DZIPHISALEMA 102

₁Muṋe washu, ipfa thabelo yanga;

ngavhe mukosi wanga u tshi swika ha Iwe!

₂U songo mpfuralela musi wa khombo;

nḓevhe yau nga i nthetshelese ndi tshi vhidzelela,

ṱavhanya u mphindula.

₃Maḓuvha anga a nyamalala

unga vhutsi;

muvhili wanga u tou duga,

₄mbilu yanga yo oma,

yo puta unga hatsi;

ndi ita na u hangwa u ḽa.

₅Ndo tou sala ndi lwatsi,

nga u ṱavha mukosi ndi tshi gomela.

₆Ndi nga tshikwitha phangani,

gwitha matumbani,

₇a thi fari khofhe;

ndi nga tshiṋoni tsho salaho tshi tshoṱhe

tshiuludzani tsha nnḓu.

₈Maswina anga a nkolela ḓuvha ḽoṱhe;

vha teketelana nga dzina ḽanga.

₉Zwiḽiwa zwanga ndi milora;

tshine nda nwa ndi tshi vanga na miṱodzi,

₁₀nga ṅwambo wa mbiti dzau dzi ofhisaho.

Wo nndoba wa mposa kule.

₁₁Vhutshilo hanga vhu nga mirunzi ya nga madekwana

i sa lengi u milwa nga vhusiku;

ndi puta unga hatsi.

₁₂Hone Iwe Muṋe washu

wo dzula kha khuluṋoni lini na lini,

mirafho na mirafho a i u hangwi.

₁₃U ḓo takuwa wa khathutshela Tsioni;

ndi tshone tshifhinga tshine wa ḓo u pfela vhuṱungu;

tshifhinga tsho tiwaho tsho swika.

₁₄Riṋe vhalanda vhau ri kha ḓi funa matombo awo,

ri tshi vhona matumba awo ri a ṱungufhala.

₁₅Tshakha dzi ḓo ofha dzina ḽau,

Muṋe washu,

mahosi oṱhe a ḽifhasi a ḓo tata vhugala hau,

₁₆nga u vhona Muṋe washu o vusa Tsioni,

e bvelele e kha lupenyo lwawe.

₁₇Ha nga nyadzi khumbelo dza vho ṱangulwaho,

u ḓo pfa thabelo dzavho.

₁₈Hezwo nga zwi ṅwalelwe murafho u kha ḓi ḓaho,

uri lushaka luswa lwa Muṋe washu lu mu rende lu ri,

₁₉“Muṋe washu o sedza fhasi e hukhethwa ngei nṱha,

a vhona ḽifhasi e ṱaḓulu,

₂₀a pfa zwigomelo zwa mathubwa,

a vhofholola vho haṱulelwaho lufu.”

₂₁Ndi zwine dzina ḽa Muṋe washu ḽa ḓo ḓivhadzwa Tsioni,

a rendwa Jerusalema,

₂₂musi dzitshakha na mivhuso vha tshi kuvhanganela

u luvha Muṋe washu.

₂₃O mmvunḓa nungo ndi tshi kha ḓi vha nga hanga,

a fhungudza maḓuvha anga.

₂₄Ndi zwine ndi tshi amba nae nda ri,

“Yawee, Mudzimu wanga,

u songo nṱuwisa ndi sa athu kalaha;

hufha Iwe u tshi tshila lini na lini.

₂₅“Ḽifhasi wo ḽi tea kale-kale;

ḽiṱaḓulu ndi mushumo wa zwanḓa zwau.

₂₆Zwone zwi ḓo lovha,

Iwe wa ḓi sala;

zwoṱhe zwi ḓo ṱahala unga nguvho,

wa bvula wa laṱa;

₂₇hone Iwe u ḓi dzula wo ralo,

miṅwaha yau a i gumi.

₂₈Vhana vhashu vha ḓo tshila nga mulalo,

na vhaḓuhulu vhavho vha ḓo tsireledzwa nga Iwe.”