MARKOSI 9

₁A tshi ralo o vha a tshi amba uri, “Zwino ipfani-ha: Hu na vhaṅwe henefha vhane vha sa ḓo fa vha sa athu vhona Mudzimu a tshi vhusa vhathuni nga maanḓa mahulu.”

₂Ho no fhela maḓuvha maṱanu na ḽithihi Yesu a ṱuwa na Pitrosi na Jakopo na Johanisi a gonya navho thavha ndapfu vhe nga tshavho; a shanduka vha tshi zwi vhona, ₃zwiambaro zwawe zwa thoma u penya, zwa tshena lune ha si vhuye ha vha na muthihi fhano shangoni ane a nga kona u zwi kuvha zwa tshena nga u ralo. ₄Ndi hone vhaḽa vhafunziwa vhararu vha tshi vhona Elia na Mushe vha tshi khou amba na Yesu. ₅Pitrosi a vhuya a bva mulomo a ri, “Vhafunzi, ro ita zwone ra ḓa fhano. Kha vha litshe ri fhaṱe thumba tharu; iṅwe i ḓo vha yavho, iṅwe ya vha ya Mushe iṅwe ya Elia.” ₆A tshi ralo ndi uri o vha a si tsha ḓivha zwine a nga amba, ngauri vho vha vho no tshenuwa nga maanḓa. ₇Ha mbo alama gole ḽa vha tiba nga murunzi waḽo, ha pfala ipfi ḽi tshi bva khaḽo ḽa ri, “Hoyu ndi Ene Murwa wanga muthihi fhedzi; ni mu pfe!” ₈Vha tshi posa maṱo ngei na ngei, vha vhona vho no sala na Yesu fhedzi, vhaḽa vhaṅwe vha si tsheeho. ₉Vha tshi vho tsa thavha Yesu a vha laya a ri, “Zwe na vhona ṋamusi ni songo vhuya na vhudza muthu, muthu Mubebwa-nga-muthu a sa athu vuswa vhafuni.” ₁₀Vha tenda zwe a vha laya, hone vha thoma u amba nga tshavho vha ri, “Nṋa a tshi ri ‘u ḓo vuwa vhafuni’ u ambani?” ₁₁Ndi hone vha tshi vhudzisa Yesu vha ri, “Khezwi vhaḓivhi vha Mulayo vha tshi ri hu fanela u thoma u ḓa Elia?” ₁₂Yesu a fhindula a ri, “Nangoho hu fanela u thoma u ḓa Elia uri a lugise zwoṱhe. Naho zwo ralo, khezwi Maṅwalo a tshi ri Mubebwa-nga-muthu u fanela u tambudzwa zwihulu na u nyadziwa? ₁₃Nṋe ndi ri Elia o no ḓi ḓa, hone vhathu vha mu ita nga u kona, nga he Maṅwalo a vha o amba ngaho.”

₁₄Musi vha tshi dovha u ṱangana na vhaṅwe vhafunziwa vha wana ho no vha na gogo ḽihulu, vhaṅwe vhaḓivhi vha Mulayo vha tshi khou ṱaṱa khani na vhafunziwa. ₁₅Musi vhathu vha tshi vhona Yesu vha kanuka nga maanḓa, vha gidima vha yo mu ṱanganedza. ₁₆Yesu a vha vhudzisa a ri, “Ni khou ṱaṱa khani ya mini?” ₁₇Muṅwe munna e vhukati ha gogo a fhindula a ri, “Vhafunzi, ndo ḓisa muṱhanngana wanga kha Vhone ngauri o dzhenwa nga thuṅwa ya Saṱhane, ha tsha kona u amba. ₁₈Musi thuṅwa i tshi vhinuwa i mu posa fhasi, a thoma u phukhula bulo a lumanya maṋo ha mbo ḓi vha u oma muvhili woṱhe. Ndo humbela vhafunziwa vhavho uri vha pandele thuṅwa iyo, hone vha kundwa.” ₁₉Yesu a mbo amba navho a ri, “Hee inwi ni sa fulufheli Mudzimu! Nṋa ndi ḓo vha na inwi u swika lini? Nṋa ndi ḓo ni konḓelela u swika lini? Ḓisani uyo muṱhannga kha Nṋe!” ₂₀Vha mbo ḓisa uyo muṱhannga khae, iyo thuṅwa ya ri u vhona Yesu ya mbo ḓi dzhenisa uyo muṱhannga tshifakhole, a wela fhasi a vhumbuluwa a tshi tou phukhula na bulo. ₂₁Yesu a vhudzisa khotsi a muṱhannga a ri, “Ndi tshifhinga tshingafhani zwo mu fara?” Khotsi a ṅwana a fhindula a ri, “U bva hanani hawe. ₂₂Ndi kanzhi thuṅwa i tshi linga u mu vhulaha nga u mu posa muliloni kana maḓini. Nga vha ri pfele vhuṱungu vha ri farise arali vha tshi zwi kona!” ₂₃Yesu a ri, “Ni ri ‘Ndi tshi kona’! Zwoṱhe zwi a konadzea kha muthu a re na lutendo.” ₂₄Khotsi a ṅwana a tou ambela nṱha a ri, “Lutendo ndi nalwo, hone kha vha khwaṱhise hune lwa ṱahela.”

