MATIOSI 14

₁Zwenezwo khosi Herude a pfa bvumo ḽa Yesu, ₂a amba na vhathu vha henefho musanda a ri, “Hoyu ndi Johanisi Mulovhedzi, o vuwa vhafuni, ndi zwine a kona u ita maḓembe mangafhangafha!” ₃Johanisi a tshi fa zwo ḓa nga nḓila hei: Herude o vha o ṱahisa Herudiasi musadzi wa mukomana wawe Filipi, ₄zwino Johanisi a tshi ḓi ṱolou mu vhudza uri a zwo ngo fanela a tshi mu ṱahisa. Ndi hone Herude a tshi ri Johanisi a farwe a hoṋelwe dzhele. ₅O vha a tshi funa u mu vhulaha, hone a ofha vhathu, ngauri vho vha vha tshi ḓivha Johanisi e muporofita. ₆Hone ḽiṅwe ḓuvha nga munyanya wa mabebo a Herude, ṅwana wa Herudiasi wa musidzana a tshinela vhaeni, a takadza Herude ₇lwe a mu fulufhedzisa uri u ḓo mu fha tshiṅwe na tshiṅwe tshine a nga humbela, a khwaṱhisa nga muano. ₈Musidzana a ḓa o funzedzwa nga mme awe a ri, “Ndo vha ndi tshi ri vha nga nṋea zwanga ṱhoho ya Johanisi Mulovhedzi zwino hafha, i ḓe i ndiloni.” ₉Iyo khumbelo ya ṱungufhadza khosi, hone a ro kundwa u hana, nge a vha o ana vhaeni vhoṱhe vha tshi zwi pfa. Ndi zwe a ri musidzana a ṋewe yone. ₁₀A ruma vhathu dzhele uri vha yo tumula ṱhoho ya Johanisi, ₁₁vha ḓa nayo i ndiloni vha i fha musidzana, ene a i isa ha mme awe. ₁₂Vhafunziwa vha Johanisi vha ḓa vha dzhia tshitumbu tshawe vha tshi swiṱa, vha konou ḓa ha Yesu vha mu vhudza zwo iteaho.

₁₃Yesu a ri u pfa hezwo a dzhena tshikepeni a ṱutshela fhethu he ha vha hu si na vhathu. Vhathu vha tshi zwi pfa vha bva miḓini yavho vha mu tevhela nga milenzhe. ₁₄Yesu a tshi bva tshikepeni a vhona gogo ḽihulu ḽa vhathu, a vha pfela vhuṱungu, a fhodza vhalwadze vhavho. ₁₅Ḽi tshi vho kovhela vhafunziwa vhawe vha ḓa khae vha ri, “Fhano hune ra vha hone ndi sogani nahone ḓuvha ḽo no ṱuwesa. Kha vha vhofholole gogo iḽi vha yo ḓirengela zwiḽiwa dziḓoroboni.” ₁₆Hone Yesu a fhindula a ri, “A vha vhuyi vha ṱuwa; vha ṋeeni zwiḽiwa vha ḽe.” ₁₇Vhone vha fhindula vha ri, “Riṋe a ri na tshithu fhano; ri na mikonde miṱanu ya vhurotho na khovhe mbili fhedzi.” ₁₈Yesu a fhindula a ri, “Zwi ḓiseni fhano.” ₁₉Ndi hone a tshi vhudza vhathu uri vha dzule fhasi tshiṱanzhelani, a mbo ḓi dzhia iḽa mikonde miṱanu na dziḽa khovhe mbili, a lilala a renda Mudzimu, a dzi ṅwatekanya a ṋea vhafunziwa vhawe uri vha kovhele vhathu; ₂₀vhoṱhe vha ḽa vha fura. Vho no ḽa vha dobela zwipeḓu zwo salaho, vha ḓadza mifaro ya 12. ₂₁Vhe vha ḽa ndi vhanna vhane vha nga lingana 5 000, ri sa vhali vhasadzi na vhana.

₂₂Yesu a mbo ḓi kombetshedza vhafunziwa vhawe uri vha dzhene tshikepeni vha mu range phanḓa vha wetshele seli na luḽa lwa dzivha, uri Ene a sale a tshi vhofholola vhathu. ₂₃Musi o no onesana navho a yo rabela tshikwarani e eṱhe. Ḽi tshi kovhela o vha a tshee tshikwarani e eṱhe. ₂₄Tshikepe tsho vha tsho no vha henengei vhukati ha dzivha, kule na khunzikhunzi, tshi tshi khou dzinginyiswa nga magabelo, ngauri tsho vha tsho livhana na muya.

₂₅Nga maḓautsha a ḓa khavho a tshi khou tshimbila nṱha ha maḓi. ₂₆Vhafunziwa vha tshi mu vhona a tshi khou tshimbila nṱha ha maḓi vha humbula uri ndi tshirunzi, vha tshenuwa vha ṱavha mukosi. ₂₇Yesu a mbo ḓi amba navho a ri, “Rudzani mbilu; ndi Nṋe, ni songo ofha.” ₂₈Pitrosi a mu fhindula a ri, “Muṋe wanga, arali vhukuma vhe Vhone, kha vha mmbudze uri ndi ḓe khavho ndi tshi tshimbila-vho nṱha ha maḓi.” ₂₉Yesu a ri, “Ndi zwone, iḓani!” Pitrosi a mbo ḓi bva tshikepeni a ya ha Yesu a tshi khou tshimbila nṱha ha maḓi. ₃₀Hone a tshi vho vhona ḓumbu a thoma u ofha. A tshi vhona a tshi vho mbwandamela a ṱavha mukosi a ri, “Muṋe wanga, kha vha ntshidze!” ₃₁Yesu a mbo ḓi isa tshanḓa tshawe a mu fara, a mu vhudza a ri, “Fulufhelo ḽaṋu ḽo ṱukufhala hani! Ndi mini ni tshi timatima?” ₃₂Vha tshi dzhena tshikepeni muya wa mbo ḓi dzika. ₃₃Vhe vha vha vhe tshikepeni vha mbo ḓi mu gwadamela vha ri, “Vhukumakuma vha Murwa wa Mudzimu.”

₃₄Vha wela dzivha vha tsela Genesaretha. ₃₅Vhathu vha henefho vha mbo ḓi vhona uri ndi Yesu, vha laedzela vhathu vhoṱhe vha miḓini ya henefho tsini, vha ḓa na vhalwadze vhoṱhe ₃₆vha mu humbela uri a tendele vhalwadze vha tshi tou kwama zwavho shaphu ḽa nguvho yawe; vhoṱhe vhe vha ḽi kwama vha fhola.