SIRAKHA 35

₁Muthu a no vhulunga Mulayo

u ṋekedza zwiṱhavhelo zwinzhi,

a no tevhedza milayo u ṋekedza nduvho dza u konana na Muṋe washu.

₂Muthu u sumbedza u livhuha Mudzimu

nga u ṋekedza nduvho ya vhukhopfu vhusekene;

a no ṋea vhashai zwifhiwa ndi nduvho ya thendo.

₃U laṱa vhuvhi ndi zwone zwi takadzaho Muṋe washu;

u khaukana na vhutshinyi ndi nduvho ya tshipfumelo.

₄U songo ḓa phanḓa ha Muṋe washu ú songo fara tshithu,

ngauri izwo zwoṱhe ndi zwine ra laedzwa nga mulayo.

₅Tshiṱhavhelo tsha muvhuya tshi ṱama aḽiṱari,

tshi nukhelela u ḓifha phanḓa ha Waṱaḓuluṱaḓulu.

₆Tshiṱhavhelo tsha a si na vhufhura tshi a ṱanganedzwa,

tshi nga si vhuye tsha hangwiwa.

₇Hulisa Muṋe washu nga u ṋekedza nduvho

u si na vhutshivha;

u tshi ṋekedza mitshelo ya u ranga ye wa lima,

u ṋekedze u sa gunguli.

₈Nduvho iṅwe na iṅwe

i ṋekedze tshifhaṱuwo tshau tsho tsha,

u bvise tshafumi tshau wo takala.

₉Waṱaḓuluṱaḓulu u mu ṋee unga Ene o u ṋea,

u vhe mapakulile.

₁₀Muṋe washu u pfufha muthu nga ho fanelaho;

u ḓo u pfufha kaṱanu na kavhili.

₁₁U songo mu ṋekedza zwa tshanḓanguvhoni;

izwo ha zwi ṱanganedzi.

U songo fulufhela zwe wa ṋekedza u tshi itwa nga zwi si zwone.

₁₂Ndi uri Muṋe washu ndi muhaṱuli a sa khakhi;

Ene ha khethi ṋamana nga matombo.

₁₃Ha laṱi mushai a tshi haṱula,

u pfa tshililo tsha mukandeledzwa.

₁₄Tsiwana dzi tshi lila ha thivhi nḓevhe dzawe,

na tshilikadzi

i tshi ṱanza zwa mbiluni u a zwi pfa.

₁₅Miṱodzi ya tshilikadzi i tshi elela shamani

ha khou hwelela uyo we a ita uri i rothe kani?

₁₆A no shumela Mudzimu nga mbilu yoṱhe

u ḓo ṱanganedzwa,

thabelo yawe i swika makoleni.

₁₇Thabelo ya a no ḓiṱukufhadza

i phuletshedza makole,

ha rudzi mbilu i sa athu swika ha Muṋe washu.

₁₈Ha litshi u rabela

Waṱaḓuluṱaḓulu a vhuya a mu fhindula,

a haṱula a ri ha na mulandu.

₁₉Vhukuma Muṋe washu ha nga lengi,

u ḓo vha lwela a sa ongolowi,

₂₀a vhuya a vunḓa muṱoḓo wa a sa khathutsheli,

a lifhedza dzitshakha,

₂₁a lozwa magogo a vha lunyadzo, a vunḓekanya luḓo lwa vhavhi,

₂₂a lifhedza tshakha a tshi tevhedza zwe dza ita,

a lifhedza vhathu a tshi tevhedza mihumbulo yavho,

₂₃a pilela vhathu vhawe,

a vha takadza nga khathutshelo yawe.

₂₄Khathutshelo yawe i takalelwa musi wa khombo,

unga makole a mvula a tshi takalelwa

musi wa gomelelo.