SIRAKHA 5

₁U songo ḓitika nga lupfumo lwau.

U songo ri, “Thi lili tshithu tsha muthu!”

₂Nyemulo na nungo dzau dzi songo u kunga

wa tevhela zwine mbilu yau ya emula.

₃U songo ri, “Ndi nga langwa nga nnyi?”

Wa ralo Muṋe washu ha nga kundwi u u rwa.

₄U songo ri, “Tshee nda tshinya, zwino ndo fhedza nda itwani?”

Muṋe washu u lindela tshifhinga tshawe.

₅U songo khokha vhuvhi kha vhuṅwe wa fulufhela u hangwelwa.

₆U songo ri,

“Tenda khathutshelo yawe i khulu,

na u anda ha vhuvhi hanga, u ḓo nkhangwela.”

Hufha khathutshelo na mbiti e nazwo zwoṱhe,

mbiti dzawe a dzi litshi u wela vhatshinyi.

₇U songo lenga u rembulutshela kha Muṋe washu,

u songo ḓi ri a si ṋamusi ndi matshelo;

mbiti dzawe a dzi lengi u duga,

dza u lozwa tshoṱhe musi wa ndifhedzo.

₈U songo fulufhela lupfumo lwe wa wana nga vhufhura;

musi wa khombo a lu nga u farisi tshithu.

₉U songo fhefhera muyani muṅwe na muṅwe;

u songo pambuwa nga nḓila iṅwe na iṅwe

sa mutshinyi wa muya wa murwelahoṱhe.

₁₀U songo nga muthu a si na vhuimo;

khunyeledza zwe wa fulufhedzisa.

₁₁ṱavhanya u pfa,

u fhindule wó elekanya.

₁₂Arali u tshi ḓivha phindulo, fhindula mbudziso,

arali u sa i ḓivhi, fhumula.

₁₃Hu u huliswa, hu u nyadzwa, zwi bva kha u amba!

Lulimi lwa muthu ndi tshikwekwe tshawe.

₁₄U songo pfi tshiisaphungo,

u songo lalela vhathu nga lulimi lwau;

fobvu ḽi ḓo sala ḽó shona,

u ḓi nga mudziavhufhura a tshi ḓo sala a tshi sasaladzwa.

₁₅Hu kha mafhungo mahulwane,

hu kha maṱuku,

u songo nanga vhuswina wa landula vhukonani,