MIRERO 13

₁Ṅwana wa vhuṱali u a thetshelesa khotsi awe a tshi mu laya;

mudzia-u-kola ha pfi u kaidzwa.

₂Muthu u ḽa zwivhuya zwe a wana nga u amba;

wa vhufhura u tshila nga vhuvemu.

₃U fara lulimi ndi u vhulunga vhutshilo;

u amba u sa londi ndi u ḓilozwa.

₄Mubva u tama tshithu a si tshi wane;

mushumi wa biko u fushwa nga zwinzhi.

₅Ane a thetshelesa Mudzimu u vhenga mazwifhi;

muvhi ene u ita zwi shonisaho a niwa nga ṱhoni.

₆Muthu a sa solisei u londolwa nga vhuvhuya hawe;

muvhi u tekulwa nga vhuvhi hawe.

₇Hu na ane a ḓiita mupfumi ngeno a si na tshawe,

muṅwe a ḓiita mushai e na lupfumo luhulu.

₈Lupfumo lwa mupfumi lu nga vha tshipfumelo tshawe;

mushai ene ha londi u shushedzwa.

₉Tshedza tsha a thetshelesaho Mudzimu tshi tou penya;

luvhone lwa muvhi lwone lu a dzima.

₁₀U ḓihudza hu vusa nndwa;

ane a tenda u eletshedzwa u na vhuṱali.

₁₁Lupfumo lune wa sokou lu wana a lu lengi u fhalala;

ane a kuvhanganya nga zwiṱuku u andisa lupfumo lwawe.

₁₂Wa kundwa u wana zwe wa zwi lavhelela zwi lwadza mbilu;

zwine wa zwi tama zwa khunyelela zwi u ṋea vhutshilo.

₁₃Tshilamba-u-vhudzwa ndi tshilila-u-vhona;

ane a tenda u laiwa u ḓo pfufhiwa.

₁₄Pfunzo ya muṱali ndi tshisima tsha vhutshilo;

i humisa muthu o livha zwikwekweni zwa lufu.

₁₅Hu takalelwa a na ṱhalukanyo;

vha sa fulufhedzei vho fara i isaho lufuni.

₁₆Wa vhuronwane u ita zwithu nga vhusedzi;

veveru ḽone ḽi anḓadza vhutsilu haḽo.

₁₇Muḓinḓa muvhi u wedza vhathu khomboni;

a fulufhedzeaho ene u a vha fhodza.

₁₈Ane a nyadza u laiwa, u vha mushai, a shona;

ane a thetshelesa a tshi kaidzwa, ene u a huliswa.

₁₉Muthu a wana zwine a zwi tama u rudza mbilu;

tsilu ḽone a ḽi funi u furalela vhuvhi.

₂₀A tshimbilaho na vhaṱali u a ṱalifha;

a konanaho na matsilu u a tsilufhala.

₂₁Vhatshinyi khombo a i vha humeli;

vha thetshelesaho Mudzimu vha pfufhiwa nga zwivhuya.

₂₂Muvhuya u siela vhana vha vhana vhawe ifa;

lupfumo lwa mutshinyi lwone lu khokhelwa vha thetshelesaho Mudzimu.

₂₃Mukhatho wa mushai u nga bveledza zwiḽiwa zwinzhi,

hone ha sa vha na mulayo u a kumbwa.

₂₄A sa rwiho ṅwana wawe u a mu vhenga;

ane a mu funa u mu laṱisa a tshee nga hawe.

₂₅A thetshelesaho Mudzimu u ḽa a fura;

thumbu ya muvhi yone i ṱwa na nḓala.