LUIMBOIMBO 5

₁Inwi khaladzi anga, muselwa wanga,

ndo dzhena tsimuni yanga,

ndi khou kuvhanganya zwilungalungane na zwinukheleli,

ndi khou ḽa mutoli na tshigili,

ndi khou nwa waini na mukhaha.

Inwi dzikhonani, iḽani ni nwe

ni vhuye ni kambiwe nga lufuno.

₂Ndo vha ndo eḓela,

hone mbilu yanga yó vuwa,

nda lora mufunwa wanga a tshi khou khokhonya vothi,

a ri, “Mmvuleleni khaladzi anga,

mufunwa wanga, ḽiivha ḽanga,

mufunwa wanga a si na tshiṱahe.

Ṱhoho yanga yo ṋukala nga ṅwando,

mavhudzi anga o ṋukadzwa nga khuli.”

₃Nda lora ndi tshi fhindula nda ri,

“Ndo no ḓi bvula,

ndi nga dovha nda ambarelani?

Ndo no ṱamba milenzhe,

ndi nga dovha hani nda i shata tshika?”

₄Mufunwa wanga a susumedza tshanḓa tshawe nga kubuli kwa vothi,

nda pfa mbilu yanga i tshi tou sinḓa nge a vha tsini.

₅Nda mbo ḓi takuwa uri ndi vulele mufunwa wanga,

zwanḓa zwanga zwa ḓala zwinukheleli,

minwe yanga ya rotha zwiḓolo ndi tshi fara mukhothi wa vothi.

₆Nda vulela mufunwa wanga,

nda wana o no rembuluwa, ó ṱuwa.

Mbilu yanga yo vha yo tou mbwandaa ndi tshi pfa a tshi amba.

Nda mu ṱoḓa nda si mu wane,

nda mu vhidzelela a si aravhe.

₇Nda ṱangana na vhalindi vha muḓi vha tshi khou tandula,

vha mphula mbonzhe,

vhalindi vha mitsheṱo ya muḓi vha nnzhiela tshali.

₈Inwi vhasadzi vha Jerusalema,

mpfulufhedziseni

uri arali na ṱangana na mufunwa wanga,

ni ḓo mu vhudza uri ndi khou fa nga lufuno.

₉Ri vhudzeni, inwi no nakaho u fhira vhasadzi vhoṱhe:

mufunwa waṋu u fhira vhaṅwe nga mini?

Tshi no ita uri mufunwa waṋu a si fane na vhaṅwe ndi tshini hezwi ni tshi ri ri ane?

₁₀Mufunwa wanga u a tamisa, u na nungo;

o raloho ndi muthihi kha vha zwigidi zwa fumi.

₁₁Ṱhoho yawe i takadza unga musuku u songo vangwaho,

mavhudzi awe o swifhala sa funguvhu;

₁₂maṱo awe a penya unga a maivha

e mulamboni u elaho;

a nga maivha o ṱambaho nga mukhaha,

a ima tsini ha tshisima;

₁₃ṱhaha dzawe dzo naka unga tsimu yo ḓalaho miri ya mishonga

na zwilungalungane;

milomo yawe i nga phendephende;

i rotha zwiḓolo zwi no nukhelela;

₁₄zwanḓa zwawe zwi nga zwo fhomiwa nga musuku

wo vanganaho na nungu dza mutengo muhulu;

muvhili wawe wo khwaṱha unga luṋanga lwa nḓou

lwo ṱamiwaho nga vhulungu ha denga;

₁₅milenzhe yawe i nga phuphu dza mmabulu.

Dzó ingwa kha muteo wa musuku;

u na vhugala vhu no nga ha thavha ya Libanoni;

o ima unga mikedara;

₁₆mulomo wawe a u ḓifhi zwone a tshi khisa;

u na zwoṱhe zwi takadzaho!

Inwi vhasadzi vha Jerusalema,

mufunwa wanga o tou ralo,

khonani yanga yo tou ralo!