LUKASI 10

₁Ndi hone Muṋe washu a tshi ta vhaṅwe vha 72, a vha ruma nga vhavhili-vhavhili uri vha mu range phanḓa, vha ye miḓini yoṱhe na hoṱhe he a vha a tshi khou ṱoḓa u ya hone. ₂A amba navho a ri, “Zwikaṋwa ndi zwinzhi, hone vhakaṋi ndi vha si gathi. Humbelani-ha Muṋe wa tsimu uri a rume vhashumi masimuni awe. ₃Tshimbilani; tshi re hone ndi a ni ruma zwa nga muthu a tshi khadela ngwana vhukati ha maṱalerwa.

₄“Ni songo vhuya na fara tshipatshi tsha tshelede naho u mukhwama kana navhula zwadzo; nahone ni songo fhedza tshifhinga nga u resha muthu nḓilani. ₅Muṱani muṅwe hune na dzhena ni thome nga u ri, ‘Mulalo!’ ₆Arali henefho hu na mudziamulalo, u resha haṋu hu ḓo mu ḓisela mulalo; arali muthu o raloho a siho, mulalo u ḓo humela kha inwi vhaṋe. ₇Ni dzule henefho muṱani wonoyo, ni ḽe ni nwe zwenezwo zwine vha ni ṋea; mushumi o fanela u ṋewa malamba awe. Ni songo fhiruludza na bva khawo na ya kha muṅwe. ₈Arali na ri ni tshi dzhena muḓini vhathu vha henefho vha ni ṱanganedza, ni ḽe zwine vha ni avhela; ₉ni fhodze na vhalwadze vhane vha vha henefho, ni konou vha vhudza ni ri, ‘Zwino ndi hone tshifhinga tsho sendela tsha uri ni vhuswe nga Mudzimu.’ ₁₀Arali na ri ni tshi dzhena muḓini vhathu vha henefho vha si ni ṱanganedze, ni bvele nnḓa zwiṱaraṱani ni ri, ₁₁‘Ri khou tou fhufhura na buse ḽa muḓini wa haṋu ḽi re kha milenzhe yashu uri ni vhone uri zwi kha inwi; hone ni zwi ḓivhe uri muvhuso wa Mudzimu wo no tou vha tsini-tsini!’ ₁₂A vha Nṋe ndi ri nga ḓuvha ḽa khaṱhulo ṱhamu ine Mudzimu a ḓo rwa ngayo uyo muḓi i ḓo vhavha u fhira na i no ḓo rwa Sodoma.

₁₃“U ḓo zwi vhona iwe Khorazini! U ḓo zwi vhona iwe Betsaida! Ngavhe maḓembe e a itwa kha inwi a vhe o itwa Tiro na Sidoni ndi musi vhathu vha iyo miḓi vha tshi ḓo vha vho no rembuluwa kale, vho vha vha tshi ḓo vha vho no ambara madzanganda, vha tshi khou ḓimbulumbudza milorani nga u ḓisola. ₁₄Nga ḓuvha ḽa khaṱhulo ṱhamu ine na ḓo rwiwa ngayo i ḓo vhavha u fhira na i no ḓo rwa Tiro na Sidoni. ₁₅Iwe-vho Kapernaumi, u vhona unga u ḓo huliswa wa swika makoleni naa? Matsina zwiḽa, u ḓo tou tsiselwa fhasi-fhasi dindini.”

₁₆A dovha a amba na vhafunziwa vhawe a ri, “Ane a thetshelesa inwi u thetshelesa Nṋe; hone ane a ni landula u landula Nṋe; huno uyo ane a landula Nṋe u landula o nthumaho.”

₁₇Vhaḽa vha 72 vha vhuya vho tou takala, vha ri, “Muṋe washu, thuṅwa dza Saṱhane na dzone dzi a ri pfa musi ri tshi dzi kaidza nga dzina ḽavho.”

₁₈Yesu a konou amba navho a ri, “Ndo vhona Saṱhane a tshi wa unga nḓadzi i tshi bva makoleni. ₁₉Inwi ndo ni fha maanḓa a u kandekanya dziṋowa na dziphame, na u kunda maanḓa oṱhe a swina, hu si vhe na tshine tsha ni ita tshithu. ₂₀Tshi re hone ni songo sokou takadzwa nga u kona u pandela thuṅwa dza Saṱhane, takalani nge madzina aṋu a ṅwalwa ṱaḓulu.”

₂₁Zwenezwo a amba o ḓadzwa dakalo nga Muya Mukhethwa, a ri, “Ndi a u renda Khotsi, Iwe Muṋe wa ḽiṱaḓulu na ḽifhasi, ngauri hezwi zwithu wo zwi dzumbela vho funzwaho na vha vhuṱali wa zwi dzumbululela vhaṱoma. Iina Khotsi, iṱali wo vha wo ḓi zwi funa nga u ralo.

