SIRAKHA 47

₁Ngavhuya

musi Samuele o no eḓela

ho ḓa Nathani

a vha muporofita misi ya khosi Dafita.

₂Dafita o nangwa vhukati ha Vhaisraele

sa mapfura avhuḓi

a tshi nanguludzwa kha nduvho ya u konana na Mudzimu.

₃O tamba nga ndau ya nga ndi mbudzana,

a tamba nga biara ya nga ndi ngwana.

₄O vhulaha muswonḓa a tshi kha ḓi vha muṱhannga

a bvisa vhathu luṱoni;

a posa tombo nga gatho,

a rambaladza Goliada a fhelisa u ṱonga hawe.

₅Ndi nge a vhidzelela Muṋe washu Waṱaḓuluṱaḓulu,

a mu ṋea nungo dza u kunda muhali nndwani,

Mudzimu a sumbedza maanḓa a vhathu vhawe.

₆Ndi zwe vhasadzi vha mu imbela tshirendo,

vha ri o vhulaha maswina a zwigidigidi.

Vha renda Muṋe washu vha khoḓa Dafita,

vha mu ambadza khare ya vhuhosi.

₇Ndi hone a tshi kunda maswina masia oṱhe.

O lozwa Vhafilista vho vha vutshelaho,

a pwasha maanḓa avho vha si tsha vuwa.

₈Kha zwoṱhe zwe a ita o livhuha Mukhethwa

Waṱaḓuluṱaḓulu nga maipfi a thendo.

O vha a tshi funa Muvhumbi wawe nga mbilu yawe yoṱhe,

a tshi mu renda nga nyimbo misi yoṱhe.

₉O vhea vhaimbi vha zwilidzo phanḓa ha aḽiṱari,

vha imba phisalema dzi ḓifhaho.

₁₀O engedza u naka ha vhuṱambo, maḓuvha aho a vha a vhugala.

Vha renda dzina ḽikhethwa ḽa Muṋe washu,

hukhethwa ha tou bvuma mapfuvhi a sa athu tswuka.

₁₁Muṋe washu o mu hangwela vhutshinyi hawe,

a ḓi engedza maanḓa awe a tshi ya.

O mu ṋea mulanga wa vhuhosi

na khuluṋoni ya vhugala kha ḽa Israele.

₁₂Dafita a tshi dzama

ha sala Solomoni, murwa wawe wa vhuṱali.

Uyo o tshila a si na tshithithisi, nge khotsi awe a ita zwivhuya.

₁₃Solomoni o vhusa misi ḽo lala,

Mudzimu a mu ladzela shango masia oṱhe.

O fhaṱela dzina ḽa Mudzimu nnḓu, a tea hukhethwa ha lini na lini.

₁₄Wo vha wo ṱalifha hani musi u tshee nga hau!

Wo vha wo ḓala ṱhalukanyo i tshi ita na u fhalala unga mulambo wa Nile!

₁₅Nḓivho yau yo ṱanganya ḽifhasi,

wa ḓadza shango nga mirero na dzithai.

₁₆Dzina ḽau ḽo swika khunzikhunzini dza kule,

wa funelwa mulalo wau.

₁₇Wo akhamadza dzitshakha nga nyimbo na mirero

na dzithai na phindulo dzau.

₁₈Wo kuvhanganya musuku wa nga tsimbi,

wa khokha siliva ya nga mutobvu

nga dzina ḽa Muṋe washu Mudzimu a no pfi Mudzimu wa Israele.

₁₉Hone wo ḓiṱutshela wa ya vhasadzini,

wa vho vhuswa nga nyemulo.

₂₀Wo shata khuliso yau tshika,

mbiti dza wela vha lutsinga lwau vha gomela,

vha pfa vhuṱungu nga vhutsilu hau.

₂₁Ndi zwe muvhuso wa fhandekana ya vha mivhili,

kha ḽa Efraimi ha vha na vhuhosi ha muvhango.

₂₂Hone Muṋe washu ha nga litshi u u itela vhuthu,

ha nga tendi na tshithihi tsha zwe a fulufhedzisa tshi tshi wela fhasi.

Ha tupuli vha lutsinga lwa munangiwa wawe,

ha lozwi vhana vha we a funa Mudzimu.

Ndi zwe a ṋea Jakopo tsalela,

Dafita a mu ṋea mudzi u no bva khae.

₂₃Solomoni o yo ḓieḓetshela na vhokhotsi awe,

a sia Rehabiamu, muṅwe wa vharwa vhawe,

wa vhutsilu ho kalulaho, a si na ṱhalukanyo.

Ene o kandeledza vhathu vha mu shandukela.

₂₄Ha vhuya ha ḓa Jerobiamu murwa wa Nebathi.

Ene o funzedza Vhaisraele vhuvhi,

a tshimbidza vhana vha Efraimi nḓilani mmbi,

vhutshinyi havho ha kalula

lwe vha pfuluswa shangoni ḽavho.

₂₅Vhuvhi havho ho ḓo hulela,

ha vhuya ha swika musi wa ndifhedzo.