THOBITHI 10

₁Maḓuvha a tshi ḓi ṱanḓulukana a tshi ya, Thobithi o vha a tshi khou ḓi elekanya tshifhinga tsha lwendo lwa Thobiasi a tshi ya na musi a tshi vhuya. Musi maḓuvha e vha vhalelana o no fhela, murwa wawe a sa vhonali, ₂Thobithi a ri, “Thi ḓivhi uri ho iteani. Khamusi vho mu fareledza henengei, kana khamusi Gabaele ha tsheeho, ha si vhe na ane a nga mu ṋea siliva iyo.” ₃Thobithi a thoma u ḽa mbilu. ₄Mufumakadzi wawe Ana a ri, “Ṅwananga o lovha, ha tsheeho!” Ana a thoma u honḓa a tshi lila murwa wawe a ri, ₅“Yawee, ṅwananga, tshedza tsha maṱo anga, ndo tendelani u tshi fara lwendo ulu?” ₆Hone Thobithi a ḓi mu fhumudza a ri, “Fhumulani khaladzi anga, ni songo ḽa mbilu, o takala. Khamusi vha khou shuma zwiṅwe zwe vha si zwi lavhelele henengei. Munna o mu fhelekedzaho u a fulufhedzea, hufha e shaka ḽashu. Zwino khaladzi anga, ni songo ḽa mbilu ngae. Hu si kale u ḓo vha e fhano.” ₇Hone Ana a fhindula a ri, “Nga vha fhumule, vha songo nnzwifhela. Ṅwananga o lovha!” Ana a ḓi endela u bva a sedza nḓila ye murwa wawe a fara yone musi a tshi ṱuwa, na u ḽa a sa ḽi. O vha a sa tendi zwine a vhudzwa nga muṅwe, a tshi ṱoḓa u vhona nga awe maṱo. Musi ḓuvha ḽi tshi kovhela o vha a tshi humela muṱani a sokou lala a tshi lila, a si vhuye a fara khofhe.

Zwino musi ho no fhela maḓuvha a fumi na maṋa e Reguele a ana uri u ḓo pembelela mbingano ya ṅwananyana wawe. Thobiasi a ya khae a ri, “Kha vha litshe ndi ṱuwe, ndi a ḓivha uri khotsi anga na mme anga a vha tsha tenda uri vha ḓo dovha vha mmbona. Zwino makhulu wanga, ndi a vha humbela uri vha litshe ndi ṱuwe ndi humele ha khotsi anga. Ndo no ḓi vha vhudza uri khotsi anga ndo vha sia vho tou ita hani.” ₈Reguele a vhudza Thobiasi a ri, “Dzula ṅwananga, dzula na nṋe, ndi ḓo ruma vhaḓinḓa vha ya ha khotsi au Thobithi vha vha vhudza mafhungo au.” ₉Hone Thobiasi a ḓi sivhelela a ri, “Aiwa nandi, kha vha litshe ndi humele ha khotsi anga.”

₁₀Ndi hone Reguele a tshi mbo ḓi ṋea Thobiasi mufumakadzi wawe Sara, a mu ṋea na hafu ya thundu yawe: phuli dza tshinnani na dza tshisadzini, dziphulu na dzinngu, dzidonngi na dzigamela, zwiambaro, mali, na thundu dza nḓuni. ₁₁Reguele a onesana navho a vha tendela uri vha ṱuwe. Reguele a kuvhatedza Thobiasi a mu vhudza a ri, “Ndi zwone ṅwananga, tshimbila zwavhuḓi. Ngavhe Muṋe wa ḽiṱaḓulu a tshi ita uri iwe na mufumakadzi wau Sara zwi ni nakele. Ngavhe ndi tshi vhona vhana vhaṋu ndi sa athu fa.” ₁₂Ndi hone a tshi kuvhatedza ṅwananyana wawe Sara a mu vhudza a ri, “Ṅwananga, hulisa mazwale wau vha munna na vha musadzi, ngauri u bva zwino ndi vhabebi vhau u ḓi nga riṋe ro u bebaho. Tshimbila nga mulalo ṅwananga, kha ndi pfe zwivhuya zwau fhedzi misi yoṱhe u tshi kha ḓi tshila.” Reguele a fhedza nga u onesana navho a vha litsha vha ṱuwa.

₁₃Ndi hone Edina a tshi vhudza Thobiasi a ri, “Ṅwananga, shaka ḽanga ḽine nda ḽi funa, ngavhe Muṋe washu a tshi ni vhuisa kha riṋe no takala; ngavhe ndi tshi lalama nda vhona vhana vhaṋu inwi na ṅwananyana wanga Sara ndi sa athu fa. Ndi ni ṋekedza ṅwananyana wanga uri ni mu londole zwi tshi vhonwa nga Muṋe washu. Ni songo vhuya na mu pfisa vhuṱungu vhutshilo haṋu hoṱhe. Tshimbilani nga mulalo ṅwananga. U bva ṋamusi nṋe ndi mme aṋu, Sara ndi khaladzi aṋu. Ngavhe roṱhe zwi tshi ri nakela misi yoṱhe ya vhutshilo hashu.” Edina a vha kuvhatedza vhuvhili havho a vha litsha vha ṱuwa nga mulalo.

₁₄Thobiasi a ṱuwa ha Reguele ó rudza mbilu, a takala lwa u takala a renda Muṋe wa ḽiṱaḓulu na ḽifhasi, Ene Khosi ya zwoṱhe we a mu endedza lwendoni lwawe a sa ṱangani na vhuleme. A fhedza nga u shudufhadza Reguele na mufumakadzi wawe Edina a ri,

“Ngavhe ndi tshi ḓiphiṋa nga u vha hulisa maḓuvha oṱhe a vhutshilo hanga.”