LUKASI 3

_1-2Ipfi ḽa Mudzimu ḽa ḓa ha Johanisi ṅwana wa Zakaria e sogani nga ṅwaha wa 15 wa muvhuso wa khisara Tiberiosi, muvhusi wa Judia e Pontio Pilato, Herude e gota ḽa Galelia, mukomana wawe Filipi e gota ḽa Ithuria na Thrakhonithisi, ḽa Abilene e Lisaniasi, vhotshifhe vhahulu vhe Anasi na Khayafasi. ₃Ndi hone Johanisi a tshi tshimbila na shango ḽoṱhe ḽi re tsini na mulambo wa Jorodani a tshi enda a tshi ḓivhadza vhathu a tshi ri, “Rembuluwani ni lovhedzwe, Mudzimu a ḓo konou ni hangwela vhutshinyi haṋu.” ₄Hezwi zwo itea nga he muporofita Yesaya a vha o ṅwala buguni yawe a tshi ri,

₇Johanisi a amba na vhathu vhe vha ḓa khae uri vha lovhedzwe a ri, “Dziṋowa ndi inwi! Ndi nnyi o ni sevhaho uri ni tinye khaṱhulo ya Mudzimu ine ya khou ḓa? ₈Aṋwani-ha mitshelo i sumbedzaho uri vhukuma no rembuluwa. Ni litshe u ṱolou amba nga tshaṋu ni tshi ri, ‘Riṋe ri vhana vha Abrahamu.’ A vha nṋe ndi ri, Mudzimu u na maanḓa a u itela Abrahamu vhana nga matombo haya! ₉Iṱali mbaḓo yo no ḓi dzula yo angaladzwa tsindeni ḽa muri; muri muṅwe na muṅwe une u si aṋwe mitshelo yavhuḓi u ḓo remiwa wa kudzwa muliloni.”

₁₀A tshi ralo vhathu vha mu vhudzisa vha ri, “Zwino ri iteni-ha?” ₁₁Ene a vha fhindula a ri, “Ane a vha na hemmbe mbili kha a ṋee iṅwe uḽa a si na; ane a vha na zwiḽiwa kha a ḽe na vhaṅwe.” ₁₂Ha ḓa-vho na vhathelisi uri vha lovhedzwe. Vhenevho vha mu vhudzisa vha ri, “Vhafunzi, riṋe-vho ri iteni?” ₁₃A tshi vha fhindula a ri, “Ni songo thelisa na fhirisa ndinganyo.” ₁₄Ndi hone hu tshi vhudzisa-vho na maswole a ri, “Riṋe-vho, ri iteni?” Ene a tshi vha fhindula a ri, “Ni songo dzhia tshelede ya muthu nga swili kana nga vhufhura; tshaṋu nga hu vhe u fushea nga miholo yaṋu.”

₁₅A tshi ralo ha tou vha u vusa dzangalelo ḽa vhathu; vha thoma u ḓivhudzisa mbiluni dzavho uri uyu Johanisi ndi ene Mesia naa! ₁₆Johanisi a tshi vha fhindula a ri, “Nṋe ndi ni lovhedza nga maḓi zwao, hone hu khou ḓa ane a mphira kule lune ndi si vhuye nda fanela na u kotama nda vhofholola thambo dza navhula dzawe. Ene u ḓo tou ni lovhedza nga Muya Mukhethwa na nga mulilo. ₁₇U ḓa o fara luselo lwawe; u ḓo fhefhera mavhele a konou a shela ḓuluni. Mungu wone u ḓo u fhisa nga mulilo u sa dzimi!”

₁₈Johanisi a ḓi funza vhathu mafhungo maḓifha a tou vha kwengweledza nga nḓila dzo fhambanaho. ₁₉Zwino ene Johanisi o vha a tshi ḓi kaidza khosi Herude nge a ṱahisa Herudiasi musadzi wa mukomana wawe, na nge a ḓi ita vhuṅwe vhukhakhi vhunzhi. ₂₀Hone Herude a vho tou phapha mbulu kha iṅwe, a fara Johanisi a mu kudza dzhele.

₂₁Misi iḽa vhathu vhoṱhe vha tshi lovhedzwa, na Yesu a ḓa a lovhedzwa-vho. O no lovhedzwa, a tshi khou rabela, lutombo lwa vulea, ₂₂Muya Mukhethwa a tsa e kha tshivhumbeo tsha ḽiivha a kavha khae. Ha pfala ipfi ḽi bvaho ṱaḓulu ḽi tshi ri, “U Murwa wanga muthihi fhedzi; u a ntakadza!”

₂₃Musi Yesu a tshi thoma mushumo wa u funza o vha a tshi vho swika kha miṅwaha ya 30. Vhathu vhone vho vha vha tshi mu ita ṅwana wa Josefa. Josefa o vha e ṅwana wa Eli, ₂₄ṅwana wa Mathathi, wa Livi, wa Malaki, wa Janai, wa Josefa, ₂₅wa Mathathiasi, wa Amusi, wa Nahumi, wa Esele, wa Nagai, ₂₆wa Maathi, wa Mathathiasi, wa Simei, wa Josekhe, wa Joda, ₂₇wa Johanani, wa Resa, wa Zerubabele, wa Salathiele, wa Neri, ₂₈wa Malaki, wa Adi, wa Khosamu, wa Elemadamu, wa Eri, ₂₉wa Joshua, wa Eliesere, wa Jorimu, wa Mathathi, wa Livi, ₃₀wa Simioni, wa Juda, wa Josefa, wa Jonamu, wa Eliakimu, ₃₁wa Melia, wa Mina, wa Mathatha, wa Nathani, wa Dafita, ₃₂wa Isai, wa Obede, wa Buasi, wa Salimoni, wa Nahashoni, ₃₃wa Aminadaba, wa Adimini, wa Arini, wa Esromu, wa Pheretse, wa Juda, ₃₄wa Jakopo, wa Isaka, wa Abrahamu, wa Thera, wa Nahoro, ₃₅wa Serugu, wa Riu, wa Phelege, wa Ebere, wa Shela, ₃₆wa Khainani, wa Ariphakhadi, wa Semu, wa Nua, wa Lamekhe, ₃₇wa Methushaele, wa Enokho, wa Jarede, wa Mahalalele, wa Khainani, ₃₈wa Enosi, wa Sethe, wa Adamu. Adamu uyo-ha o vha e ṅwana wa Mudzimu.