VHAROMA 5

₁Zwino ri tshi vho pfi vhavhuya nga u fulufhela Yesu, ro pfumedzanywa-ha na Mudzimu nga Muṋe washu Yesu Khristo. ₂Ndi Ene Khristo we a ri swikisa kha vhuthu ha Mudzimu he ra ima khaho zwino, ra vho tou pembela ro lavhelela vhugala ha Mudzimu vhune ra ḓo wana. ₃Nahone a ri pembeleli hezwo fhedzi, ri pembelela na hone u tambudzwa, nga u ḓivha uri u tambudzwa hu ḓisa u konḓelela, ₄u konḓelela ha ita uri ri si dzinginyee, zwenezwo zwa ita uri ri ṱulutshele Mudzimu, ₅huno a ṱulutshelaho Mudzimu ha nga shoni, ngauri Mudzimu o ḓadza mbilu dzashu nga lufuno lwawe nga u ri ṋea Muya Mukhethwa.

₆A thi ri Khristo o ri musi ri sa athu vha na tshine ra kona, a fela riṋe vhavhi nga tshifhinga tsho fanelaho. ₇A si kanzhi muthu a tshi nga fela muṅwe, naho onoyo a si na mulandu. Naho zwo ralo arali e muvhuya khamusi muṅwe a nga ḓifunga a mu fela. ₈Atsina Mudzimu u ri sumbedza lufuno lwawe nga Khristo a tshi ri fela ri tshee vhatshinyi. ₉Zwino ró no pfi vhavhuya nga malofha awe, u ḓo kundwa ngani u ri tshidza kha ṱhamu ya Mudzimu? ₁₀Arali ro pfumedzanywa na Mudzimu nga u fa ha Murwa wawe zwiḽa ri tshee maswina awe, zwino ró no pfumedzanywa ri nga kundwa hani u tshidzwa nga u tshila hawe? ₁₁Hone a si hezwo fhedzi; ri vho tou zuwa Mudzimu nga Muṋe washu Yesu Khristo we a ri pfumelela.

₁₂Edzonu pfa: Vhutshinyi ho dzhena shangoni nga muthu muthihi, hone ha ḓisa lufu, lufu lwa ṱanganya vhathu vhoṱhe nge vha vha vho tshinya vhoṱhe. ₁₃Mulayo u tshi ḓa wo wana vhutshinyi vhu hone shangoni; hone naho muthu a tshi tshinya, ha pfi u na mulandu arali hu si na mulayo. ₁₄Naho zwo ralo lufu lwo ḓi vhusa u bva kha Adamu u swika kha Mushe, hu tshi fa na vha songo tshinyaho sa Adamu we a fa nge a pfuka mulayo – Adamu ene-ha a tshi vhambedzwa na we a ḓa ngavhuya. ₁₅U khakha ha Adamu hu nga vhuya ha vhambedzwa na u tonda ha Mudzimu naa? Ndi zwone, vhe vha fa nga u khakha ha muthu muthihi ndi vhanzhi, hone zwe Mudzimu a ṋea vhanzhi nga vhuthu hawe nga onoyo muṅwe muthihi a re Yesu Khristo zwi fhira kule vhukhakhi ha uḽa wa u thoma. ₁₆Huno zwi no bva kha tshifhiwa tsha Mudzimu zwi fhira zwi no bva kha vhutshinyi ha uḽa muthihi. U tshinya kathihi ho ḓisa khaṱhulo ya u laṱwa; hone ró no khakha hunzhi ra ṋewa itsho tshifhiwa ra vho pfi a ri na mulandu. ₁₇Nangoho nga u khakha ha muthu muthihi lufu lwa mbo ḓi thoma u vhusa nga mulandu wa onoyo muthihi. Zwino tshifhiwa tsha u pfi vhavhuya tshi fhira kule vhuḽa vhukhakhi, zwenezwo vhe vha tshi wana vha ḓo kundwa nga mini u tshila na u vhusa nga zwe zwa itwa nga uḽa muṅwe muthihi a re Yesu Khristo?

₁₈Izwo-ha vhunga vhathu vhoṱhe vho laṱwa nga u khakha ha muthihi, sa zwenezwo vhathu vhoṱhe vha vho pfi a vha tshee na mulandu, kha vha tshile, nge ha vha na muthihi o itaho zwivhuya. ₁₉Unga vhanzhi vho pfi ndi vhatshinyi nga u sa pfa ha muthu muthihi, sa zwenezwo vhanzhi vho ḓo pfi vhavhuya nge ha vha na muthihi ane a thetshelesa Mudzimu.

₂₀Hu tshi vho dzhena Mulayo ho vha u itela uri u khakha hu mbo ḓi tou anda; zwino he ha anda vhutshinyi, na tshilidzi tsha kalula, ₂₁hu u itela uri unga kale ho vha hu tshi vhusa vhutshinyi nga lufu, zwino hu vhuse tshilidzi ri tshi pfi vhavhuya nga zwe zwa shuṅwa nga Yesu Khristo Muṋe washu, uri ri kone u wana vhutshilo vhu sa gumi.