MATIOSI 24

₁Yesu a tshi bva thembeleni vhafunziwa vhawe vha ḓa khae vha mu sumbedza zwifhaṱo zwa thembele. ₂Hone Ene a vha vhudza a ri, “A thi ri izwi zwifhaṱo ni khou zwi vhona? Zwino ipfani-ha: fhano a hu na tombo na ḽithihi ḽine ḽa ḓo sala ḽo dzula kha ḽiṅwe; oṱhe a ḓo piḓimulwa.”

₃Yesu a ya a dzula fhasi Thavhani ya Miolivi, vhafunziwa vha ḓa khae vhe vhoṱhe vha mu vhudzisa vha ri, “Nga vha dzou ri vhudza uri zwine vha amba zwi ḓo itea lini; vha ri vhudze na tshiga tshine ra ḓo vhona ngatsho uri u vhuya havho na vhufhelo ha shango zwo sendela.”

₄Yesu a vha fhindula a ri, “Ni dzule no thanya uri ni si fhurwe; ₅hu ḓo ḓa vhanzhi vha ri ndi vhone Nṋe, muṅwe na muṅwe wavho a tshi ri, ‘Ndi nṋe Mesia.’ Vha tshi ralo vha ḓo xedza vhathu vhanzhi. ₆Ni ḓo pfa mikosi ya nndwa yo ṱangana, na mavharivhari a nndwa dzi no khou ḓa. Zwi tshi ralo ni songo tshenuwa. Ndi pfanelo uri zwi itee, hone zwi sa ambi uri vhufhelo ha shango ndi hone ho swika.

₇“Tshakha dzi ḓo shandukelana; mivhuso i ḓo vutshelana. Hu ḓo wa nḓala ha vha na midzinginyo ya shango hoṱhe-hoṱhe. ₈Hezwi zwoṱhe ndi tshiga tsha uri Mesia u nḓilani, unga u ḓa ha muthu muswa hu tshi rangwa phanḓa nga vhuṱungu ha u beba.

₉“Ndi hone vha tshi ḓo ni kumedza u tambudzwa, vha ita na u ni vhulaha. Tshakha dzoṱhe dzi ḓo ni vhenga nge na vha vhanga. ₁₀Ndi hone vhanzhi vha tshi ḓo gunea vha fheṱana vha vhengana; ₁₁ha ḓa na vhaporofita vhanzhi vha khole-khole vha xedza vhanzhi. ₁₂Huno ngauri vhuvhi vhu ḓo ḓi ṋaṋa vhu tshi ya, lufuno lwa vhanzhi lu ḓo fhungudzea. ₁₃Hone ane a ḓo konḓelela a sa litshi, ndi ene ane a ḓo tshidzwa. ₁₄Mafhungo maḓifha haya a muvhuso wa Mudzimu a ḓo ranga u ḓivhadzwa mashangoni oṱhe uri tshakha dzoṱhe dzi pfe vhuṱanzi hawo, ha konou ḓa vhufhelo.”

₁₅“Musi ni tshi vhona ‘Vhuṱudzi vhu ḓisaho mutshinyalo’ ho ambiwaho nga muporofita Daniele ho imiswa fhethu hukhethwa (muvhali nga a pfesese), ₁₆vha re Judia vha shavhele zwikwarani. ₁₇Muthu a re kha ṱhanga ya nnḓu yawe a songo ri u tsa a lenga-lenga nga u dzhena nḓuni uri a thome u goda thundu yawe. ₁₈A re tsimuni a songo tsha lenga-lenga nga u humela hayani a yo dzhia nguvho yawe. ₁₉Musi zwi tshi itea, vho vhifhaho mivhilini na vha mamisaho zwi ḓo vha konḓela. ₂₀Itonu rabela uri hezwo zwithu zwi si itee vhuriha kana nga Sabatha. ₂₁Maṱhupho a misi iyo a ḓo fhira oṱhe o no vhuyaho a vha hone u bva tshee shango ḽa sikwa u swika zwino. Nahone zwine zwa nga zwone a zwi nga dovhi zwa vha hone. ₂₂Mudzimu ayo maḓuvha o a fhungudza. Ngavhe a si tou ralo ndi musi hu si na na ane a ḓo tshidzwa; hone u ḓo a fhungudza a tshi itela vhanangiwa.

₂₃“Zwenezwo arali ni tshi pfa muthu a tshi ri, ‘Vhonani Mesia khoyu!’ kana a tshi ri, ‘Vhonani khouḽaa!’ ni songo tenda. ₂₄Hu ḓo bvelela vhomesia vha khole-khole na vhaporofita vha khole-khole; vha ḓo ita maḓembe mahulu na zwimangadzo uri arali zwo vha zwi tshi konadzea vha xedze na vho nangwaho nga Mudzimu. ₂₅Tenda ndo dzula ndo ni vhudza. ₂₆Izwo arali vha ni vhudza vha ri, ‘Mesia u henengei sogani!’ ni songo vhuya na ya u vhona. Arali vha ri, ‘Asuyu, u fhano pfamoni!’ ni songo vhuya na tenda; ₂₇Mubebwa-nga-muthu a tshi vhuya u ḓo tou nga lupenyo lwa mvula lune lu tshi vhenge, lwa vhonetshela u bva vhubvaḓuvha u swika vhukovhela.

