa Israele u ri, ‘Vhunga mbiti dzanga na u sinyuwa hanga zwo shulutshela kha vha dzulalo Jerusalema, zwenezwo u sinyuwa hanga hu ḓo shulutshela kha inwi arali na ya Egipita. Vhathu vha ḓo ni sanda, vha ni nyadza, vha teketelana nga dzina ḽaṋu, vha ni sea; fhethu hafhano a ni tsha ḓo dovha na hu vhona.’

₁₉“Inwi tsalela dza vhathu vha Juda, Muṋe washu o ni vhudza a ri, ‘Ni songo ya Egipita.’ Ḓivhani uri: ṋamusi ndi a ni kaidza ₂₀ndi ri ni khou ḓifhura ni tshi nthuma ha Muṋe washu Mudzimu waṋu na ri, ‘Ri rabelele ha Muṋe washu Mudzimu washu; ri vhudze zwoṱhe zwine a amba, ri ḓo zwi ita.’ Ni ḓo ḓilozwa! ₂₁Ndo ni vhudza ṋamusi, naho zwo ralo a no ngo thetshelesa Muṋe washu Mudzimu waṋu kha tshithu na tshithihi tshe a nthuma uri ndi ni vhudze. ₂₂Zwino-ha, ḓivhani uri: Ni ḓo fa nga pfumo na nḓala na dwadze fhethu hune na tama u yo dzula hone.”