MATIOSI 16

₁Ḽiṅwe ḓuvha Vhafarisei na Vhasadukei vho ḓa vha linga Yesu, vha mu humbela uri a ite tshiga tshi no bva ha Mudzimu. ₂Hone a vha fhindula a ri, “Nga madekwana ni a amba na ri, ‘Matshelo ḽi ḓo tsha zwavhuḓi, makole o tswuka.’ ₃Ḽi tshi tsha ni a amba na ri, ‘Ṋamusi hu ḓo vha na maḓumbu na mvula, makole o tswuka.’ Zwa matshele ni a zwi ṱalukanya, hone zwiga zwa zwifhinga zwa Mudzimu zwi a ni kunda. ₄Vhane vha ṱoḓa tshiga ndi vhathu vhavhi vho furalelaho Mudzimu; a vha nga itelwi tshiga arali tshi si tsha Jonasi.” U ralo a mbo ḓi ṱuwa a vha sia henefho.

₅Vhafunziwa vha wetshela seli na luḽa lwa dzivha vho hangwa u ṱuwa na vhurotho. ₆Yesu a vha vhudza a ri, “Fhaṱuwani ni thanyele mbilisa ya Vhafarisei na Vhasadukei.” ₇Vha amba nga tshavho vha ri, “A tshi ralo ndi ngauri a ro ngo ḓa na vhurotho.” ₈Yesu nga u ḓivha zwe vha vha vha tshi khou amba a ri, “Ndi mini ni tshi amba nga tshaṋu na ri a ni na vhurotho? Ni dinwa nga fulufhelo ḽiṱuku. ₉A ni athu ṱalukanya naa? Kani no no hangwa zwiḽa zwa mikonde miṱanu ya vhurotho ye nda fusha ngayo vhathu vha 5 000, na uri no dobela na ḓadza mifaro mingana? ₁₀Kana zwiḽa zwa musi ndi tshi fusha vhathu vha 4 000 nga mikonde miṱanu na mivhili, na uri no sala ni tshi ḓadza mifaro mingana nga zwipiḓa zwo salaho? ₁₁Khezwi ni tshi kundwa u ṱalukanya uri a tho ngo amba zwa zwiḽiwa na kathihi, tshe nda amba ndo tou ri ni thanyele mbilisa ya Vhafarisei na Vhasadukei?” ₁₂Ndi hone vha tshi zwi pfa uri matsina o vha a sa khou amba mbilisa ya vhurotho, o vha a tshi khou amba pfunzo ya Vhafarisei na Vhasadukei.

₁₃Ḽiṅwe ḓuvha musi Yesu o swika thungo dza Khisaria wa Filipi a vhudzisa vhafunziwa vhawe a ri, “Nṋa vhathu vha tshi nnyamba Nṋe Mubebwa-nga-muthu vha ri ndi Nṋe nnyi?” ₁₄Vha fhindula vha ri, “Vhaṅwe vha ri ndi Vhone Johanisi Mulovhedzi, vhaṅwe vha ri ndi Vhone Elia; hafhu hu ḓi dovha ha vha na vhaṅwe vhane vha ri ndi Vhone Jeremia kana muṅwe wa vhaporofita vha kale.” ₁₅Yesu a konou vha vhudzisa a ri, “Inwi-ha ni ri mini? Ni ri ndi Nṋe nnyi?” ₁₆Ha fhindula Simoni ane ḽiṅwe a pfi Pitrosi a ri, “Ndi Vhone Mesia, Murwa wa Mudzimu a tshilaho.” ₁₇Yesu a mbo ri, “Ni na mashudu Simoni ṅwana wa Jonasi; a si muthu wa ṋama o ni dzumbululelaho hezwo, ndi Khotsi anga wa ṱaḓulu. ₁₈Zwino ndi khou ni vhudza ndi ri: ni vho pfi Pitrosi, huno ndi ḓo fhaṱa tshivhidzo tshanga kha tombo heḽi; na hele yone iṋe i nga si tshi kunde. ₁₉Ndi ḓo ni fha khii dza muvhuso wa Mudzimu; na tshine na iledza fhano shangoni tshi ḓo vha tsho iledzwa na ngei ṱaḓulu; tshine na tendela fhano shangoni tshi ḓo vha tsho tendelwa na ngei ṱaḓulu.” ₂₀O no ralo a mbo laya vhafunziwa uri vha songo vhuya vha vhudza muthu uri ndi Ene Mesia.

₂₁U bva zwenezwo Yesu a thoma u ṱalutshedza vhafunziwa vhawe uri u fanela u ya Jerusalema a tambudzwa zwihulu nga vhahulwane vha lushaka na vhotshifhe vhahulwane na vhaḓivhi vha Mulayo, a vhulawa, a vuswa nga ḓuvha ḽa vhuraru. ₂₂Ndi hone Pitrosi a tshi mu vhidzela thungo a thoma u mu kaidza a ri, “Hai nandi Muṋe wanga, hezwo zwi songo vhuya zwa itea!” ₂₃Hone Yesu a rembuluwa a lavhelesa Pitrosi a ri, “Nṱutshele, Saṱhane ndiwe! U khou ṱoḓa u nkhakhisa! A u londi zwa Mudzimu, u londa zwa vhathu!”

₂₄Ndi hone Yesu a tshi vhudza vhafunziwa vhawe a ri, “Arali muthu a tshi funa u vha mufunziwa wanga, nga a ḓihangwe a hwale tshifhambano tshawe, a ntevhele. ₂₅Muthu ane a tata u ṅaledza vhutshilo hawe u a ḓilozwa, hone ane a ḓo fela Nṋe ndi ene ane a ḓo tshila. ₂₆Nṋa muthu zwi ḓo mu farisani arali a tshi wana zwithu zwoṱhe shangoni a fhedza nga u lovha tshoṱhe? A nga bvisa mini tsha u rengulula vhutshilo hawe? ₂₇Mubebwa-nga-muthu u khou ḓa e kha vhugala ha Khotsi awe e na vharuṅwa vhawe; ndi hone a tshi ḓo ṋea muṅwe na muṅwe nga he a shuma ngaho.

₂₈“Zwino ipfani-ha: hu na vhaṅwe vho imaho hafha vhane vha sa ḓo fa vha sa athu vhona Mubebwa-nga-muthu a tshi ḓa e muvhusoni wawe.”