DZIPHISALEMA 143

₁Muṋe washu, ipfa thabelo yanga,

nthetshelese ndi tshi u lilela;

mphindule,

u na ngoho, u a fulufhedzea.

₂U songo vhuya wa ntsengisa;

kha vhoṱhe vha tshilaho,

ndi nnyi ane wa mu vhona e muvhuya?

₃Swina ḽanga ḽo ntsala murahu,

ḽo ntsimbeledzela fhasi,

ḽo ntsukumedzela swiswini,

ha vho faho kale.

₄Ndi vho ṱoḓa na u ṱovhowa,

mbilu yanga yo hanganea.

₅Ndi elelwa maḓuvha aḽa a kale;

ndi elekanya zwoṱhe zwe wa nnyitela,

nda humbula zwe zwanḓa zwau zwa shuma.

₆Ndi livhisa zwanḓa zwanga ha Iwe,

nda u rabela;

ndo lavhelela phindulo yau,

unga mavu o omaho o lindela mvula.

₇Muṋe washu, ṱavhanya u mphindula,

muya wanga u a kundelwa;

u songo mpfuralela,

ndi sa ḓo fana na vhane vha godimela tshaloni.

₈Ḽi tshi tsha kha ndi vhone vhuthu hau,

nṋe ndi fulufhela Iwe,

ndi ḓikumedza Iwe,

ntsumbedze nḓila ine nda fanela u i fara.

₉Muṋe washu, ndi dzumbama nga Iwe,

nndamukise kha maswina anga.

₁₀U Mudzimu wanga,

mpfunze u ita zwine wa funa;

Muya wau muvhuya nga a nnyendedze ho linganelaho.

₁₁Muṋe washu, ntshidze u tshi itela dzina ḽau;

u a fulufhedzea, nṋule khomboni.

₁₂Maswina anga a fhedze oṱhe,

hufha lufuno lwau lu sa tseki;

lozwa vhakandeledzi vhanga,

hufha ndi mulanda wau.