Vhabebi vha a huliswa
1Inwi vhana, nthetsheleseni, ndi khotsi aṋu.
Itani zwine nda ni vhudza uri ni tshile.
2Muṋe washu u hulisa khotsi u fhira vhana vhawe,
a imelela pfanelo ya mme kha vhana vhawe.
3Muthu ane a hulisa khotsi awe u pfumelelwa vhutshinyi hawe;
4u hulisa mme ndi u khokha lupfumo.
5Ane a hulisa khotsi awe,
na ene u ḓo takadzwa nga vhana vhawe,
a tshi rabela thabelo yawe i a pfiwa.
6Ane a hulisa khotsi awe u ḓo lalama,
ane a thetshelesa Muṋe washu u takadza mbilu ya mme awe.
7Muthu onoyo u ofha Muṋe washu khathihi na vhabebi.
8Hulisa khotsi au nga maipfi au na nga zwine wa ita,
uri vha u shudufhadze;
9mashudu a bvaho kha khotsi a ita uri vha muṱa vha ṱoke midzi,
ngeno tsaṅwa ya mme i tshi tupula miteo yawo.
10U songo ri “Koṱo!”
arali khotsi au a tshi welwa nga zwi nyadzisaho;
u shoniswa ha khotsi au a zwi u hulisi,
11khotsi au a tshi huliswa, na iwe u a huliswa,
mme a nyadziwa, na vhana vha a nyadziwa.
12ṅwananga, londola khotsi au musi vho no kalaha,
vhutshilo havho hoṱhe u songo vhuya wa vha ḽisa mbilu.
13Nangwe vha si tshee na maano, vha itele vhuthu,
naho u na maanḓa, wó takala, u songo vha nyadza.
14Vhuthu vhune wa itela khotsi au vhu nga si hangwiwe,
vhu ḓo u pfumelela vhutshinyi hau.
15Musi u tshi hula-vho Mudzimu u ḓo zwi elelwa;
zwi ḓo ṋokisa vhutshinyi hau
unga ḓuvha ḽi tshi ṋokisa mahaḓa.
16Muthu ane a ṱamba khotsi awe
u nga a tambaho nga Mudzimu,
ane a sinyusa mme awe o teketelwa nga Muṋe washu.
U ḓiṱukufhadza
17ṅwananga, shuma mishumo yau nga u ḓiṱukufhadza,
ndi hone u tshi ḓo funwa u fhira na mapakulile.
18Musi u tshi ḓi huliswa u tshi ya, u ḓi ḓiṱukufhadze u tshi ya,
ndi hone Muṋe washu a tshi ḓo u takalela.
20Mudzimu naho e Ramaanḓa,
u tenda u huliswa nga vhane vha ḓiṱukufhadza.
21U songo ḓidzhenisa kha mafhungo ane a u fhira,
u songo londolosa zwine zwa fhira nungo dzau.
22Zwe zwa kumedzwa iwe, zwi shume,
zwe zwa dzumbiwa a si zwau.
23Zwine zwa fhira ṱhalukanyo yau
u songo dzhenelela khazwo,
hufha wo no ḓi sumbedzwa zwithu
zwi no fhira ṱhalukanyo ya muthu.
24Ho no ḓi xedzwa vhanzhi
nga mihumbulo yavho vhone vhaṋe,
nge vha tshinywa mihumbulo nga vhuḓihudzi vhuvhi.
U ḓihudza
26Mbilu ya tshipimbi zwi ḓo sala zwi tshi i vhifhela;
ane a tamba nga khombo u ḓo lovhela khayo.
27Mbilu ya tshipimbi i ḓo ṱangana na vhuleme vhunzhi;
mutshinyi u khokha vhuvhi kha vhuvhi.
28Vhulwadze ha muḓihudzi a vhu lafhei,
hufha tshilimbwane tsha vhuvhi tsho no ḓi ṱoka midzi khae.
29Muṱali u dzula a tshi elekanya mirero,
nḓevhe i thetshelesaho i takadza muṱali.
U tonda vhashai
30Maḓi a dzima mulilo u dugaho; u ṋea vhashai zwifhiwa
zwi pfumelela vhutshinyi hau.
31Mutondi ane a tonda mutondi ngae o fhahea,
zwi tshi vho mu vhifhela
u ḓo fhahulula.
