THOBITHI 7

₁Musi vha tshi dzhena Ekhibathana, Thobiasi a ri, “Wa hashu Azaria, nnyiseni kha shaka ḽa hashu Reguele.” Ndi hone a tshi mu isa nḓuni ya Reguele, vha mu wana o dzula tshifhingoni tsha muṱa wawe. Ha thoma vhone u mu resha. Reguele a ri, “Ndi a ni resha-vho vha hashu. Mulalo! Dzhenani!” Reguele a vha isa muṱani, ₂a vhudza mufumakadzi wawe Edina a ri, “Muṱhannga uyu u fana hani na shaka ḽanga Thobithi!” ₃Ndi hone Edina a tshi vha vhudzisa a ri, “Vha hashu, ni vhonnyi?” Vhone vha fhindula vha ri, “Ri vha Nafuthali vho thubelwaho Ninive.” ₄Edina a ri, “Shaka ḽashu a no pfi Thobithi ni a mu ḓivha?” Vhone vha fhindula vha ri, “Vhukuma ri a mu ḓivha”. Edina a vhudzisa a ri, “Vho vuwa zwavhuḓi?” ₅Vhone vha fhindula vha ri, “Ee, vho vuwa zwavhuḓi.” Ndi hone Thobiasi a tshi ri, “Ndi khotsi anga!” ₆Reguele a thamuwa a mu kuvhatedza, a tshi khou tsengisa miṱodzi nga dakalo. Reguele a vhudza Thobiasi a ri, “Ṅwananga, ngavhe u tshi vha na mashudu! U ṅwana wa khotsi wa muḓivhalea muvhuya. Hone ndi khombo-ḓe yenei ine munna o raloho muvhuya a tondaho vhathu a tambudzwa nga vhupofu!” ₇Reguele a ḓi endela u lila o kuvhatedza shaka ḽawe Thobiasi. ₈Mufumakadzi wawe Edina na ene a lilela Thobithi; ṅwananyana wavho Sara na ene a thoma u lila.

₉Reguele a vha ṱhavhela thutha i no bva kha sambi ḽawe, a vha ṱanganedza nga mutsindo. Musi vho no ṱamba muvhili, vho tshingamela zwiḽiwa, Thobiasi a vhudza Rafaele a ri, “Wa hashu Azaria, humbelani Reguele a ntendele ndi dzee shaka ḽanga Sara.” ₁₀Reguele a zwi pfa vha tshi khou sola, ndi zwe a vhudza muṱhannga uyo a ri, “Thoma u lalela, u nwe, u takale, a hu na na muthihi a re na pfanelo ya u dzea ṅwananyana wanga Sara u fhira iwe wa hashu, nahone a tho ngo fanela u mu dzhia nda mu ṋea muthu muṅwe arali e si iwe, ngauri u shaka ḽanga ḽa tsinisa. Hone litsha ndi u ṱalutshedze mafhungo zwavhuḓi. ₁₁Ndo no mu ṋea vhanna vhaṱanu na vhavhili uri vha mu dzee, vhoṱhe vho vha vhe mashaka ashu, vhoṱhe vha fa vhusiku honoho musi vha tshi ṱoḓou sendela tsini nae! Hone zwino ṅwananga, lalela u nwe. Ndi na ngoho ya uri Muṋe washu u ḓo ni londola vhuvhili haṋu.” Thobiasi a fhindula a ri, “Thi nga ḽi kana u nwa tshithu vha sa athu ladza mafhungo anga.”

Reguele a mu vhudza a ri, “Ndi zwone. Sara o ṋewa iwe hu tshi tevhedzwa ndayo ya Bugu ya Mushe. Zwo dzudzanywa makoleni uri a vhe wau. Vhinga shaka ḽau, u bva zwino u khaladzi awe na ene ndi khaladzi au. Ndi wau ṋamusi na u ya ho ya. Zwino vhusiku vhuno ṅwananga, ngavhe Muṋe washu wa makoleni a tshi ita uri noṱhe vhuvhili haṋu zwi ni nakele. Ngavhe a tshi ni itela tshilidzi a ni ṋea mulalo.” ₁₂Ndi hone Reguele a tshi vhidza Sara ṅwananyana wawe, a ḓa khae. A mu fara nga tshanḓa, a mu ṋea Thobiasi a tshi khou ri, “Mu vhinge hu tshi tevhedzwa mulayo. Ndi mufumakadzi wau hu tshi tevhedzwa mulayo wo ṅwalwaho Buguni ya Mushe. Mu dzhie u mu ise ha khotsi au o takala. Ngavhe Mudzimu wa makoleni a tshi ni endedza nga mulalo vhuvhili haṋu zwa ni nakela.” ₁₃Ndi hone Reguele a tshi vhidza mme a Sara a vha vhudza uri vha ḓe na pesa ḽa ṱari, uri a ṅwale ndangano ya mbingano a tshi sumbedza uri Sara ṅwananyana wawe u mu ṋea Thobiasi uri a vhe mufumakadzi wawe hu tshi tevhedzwa mulayo wa Mushe.

₁₄Ndi hone vha tshi ḽa, vha nwa. ₁₅Huno Reguele a vhidza mufumakadzi wawe Edina a ri, “Khaladzi anga, lugisani iṅwe rumu ya u eḓela ni ise musidzana hone.” ₁₆Edina a yo lugisa vhulalo rumuni yeneyo, nga he a vhudzwa ngaho, a isa Sara hone. Edina a lilela Sara, a fhedza a fhuluṱa miṱodzi a ri, ₁₇“Ni lume mbilu ṅwananga. Ngavhe Muṋe washu wa makoleni a tshi shandukisa vhuṱungu haṋu ha vha dakalo. Ni lume mbilu ṅwananga.” Ndi hone Edina a tshi mu sia henefho.