₂₂“Zwithu zwoṱhe Khotsi anga o zwi kumedza Nṋe; a hu na ane a ḓivha Murwa arali e si Khotsi; nahone a hu na ane a ḓivha Khotsi arali e si Murwa, na onoyo ane Ene Murwa a takalela u mu dzumbululela.”

₂₃Ndi hone a tshi rembuluwa a lavhelesa vhafunziwa vhawe a ri, “Vha na mashudu vhe vha vhona nga maṱo zwine inwi na zwi vhona. ₂₄Ndi vhaporofita vhanzhi na mahosi manzhi o tamaho u vhona zwine inwi na zwi vhona, hone vha kundwa; na zwine na zwi pfa vho ḓi funa u zwi pfa, hone vha kundwa.”

₂₅Ha mbo takuwa muṅwe muḓivhi wa Mulayo a mu vhudzisa hu u mu linga a ri, “Vhafunzi, ndi fanela u ita tshithu-ḓe uri ndi fhiwe vhutshilo vhu sa gumi?” ₂₆Yesu a mu vhudzisa-vho a ri, “Nṋa Mulayoni ho ṅwaliwa upfi mini? Ni tshi vhala ni ri mini?” ₂₇Uyo munna a tshi fhindula a ri, “Hu pfi, ‘Funa Muṋe washu Mudzimu wau nga mbilu yoṱhe, nga zwoṱhe zwine wa vha zwone, nga nungo dzoṱhe, nga ṱhalukanyo yoṱhe; funa wa hau unga iwe muṋe.’ ” ₂₈Yesu a mu fhindula a ri, “Ni amba zwone. Itani zwenezwo, ndi hone ni tshi ḓo tshila.”

₂₉Hone uyo munna a tshi ṱoḓa u ḓiṱamba, a ri, “Nṋa hone wa hanga ndi nnyi?” ₃₀Yesu a fhindula a ri, “Muṅwe munna o vhuya a fara lwendo a tshi bva Jerusalema a tshi tsela Jerikho. Nḓilani a tshenuwa o wela zwanḓani zwa mavemu; a mu ṱangula zwiambaro, a mu rwa, a mu sia o dzidzivhala. ₃₁Zwa ṱangana na muṅwe tshifhe o fara gondo ḽeneḽo, a ri a tshi vhona yeneyo khuvhabvu, a bva nga thungo. ₃₂Muṅwe Mulivi a tshi swika-vho henefho, na ene a ri u mu vhona a ḓi fhira nga thungo. ₃₃Hone muṅwe Musamaria we a vha o fara nḓila yeneyo, a mbo ḓi ṱangana na uyo muthu.

“A tshi mu vhona a khathuwa mbilu. ₃₄A ya khae a ṱanzwa mbonzhe dzawe nga waini, a dzi ḓodza mapfura a dzi pomba; a konou mu namedza kha mbelesa yawe a mu isa nḓuni ya vhaeni, a mu onga henefho. ₃₅Nga matshelo a bvisa maseṱha mavhili a ṋea muṋe wa nnḓu ya vhaeni a ri, ‘Vha sale vha tshi mu onga. Arali tshelede ya ṱahela, ndi ḓo i vhumba ndi tshi vhuya.’ ₃₆Zwino inwi ni vhona unga ri nga ri uyo o welaho zwanḓani zwa mavemu u ḓo ri wa hawe ndi ufhio kha avho vhararu?” ₃₇Muḓivhi wa Mulayo a fhindula a ri, “Ndi uyo we a mu pfela vhuṱungu.” Ndi hone Yesu a tshi ri, “Na inwi tshimbilani ni yo ita nga u ralo.”

₃₈Musi vhe lwendoni, vha swika muḓini, muṅwe musadzi a no pfi Marita a mu swielela muṱani wa hawe. ₃₉Zwino Marita o vha e na murathu wawe a no pfi Maria. Onoyo Maria a ya a dzula milenzheni ya Muṋe washu a tshi khou thetshelesa zwine a funza. ₄₀Marita ene o vha e khakhathini ya u bikela vhaeni. A ḓa a ri, “Muṋe wanga, vha vhona zwi zwone zwenezwi zwine murathu wanga a nndaṱedza nda shuma ndi ndoṱhe? Kha vha mu vhudze a ḓe a mpfarise.” ₄₁Muṋe washu a tshi fhindula a ri, “Nṋa zwino ndi mini Marita? Khezwi ni tshi ṱolou ḽa mbilu na u ḓidina nga zwithu zwinzhi-zwinzhi! ₄₂Zwi ṱoḓeaho a zwi gathi, tshililelwa tshone tshi tshithihi. Hoyu Maria o nanga tshone tsha khwiṋe, ndi mukovhe une a sa ḓo vhuya a dzhielwa nga muthu.”