₂₅Yesu a tshi vhona uri gogo ḽi ḓi hula ḽi tshi ya a kaidza thuṅwa a ri, “Iwe thuṅwa i no dzingisa nḓevhe na u ita muthu tshimuma, ndi ri u mbo ḓi bva kha muṱhannga uyu nahone u songo tsha dovha wa vhuya khae!” ₂₆Thuṅwa ya mbo ḓi zhamba, ya khwiḓukanya uyo muṱhannga a fa zwifakhole, ha mbo ḓi vha u bva hayo. Muṱhannga a sala o tou ṅwavha sa mufu, vhathu vhanzhi vha ri o fa. ₂₇Hone Yesu a mu fara nga tshanḓa a mu takusa, uyo muṱhannga a ima.

₂₈Musi Yesu o no dzhena nḓuni e na vhafunziwa vhawe fhedzi, vha mu vhudzisa vha ri, “Ndi mini riṋe ro kundwa u pandela iḽa thuṅwa?” ₂₉Yesu a tshi fhindula a ri, “Thuṅwa dzi no nga sa hei dzi nga si pandelwe nga tshiṅwe tshithu arali i si thabelo.”

₃₀Vha tshi bva henefho vha fhirela phanḓa nga u tou buḓekanya ḽa Galelia. Yesu Ene o vha a sa funi uri vhathu vha ḓivhe hune a vha hone, ₃₁ngauri o vha a tshi khou funza vhafunziwa vhawe a tshi ri, “Mubebwa-nga-muthu u ḓo kumedzwa vhathu, vha mu vhulaha, nga ḓuvha ḽa vhuraru hone u ḓo vuwa vhafuni.” ₃₂Hone vhone vha sa pfe uri iḽo ipfi ḽawe ḽi amba mini, vha dovha vha ofha na u mu vhudzisa.

₃₃Vha swika Kapernaumi, musi vho no dzhena nḓuni Yesu a vha vhudzisa a ri, “No vha ni tshi khou ṱaṱisana nga mini nḓilani?” ₃₄Vhone vha sokou fhumula, ngauri vho vha vho enda vha tshi khou ṱaṱa khani nga uri muhulwane khavho ndi nnyi. ₃₅Yesu a dzula fhasi, a vhidza vha 12 a vha laya a ri, “Ane a ṱoḓa u vha muhulwane u fanela u ḓiita muṱuku kha vhoṱhe, a vhe mushumeli wa vhoṱhe.” ₃₆Ndi hone a tshi dzhia ṅwana a mu imisa phanḓa havho, a mu kuvhatedza a ri, ₃₇“Ane a ṱanganedza muṅwe wa vhana havha a tshi itela Nṋe, u ṱanganedza Nṋe; ane a nṱanganedza ha ṱanganedzi Nṋe fhedzi, u ṱanganedza na o nthumaho.”

₃₈Johanisi a ri, “Vhafunzi, ro vhona muthu we a vha a tshi khou pandela thuṅwa ya Saṱhane nga dzina ḽavho, hone riṋe ra edzisa u mu dzivhisa vhunga e si muṅwe nga riṋe.” ₃₉Yesu a ri, “Ni songo mu dzivhisa; a hu na ane a ri o ita maḓembe nga dzina ḽanga, a mbo ḓi dovha a nnyefula. ₄₀Ane a si lwe na riṋe u ima na riṋe. ₄₁Zwino ipfani-ha: Ane a vhuya a ni ṋea maḓi a u nwa nge na vha vha Mesia ha nga kundwi u wana pfufho yawe.

₄₂“Ane a khakhisa muṅwe wa havha vhaṱoma vha mpfulufhelaho, ṱhamu yawe i ḓo fhira zwa musi o tou vhofhelelwa zwawe guyo mukuloni a poswa lwanzheni. ₄₃Ndi zwine nda ri, arali tshanḓa tshau tshi tshi ita uri u shandukele Mudzimu, tshi tumule. Ndi khwiṋe u wana vhutshilo vhu sa gumi u na tshanḓa tshithihi, u fhira u ya heleni muliloni u sa dzimi u na zwanḓa zwivhili. [ ₄₄Henengei mbungu dzi vha ḽaho a dzi fi, na mulilo wa hone a u dzimi.] ₄₅Arali mulenzhe wau u tshi ita uri u shandukele Mudzimu, u tumule! Ndi khwiṋe u wana vhutshilo vhu sa gumi u na mulenzhe muthihi, u fhira u poswa heleni u na milenzhe mivhili. [ ₄₆Henengei mbungu dzi vha ḽaho a dzi fi, na mulilo wa hone a u dzimi.] ₄₇Arali iṱo ḽau ḽi tshi ita uri u shandukele Mudzimu, ḽi nongole! Ndi khwiṋe u dzhena muvhusoni wa Mudzimu u na iṱo ḽithihi, u fhira u poswa heleni u na maṱo mavhili. ₄₈Henengei mbungu dzi vha ḽaho a dzi fi, na mulilo wa hone a u dzimi.

₄₉“Unga nduvho thembeleni i tshi kumululwa nga muṋo, nga u ralo u tambula haṋu ndi mulilo une wa ni kumulula ni konou vhulungea. ₅₀Muṋo ndi tshithu tshavhuḓi, hone wa vhuya wa fhela vhuhali hawo u sa tsha dunga, u nga dovha wa dungiswa ngani? Ivhani vho lungwaho nga inwi vhaṋe, ni pfane nga tshaṋu.”