JOSHUA 19

₁Mukovhe wa vhuvhili wo kovhelwa tsinde ḽa Simioni zwi tshi tevhedza miṱa yavho. Shango ḽavho ḽo tangelwa ngomu nga shango ḽo kovhelwaho tsinde ḽa Juda. ₂Ho angaredza Bierisheba na Sheba na Mulada ₃na Hatsara Shuala na Bala na Etsemu ₄na Elitholadi na Bethuli na Horoma ₅na Tsikilaga na Bethe Marikhabotho na Hatsara Susa ₆na Bethe Lebaothi na Sharuheni. Ndi miḓi ya 13, khathihi na ḓorobo dzo i tangaho.

₇Ha dovha ha vha na Aini na Rimoni na Ethere na Ashani. Ndi miḓi miṋa, khathihi na ḓorobo dzo i tangaho. ₈Ha angaredza na ḓorobo dzoṱhe dzo tangaho iyo miḓi u vhuya u swika Baalathi Bieri (ndi Rama) thungo ya tshipembe. Ndi ḽone shango ḽe ḽa kovhelwa tsinde ḽa Simioni uri ḽi vhe ḽavho, zwi tshi tevhedza miṱa yavho. ₉Vhunga mukovhe wa Juda wo vha u muhulwane u tshi mu fhira, tshiṅwe tshipiḓa tsha shango ḽavho tsho ṋewa tsinde ḽa Simioni.

₁₀Mukovhe wa vhuraru wo kovhelwa tsinde ḽa Zebuloni zwi tshi tevhedza miṱa yavho. Shango ḽe vha kovhelwa ḽo guma Saridi. ₁₁U bva henefho masakha o livha vhukovhela a tshi ya Mareala, a kwama Dabeshethe na kudambo ku re vhubvaḓuvha ha Jokoniamu. ₁₂Siani ḽiṅwe ḽa Saridi a livha vhubvaḓuvha a tshi ya masakhani a Khisilotho Thaboro, a konou livha Daberatha, a gonya Jafia. ₁₃A fhirela phanḓa a tshi ya vhubvaḓuvha. U bva henefho a livha Gathi Hefere na Ethekatsini, a fhirela Rimoni a konou livha thungo ya Nea. ₁₄Thungo ya devhula masakha o livha Hanathoni a guma Govhani ḽa Ifithahele. ₁₅A angaredza Kathatha na Nahalala na Shimironi na Idala na Betlehema. Ndi miḓi ya 12, khathihi na ḓorobo dzo i tangaho. ₁₆Miḓi heyo na ḓorobo dzayo yo vha shangoni ḽe ḽa kovhelwa tsinde ḽa Zebuloni uri ḽi vhe ḽavho, zwi tshi tevhedza miṱa yavho.

₁₇Mukovhe wa vhuṋa wo kovhelwa tsinde ḽa Isakhara, zwi tshi tevhedza miṱa yavho. ₁₈Shango ḽavho ḽo angaredza Jesriele na Khesulotho na Shuneme ₁₉na Hafaraimi na Shioni na Anaharathi ₂₀na Rabithi na Kishioni na Ebetse ₂₁na Remethe na Eni Ganimu na Eni Hada na Bethe Phatsetse. ₂₂Ayo masakha a kwama na Thaboro na Shahatsuma na Bethe Shemeshe a guma Jorodani. O angaredza miḓi ya 16, khathihi na ḓorobo dzo i tangaho. ₂₃Miḓi heyo na ḓorobo dzayo yo vha i shangoni ḽo kovhelwaho Isakhara uri ḽi vhe ḽavho.

