MATIOSI 3

₁Misi yeneyo ho ḓa Johanisi Mulovhedzi Phangani ya Judia, a ḓa na pfunzo ₂ine ya ri, “Laṱani vhuvhi haṋu; tshifhinga tsho sendela tsha uri ni vhuswe nga Mudzimu.” ₃Johanisi ndi ene we a dzula o ambiwa nga muporofita Yesaya a tshi ri,

₄Johanisi o vha o ambara nguvho ya vhukuse ha gamela, khunduni o i vhofha nga bannda ya mukumba, zwiḽiwa zwawe zwi nzie na ṋotshi dza ḓaka. ₅Muḓi wa Jerusalema na shango ḽoṱhe ḽa Judia na vhathu vhoṱhe vha thungo dza Jorodani vha ḓa khae ₆a vha lovhedza mulamboni wa Jorodani vha tshi bula vhutshinyi havho.

₇A tshi vhona na Vhafarisei na Vhasadukei vhanzhi vho ḓa u lovhedzwa, a amba navho a ri, “Dziṋowa ndinwi! Ndi nnyi o ni sevhaho uri ni tinye khaṱhulo ya Mudzimu ine ya khou ḓa? ₈Aṋwani-ha mitshelo i sumbedzaho uri vhukuma no laṱa vhuvhi haṋu. ₉Ni songo ḓifhima na amba nga tshaṋu na ri, ‘Riṋe ri vhaḓuhulu vha Abrahamu.’ A vha nṋe ndi ri, Mudzimu u na maanḓa a u itela Abrahamu vhana nga matombo haya! ₁₀Iṱali mbaḓo yo no ḓi dzula yo angaladzwa tsindeni ḽa muri; muri muṅwe na muṅwe une wa si aṋwe mitshelotshelo u ḓo remiwa wa kudzwa muliloni.

₁₁“Nṋe ndi ni lovhedza nga maḓi u sumbedza uri no laṱa vhuvhi haṋu, fhedzi hu si kale hu ḓo ḓa ane a mphira kule, lune ndi si vhuye nda fanela na u mu farela navhula dzawe; Ene u ḓo ni lovhedza nga Muya Mukhethwa na nga mulilo. ₁₂U ḓa o fara luselo lwawe. U ḓo fhefhera mavhele a a shela ḓuluni. Mungu wone u ḓo u fhisa nga mulilo u sa dzimi.”

₁₃Ndi hone hu tshi swika Yesu a tshi bva Galelia, a ḓa Jorodani ha Johanisi uri a lovhedzwe-vho ngae. ₁₄Johanisi a edzisa u hana a ri, “Ho vha ho fanela u lovhedzwa nṋe nga Vhone, zwino khezwi vha tshi ḓa kha nṋe!” ₁₅Yesu a mu fhindula a ri, “Ni songo hana hezwino: zwo ri fanela u ita hezwi uri ri khunyeledze zwoṱhe zwo tiwaho nga Mudzimu.” Ndi hone Johanisi a tshi tenda. ₁₆Yesu a ri u lovhedzwa, a tshi bva maḓini ḽiṱaḓulu ḽa mbo ḓi vulea, Johanisi a vhona Muya wa Mudzimu a tshi tsa e kha tshivhumbeo tsha ḽiivha a kavha kha Yesu. ₁₇Ha pfala ipfi ḽi bvaho ṱaḓulu ḽi tshi ri, “Hoyu ndi Murwa wanga muthihi fhedzi; u a ntakadza!”