1-2Vho balanganywaho na shango vha ḓo vhuelela Juda
ni tshi zwi vhona.
Muṋe washu u ḓo vhuya khathihi na vhugala
ha vhaḓuhulu vha Jakopo,
vhone Vhaisraele,
naho vho vha vho ṱangulwa nga vhaṱanguli,
vha kandekanya minḓirivhe yavho.
Inwi vha Ninive,
vhane vha ḓo ni phusukanya vho no vha nḓilani.
Vha ḓo runga mmbi dzaṋu!
Imani tshiingamoni!
Lindani magondo!
Ambarani mafumo!
Dzudzanyani mmbi dzaṋu!
3Mmbi dza Muṋe washu khedziḽaa dzo swika!
Zwiṱangu zwa vhahali vhawe zwo tswuka,
vhahali vhawe vho ambara tswuku.
Gariki dza nndwa dzi ofhisa unga mulilo
nga ḓuvha ḽe Muṋe washu a vhea.
Vhathu vha ri u vhona dzibere vha tetemela.
4Gariki dza nndwa dzi gidima na magondo,
dzi zhaka maṱaka dza nga dzi sa fhufha.
Dzi nga khavhu ya mulilo,
dzi gidimela ngeno na ngeno unga lupenyo.
5Vhahali vha Muṋe washu vho ḓiṋea nungo,
a vha imiswi nga tshithu;
vha gidimela mutsheṱoni wa muḓi,
matanda a u thutha mutsheṱo o lugisiwa.
6Khoro dzo livhaho mulamboni dzi a vuliwa,
vha pfamoni ya khosi vha vho ṋoka,
7mufumakadzi a hwalwa a iswa vhuthubwani,
phuli dzawe dza vhasidzana dzi khou khwikhwidzwa,
dza ḓirwa dzikhana nga u pfa vhuṱungu
dzi tshi lila unga maivha.
8Vhathu vha gidima vha tshi shavha muḓini wa Ninive
unga maḓi o phamula damu.
Hu huwelelwa ha pfi,
“Humani! Humani!”
Ha si vhe na a humaho.
9Thubani siliva! Thubani musuku!
Muḓi uno wo ḓala lupfumo lu si na vhukono!
Iḓani ni vhone thundu dzo nakaho!
10Wo ṱangulwa, wo phusukanywa, wo sala u fhedzi!
Mbilu dzi a ṋoka,
magona a vho tetemela,
vhoṱhe vho farwa nga nyofho,
zwifhaṱuwo zwoṱhe zwo tswukuluwa nga u tshenuwa.
11Bako ḽa ndau ḽi ngafhi zwino,
fhethu he ha vha hu tshi ḽa vhana vhadzo,
he ndau ya nduna na ya tsadzi dza vha dzi tshi ya hone,
dza shuvhama dzi sa ofhi tshithu?
12Ndau yo vha i tshi pondela vhana vhayo, vha ḽa vha fura,
ya fhandula phukha i tshi itela musadzi wayo,
ya ḓadza vhudzulo hayo nga zwe ya vhulaha,
bako ḽayo ḽa ḓala zwe ya ponda.
13Muṋe washu Mulangazwoṱhe u ri,
“Ndi khou lwa na iwe.
Ndi ḓo fhisa gariki dzau dza nndwa ha duba vhutsi,
pfumo ḽi ḓo ḽa ndawana dzau.
A thi nga u sieli tshine wa ḓo ponda fhano shangoni.
Maipfi a vhaḓinḓa vhau ha tsha ḓo dovha a pfala.”