₂₄Mukovhe wa vhuṱanu wo kovhelwa tsinde ḽa Ashere zwi tshi tevhedza miṱa yavho. ₂₅Shango ḽavho ḽo angaredza Helikathi na Hali na Betheni na Akhashafu ₂₆na Alamu Melekhe na Amadi na Mishala. Thungo ya vhukovhela ha kwama Kharamele na Shihoro Libinathi, ₂₇ha livha vhubvaḓuvha. Masakha a livha Bethe Dagoni a kwama Zebuloni na Govha ḽa Ifithahele thungo ya devhula, nḓilani ya u ya Bethe Emeke na Neiele. A fhirela devhula a livha Khabulu, ₂₈na Abudoni na Rehobo na Hamoni na Kana, u vhuya u swika shangoni ḽa Sidoni. ₂₉Masakha zwino a livha Rama, a swika muḓini wa Tiro wo tangwaho nga mitsheṱo, wa konou livha Hosa wa guma Lwanzheni lwa Phandamashango. Wa angaredza Mahalaba na Akhazibi ₃₀na Uma na Afeke na Rehobo. Ndi miḓi ya 22 na ḓorobo dzo i tangaho. ₃₁Miḓi heyo na ḓorobo dzayo yo vha i shangoni ḽo kovhelwaho tsinde ḽa Ashere uri ḽi vhe ḽavho, zwi tshi tevhedza miṱa yavho.

₃₂Mukovhe wa vhuṱanu na vhuthihi wo ṋewa tsinde ḽa Nafuthali zwi tshi tevhedza miṱa yavho. ₃₃Masakha awo o thoma Helefu a livha murini muhulu wa Tsaananimu, a fhirela Adami Nekebe, a livha Jabuniele, a vhuya a swika Lakumu, a guma nga Jorodani. ₃₄Henefho masakha a livha vhukovhela a tshi ya Asinotho Thaboro, u bva henefho a livha Hukoko, a kwama Zebuloni thungo ya tshipembe, na Ashere thungo ya vhukovhela, na Jorodani thungo ya vhubvaḓuvha. ₃₅Miḓi yo tangwaho nga mitsheṱo yo vha i Tsidimu na Tsere na Hamathi na Rakathi na Khinirethe ₃₆na Adama na Rama na Hatsoro ₃₇na Kedeshe na Edrei na Eni Hatsoro ₃₈na Ironi na Migidalele na Horeme na Bethe Anatha na Bethe Shemeshe. Ndi miḓi ya 19 khathihi na ḓorobo dzo i tangaho. ₃₉Miḓi heyo na ḓorobo dzayo yo vha i shangoni ḽo kovhelwaho tsinde ḽa Nafuthali uri ḽi vhe ḽavho, zwi tshi tevhedza miṱa yavho.

₄₀Mukovhe wa vhuṱanu na vhuvhili wo kovhelwa tsinde ḽa Dani zwi tshi tevhedza miṱa yavho. ₄₁Shango ḽavho ḽo angaredza Tsora na Eshthaolo na Iri Shemeshe ₄₂na Shaalabimu na Ayaloni na Ithila ₄₃na Eloni na Thimina na Ekroni ₄₄na Elitheke na Gibithoni na Baalathi ₄₅na Jehudu na Bene Beraka na Gathi Rimoni ₄₆na Meyarikoni na Rakoni, khathihi na shango ḽo tangaho Jopa. ₄₇Musi vhathu vha Dani vha tshi dzhielwa shango ḽavho, vho ṱuwa vha ya Laishi vha u dia. Vho u thuba vha vhulaha vhathu vhawo, vha u dzhia wa vha wavho. Vha dzula henefho, vha ri muḓi uyo a u tsha pfi Laishi u vho pfi Dani, vha tshi u rinela makhulukuku wavho Dani. ₄₈Miḓi heyo na ḓorobo dzayo yo vha i shangoni ḽe ḽa kovhelwa tsinde ḽa Dani uri ḽi vhe ḽavho, zwi tshi tevhedza miṱa yavho.

₄₉Musi Vhaisraele vho fhedza u kovhekana shango, vha kovhela Joshua ṅwana wa Nunu tshipiḓa tsha shango uri hu vhe hawe. ₅₀Vho mu ṋea muḓi we a u humbela, nga he Muṋe washu a vha o vha laya. Ndi Thiminathi Sera, mivhunduni ya Efraimi. O vusa uyo muḓi a dzula henefho.

₅₁Tshifhe Eliasara na Joshua ṅwana wa Nunu na vharangaphanḓa vha miṱa ya matsinde a Israele vho kovhekanya zwipiḓa hezwo zwa shango nga u ita madeṅwa uri vha vhudzise Muṋe washu vhe Shilo, muṋangoni wa dennde ya u ṱangana na Muṋe washu. Ngauralo vha vha vho fhedza u kovhekana shango.