1Mahosi oṱhe a Vhaamori vhukovhela ha Jorodani na mahosi oṱhe a Vhakanana u navha na Lwanzhe lwa Phandamashango, vha zwi pfa uri Muṋe washu o xisa mulambo wa Jorodani, Vhaisraele vha wela. Vha farwa nga nyofho, vha kulea nungo vha si tsha vha na vhuhali ha u imedzana na Vhaisraele.
Vhathu vha tshi fumba muḓini wa Giligala
2Muṋe washu a vhudza Joshua a ri, “Ita phanga nga tombo ḽa ḽiangahwe u dovhe u fumbise Vhaisraele.” 3Joshua a ita zwe Muṋe washu a mu vhudza, a fumbisa Vhaisraele fhethu hu no pfi Muvhunduni wa u fumba. 4-6Ndi uri musi Vhaisraele vha tshi pfuluwa Egipita, vhanna vhoṱhe vho vha vho fumba, hone miṅwaha ya 40 ye vhathu vha fhedza phangani, a ho ngo vha na ṅwana na muthihi wa mutuka we a fumba. Na uri tshifhinga itsho tshi tshi vho ḓa u fhela, vhanna vhe vha vha vhe murole wa nndwa musi vha tshi pfuluwa Egipita, vho vha vho fa vhoṱhe nge vha nyadza Muṋe washu. Unga Muṋe washu o vha o ana, vho vha vha songo tendelwa u vhona shango ḽi elaho mukhaha na ṋotshi ḽe a vha o fulufhedzisa vhomakhulukuku wavho. 7Vhana vha vhatuka vha vhenevho vhanna vho vha vha songo fumba, wonoyo wo vha wone murafho muswa we Joshua a fumbisa.
8Musi vho no fumba vhoṱhe, lushaka lwoṱhe lwa dzula mishashani vha vhuya vha fhola. 9Muṋe washu a vhudza Joshua a ri, “Ṋamusi ndi hone ndo thutha u nyadziwa haṋu nga Vhaegipita.” Ndi zwe afho fhethu ha pfi Giligala; na ṋamusi hu kha ḓi vhidzwa nga dzina ḽeneḽo.
Paseka
10Musi Vhaisraele vho ṱoka mishasha Giligala mudavhini wa Jerikho, vha ita vhuṱambo ha Paseka nga madekwana a ḓuvha ḽa 14 ḽa ṅwedzi. 11Nga matshelo ḽa vha ḓuvha ḽa u ranga vha tshi ḽa zwiḽiwa zwo liṅwaho Kanana: thoro dzo hadzingwaho na vhurotho vhu si na mbilisa; 12zwenezwo mana a si tsha wa, Vhaisraele vha si tsha a wana. U bva ṅwaha wonoyo vha ḽa zwiḽiwa zwo liṅwaho Kanana.
Joshua na murangaphanḓa wa mmbi ya Muṋe washu
13Ḽifiṅwe ḓuvha Joshua e tsini ha Jerikho, a lavhelesa a mbo ḓi vhona munna ó ima phanḓa hawe, ó fara banga. Joshua a ya khae a vhudzisa a ri, “Vha muṅwe wa vhahali vhashu kana vha swina naa?”
14Uyo munna a fhindula a ri, “A thi muṅwe wa vhahali vhaṋu, a thi swina. Ndi mulangi wa mmbi ya Yahavee. Ndo ḓa u ni lwela.”
Joshua a ḓiposa fhasi a luvha a ri, “Ndi nṋe muḓinḓa wavho muṋe wanga. Vha ṱoḓa ndi tshi ita mini?”
15Mulangi wa mmbi ya Muṋe washu a mu vhudza a ri, “Bvula navhula dzau, wo ima fhethu hukhethwa.” Joshua a ita zwe a vhudzwa.