₂₈“Hune ha vha na tshitumbu ndi hone hune maanga a kuvhangana hone.”

₃₀“Ndi hone tshiga tsha Mubebwa-nga-muthu tshi tshi ḓo vhonala lutomboni, tshakha dzoṱhe dza ḽifhasi dzi ḓo ṱavha mukosi nga nyofho dzi tshi vhona Mubebwa-nga-muthu a tshi ḓa o namela makole e na maanḓa na vhugala vhuhulu. ₃₁U ḓo ruma vharuṅwa vhawe vha lidza phalaphala, vha kuvhanganya vhanangiwa vhawe vha tshi bva khuḓani nṋa dza shango u bva vhusendekamisi u swika vhusendekamisi.

₃₂“Ḓifunzeni nga muhuyu: musi ni tshi vhona thavhi dzawo dzi tshi thoma u khuba maḓi dza ṱuma lurere, ni mbo ḓi ḓivha uri tsho limuwa. ₃₃Na zwenezwo zwi ḓo ḓi tou ralo: zwithu izwo zwi tshi itea, ndi hone ni tshi ḓo ḓivha uri tshifhinga tsho swika. ₃₄Thetshelesani ndi ni vhudze: hezwi zwithu zwi ḓo itea vhathu vha no khou tshila zwino vha sa athu fhelela vhoṱhe u fa.

₃₅“Ḽiṱaḓulu na ḽifhasi zwi ḓo lovha, maipfi anga one ha nga weli fhasi.

₃₆“Hone a hu na a ḓivhaho uri iḽo ḓuvha kana tshifhinga tshazwo tshi ḓo swika lini. Hu vharuṅwa ngei ṱaḓulu, hu Murwa, a vha zwi ḓivhi, a zwi ḓivhaho ndi Khotsi e eṱhe.

₃₇“Zwa musi Mubebwa-nga-muthu a tshi vhuya zwi ḓo tou fana na zwiḽa zwa misi ya Nua. ₃₈Zwiḽa hu sa athu ḓa muḓalo wa maḓi vhathu vho vha vha tshi ḓiḽela vha tshi ḓinwela, hu tshi dzewa, ha vhuya ha swika ḓuvha ḽe Nua a dzhena tshikepeni, ₃₉vha si zwi londe ha vhuya ha ḓa muḓalo wa maḓi wa vha kumba vhoṱhe. Musi Mubebwa-nga-muthu a tshi vhuya zwi ḓo ḓi tou ralo.

₄₀“Nga heḽo ḓuvha vhavhili vha ḓo vha vha tshi khou shuma tsimuni nthihi; muṅwe wavho a dzhiwa, muṅwe a siwa. ₄₁Vhasadzi vhavhili vha ḓo vha vha tshi khou sinḓisana mutulini muthihi; muṅwe wavho a dzhiwa, muṅwe a siwa. ₄₂Dzulani-ha no fhaṱuwa, ngauri a ni ḓivhi uri Muṋe waṋu u ḓo vhuya lini.

₄₃“Kani a ni ḓivhi uri arali muṋe wa nnḓu o dzula o zwi ḓivha uri fobvu ḽi ḓo thukhutha nḓuni yawe nga tshifhinga tsha uri, o vha a sa ḓo yo lala, o vha a tshi ḓo i linda uri i si vhuye ya thukhuthwa. ₄₄Na inwi ni fanela u dzula no ḓilugisa nga u ralo; Mubebwa-nga-muthu u ḓo swika ni songo lavhelela.

₄₅“Zwino mukoma wa vhuṱali a fulufhedzeaho ndi ḓo ri ndi nnyi? Ndi amba ane muṋe wawe a ḓo mu ita ene mulangi wa zwoṱhe zwa muṱani wawe, uri a ṋee vhathu zwiḽiwa nga tshifhinga tshazwo? ₄₆U na mashudu mukoma ane muṋe wawe a tshi vhuya, a wana a tshee khazwo. ₄₇Thetshelesani ndi ni vhudze: hoyo muthu muṋe wawe u ḓo mu ita mukoma kha zwoṱhe zwi re zwawe.

₄₈“Hone arali uyo mushumi e muvhi, a ambela mbiluni yawe a ri, ‘Hufha muṋe wanga a tshi khou lenga u vhuya,’ ₄₉a thoma u fara vhashumi ngae a tshi vha rwa, a tshi ḓiḽela a tshi kambiwa, ₅₀u ḓo tshenuwa muṋe wawe o vhuya musi a songo lavhelela, nga tshifhinga tshine a si vhuye a tshi ḓivha, ₅₁a mu fhandula nga vhukati ha vha u mu baḓekanya na vhahoi. Henefho hu ḓo vha na zwililo, vhathu vha shenganya maṋo nga vhuṱungu.