SIRAKHA 20

₁Hu na u kaidza muthu

nga tshifhinga

tshi songo fanelaho;

ha vha na muthu ane a vhonala ó ṱalifha

nga u kanda mupfa a tshi u vhona.

₂Hone ndi khwiṋe u laya muthu

u fhira u sinyutshela mbiluni.

₃Muthu a no tenda vhukhakhi ha nga laṱiswi.

₄Muthu a no kombetshedza muthu u ita zwi re zwone a sa funi,

zwi nga muluvhedzwa a tshi edzisa u binya khomba.

₅Hu na muthu ane a fhumula, ha pfi o ṱalifha,

muṅwe a ambesa, vhathu vha mu nyala.

₆Hu na muthu ane a fhumula nga u shaya phindulo,

muṅwe a fhumula

ó lindela tshifhinga tshine a ḓo amba.

₇Muṱali ha ambi tshifhinga tshi sa athu swika,

hone vavhi a ḽi lindeli tshifhinga tsho fanelaho.

₈Muthu ane a ambesa u a nengisa, ane a ḓiita khosi u a vhengwa.

₉Hu na khombo dzine dza ḓisa zwivhuya,

ha vha na mashudu ane a beba mutshinyalo.

₁₀Hu na zwifhiwa

zwine muṋei zwa si mu farise tshithu,

ha vha na u ṋea muṅwe, wa vhuelwa kavhili.

₁₁Hu na u huliswa hune ha ṱula u ṱukufhadzwa,

ha vha na u nyadziwa hune ha ṱula u hulisiwa.

₁₂Hu na muthu a no renga zwinzhi nga mutengo muṱuku,

a vho zwi lifha kaṱanu na kavhili.

₁₃Muṱali u ḓifunisa nga maipfi a si gathi,

hone vhuthu ha tsilu ha vha mahandana.

Tshifhiwa tsha tsilu a tshi u vhuedzi tshithu,

ngauri ḽi tama u vhuelwa kaṱanu na kavhili.

₁₄ḽi u ṋea zwi si gathi,

ḽa endela u gungula,

ḽa ṱavha mukosi unga muḓinḓa wa musanda.

₁₅ṋamusi ḽi a hadzima,

matshelo ḽa vho vhila,

vhukuma muthu o raloho u a nengisa.

₁₆Tsilu ḽi ri, “Thi na khonani!

Ndi livhuhiwa nga mpama!

₁₇Vhaḽanawe ndi vhavhulahi.”

Ndi vhangana, ndi lungana vha tshi mu sea!

₁₈U suvha wa wela fhasi zwi khwiṋe u fhira u suvha ha lulimi;

ndi kwone kulovhele kwa muvhi a wela fhasi e bi.

₁₉Muthu a sa londi u nga lungano lwa mafhafhaḓo

lu no anewa nga vavhi lwa dovha.

₂₀Murero wa tsilu u a landulwa,

nge a si u ambe nga tshifhinga tsho fanelaho.

₂₁Vhushai vhu nga kundisa mushai u tshinya,

a konou lala a si na luvalo.

₂₂ṱhoni dzi songo fanelaho dzi ṱula ndozwo,

wa lovha nga u ofha u solwa nga tsilu.

₂₃Wa fulufhedzisa khonani zwithu u tshi itwa nga ṱhoni,

ni ḓo vha maswina zwi songo vhuya zwa fanela.

₂₄Mazwifhi ndi dondo ḽivhi kha muthu,

nangwe zwo ralo,

a dzula e mulomoni wa khundavhalai.

₂₅Fobvu ḽi khwiṋe u fhira muthu a no endela u zwifha,

naho vhoṱhe vhuvhili havho vha tshi ḓo lovha.

₂₆Mazwifhi ndi maitele a nengisaho,

samba ḽa mudziauzwifha a ḽi mu ṱutsheli.

₂₇Muṱali u bvela phanḓa nga maipfi awe,

muthu wa ṱhalukanyo u takadza vhahulwane.

₂₈Mulimi wa tsimu u ḓo khokha khaṋo;

ane a takadza vhahulwane u hangwelwa milandu yawe.

₂₉Thwala na tshanḓanguvhoni zwi pofulisa maṱo a muṱali,

zwi fhumudza muthu nga tshivalamulomo,

a si tsha kaidza mutshinyi.

₃₀Hu vhuṱali ho dzumbiwaho,

hu lupfumo lu sa ḓivhei,

vhuvhili hazwo zwi farisani?

₃₁Tsilu ḽi no dzumba vhutsilu haḽo

ḽi khwiṋe u fhira muṱali a no dzumba vhuṱali hawe.