DZIPHISALEMA 68

₁Mudzimu u khou vuwa u balanganya maswina,

vha mu vhengaho vha shavha vha tshi fhufhura nḓevhe.

₂U vha balanganya unga vhutsi;

Mudzimu a tou bvelele,

vhavhi vha a lovha

unga phula i tshi ṋoka muliloni.

₃Vha no fulufhedzea vhone

vha a pembela Mudzimu a tshi swika,

vha ṱavha mukosi nga dakalo.

₄Imbelani Mudzimu,

rendani dzina ḽawe nga nyimbo,

Munamelamakole,

mu lugiseleni nḓila!

U pfi Muṋe washu, mu fhululedzeni!

₅Mudzimu a no dzula fhethu hawe hukhethwa,

ndi Khotsi a tsiwana, Mulwelatshilikadzi.

₆Vha si na vhudzulo Mudzimu u vha fhaṱela mahaya,

zwivhotshwa a zwi vhofholola,

hone mavhanga a ḓo dzula makwarani.

₇Mudzimu,

zwiḽa u tshi endedza vhathu vhau,

u tshi buḓekanya phanga,

₈ḽifhasi ḽo dzinginyea,

ḽiṱaḓulu ḽa shulula mvula,

hu tshi swika Mudzimu wa Sinai,

hu tshi ḓa Ene Mudzimu wa Israele.

₉Mudzimu, wo nisa mvula nnzhi,

shango ḽau ḽo bvaho ḽa dovha ḽa vuwa,

₁₀vhathu vhau vha dzula khaḽo,

Iwe Mudzimu wa tonda vhaheḓana nga vhuthu hau.

₁₁Muṋe wa zwoṱhe o ṋea ndaela,

vhasadzi vhanzhi

vha mbo ḓi anḓadza ayo mafhungo,

vha ri,

₁₂“Mahosi a maswina ashu a khou shavha,

mmbi dzavho dzo hasekana!”

Vhasadzi hayani vha kovhekana zwo thubwaho:

₁₃Zwifanyiso zwa maivha zwo fhomiwaho nga siliva,

phapha dzao dzi penya musuku u songo vangiwaho.

(Ndi mini vhaṅwe vha tshee vho dzula

zwitumbani zwa dzinngu?)

₁₄Zwiḽa Ramaanḓaoṱhe a tshi balanganya mahosi

Thavhani ya Tsalimoni,

o nisa mahaḓa.

₁₅Thavha dza Bashani dzo hula hani,

dzi na miṱumba minzhi!

₁₆Ni itelani vivho, inwi dzithavha dza miṱumba minzhi?

Ni vhivhelani thavha ye Mudzimu a ḓikhethela

uri a dzule khayo?

Muṋe washu u ḓo ḓi dzula khayo lini na lini!

₁₇Muṋe wa zwoṱhe u bva Sinai a tshi ḓa fhethu hawe hukhethwa,

e na gariki dzawe dza nndwa dza maanḓa,

dza zwigidi na zwigidi.

₁₈O thuba mathubwa manzhi,

a gonya nao nṱha,

a ṋewa nduvho nga vhathu,

na mavhanga a mu luvha;

Mudzimu Muṋe washu u ḓo dzula henengei.

₁₉Nga hu rendwe Muṋe wa zwoṱhe ḓuvha na ḓuvha;

u a ri hwala,

ndi Ene Mudzimu Mutshidzi washu.

₂₀Mudzimu washu ndi Mudzimu Mutshidzavhathu;

ndi Muṋe washu,

ndi Muṋe wa zwoṱhe,

u ri lamukisa lufuni.

₂₁Ngoho Mudzimu u ḓo devhekanya ṱhoho dza maswina awe;

vhane vha ṱana milandu yavho u ḓo pwasha dethele ḽavho

ḽo lukwaho mavhudzi.

₂₂Muṋe wa zwoṱhe o amba a ri,

“Ndi ḓo vhuisa vhathu vhanga vha tshi bva Bashani,

naho vho mbwandamela vhudzivhani ha lwanzhe,

ndi ḓo vha ṋula,

₂₃uri vha ṱambe milenzhe nga malofha a maswina,

mmbwa dzavho dzi a ṋanzwe dzi fure.”

₂₄Mudzimu, wo vhonwa nga vhoṱhe

u tshi ḓala muḓalo wó kunda,

vha vhona u tshi dzhena fhethu hau hukhethwa,

Iwe Mudzimu wanga, Khosi yanga,

₂₅wó tangwa nga vhaimbi na vhalidzi vha zwilidzo,

vhasidzana vha tshi khou lidza tshele.

₂₆Vhumbani dzikhwairi ni imbele Mudzimu,

rendani Muṋe washu,

inwi vhaḓuhulu vha Jakopo!

₂₇Ngoyu Benyamini, ene muṱuku,

o vha ranga phanḓa,

ha tevhela vhahulwane vha Juda na tshigwada tshavho,

na vhahulwane vha Zebuloni,

na vha Nafuthali.

₂₈Mudzimu, sumbedza maanḓa au,

maanḓa e wa ri tshidza ngao,

₂₉a tshi bva thembeleni Jerusalema,

hune mahosi vha u ḓisela nduvho.

₃₀Kaidza Egipita,

heḽiḽa buka ḽi dzulaho ṱhangani;

kaidza dzitshakha,

heḽo sambi ḽa dzimboho na ṋamana dzadzo,

vha vhuya vha u khotha vha ṋekedza siliva.

Balanganya havho vhathu vha no funa nndwa!

₃₁Hu ḓo ḓa vhaḓinḓa vha tshi bva Egipita,

vha luvha Mudzimu nga zwifulwa zwa musinaseṱha;

Vhakushu vha ḓo rabela Mudzimu vhó imisa zwanḓa.

₃₂Inwi mivhuso ya shango,

imbelani Mudzimu,

rendani Muṋe wa zwoṱhe nga nyimbo,

₃₃Ene Munamelalutombo,

lutombo lwa kale-kale!

Thetshelesani a tshi bvumisa he ngindii-ngindii.

₃₄Ḓivhadzani maanḓa a Mudzimu,

u vhusa Israele nga vhugala,

maanḓa awe a fhira lutombo.

₃₅Mudzimu u ofhisa hani

a tshi bva fhethu hawe hukhethwa!

Ndi Ene Mudzimu wa Israele;

u ṋea vhathu vhawe nungo na maanḓa.

Mudzimu nga a rendiwe!