VHUṰALI 13

₁Vhukuma vhoṱhe

vha sa ḓivhi Mudzimu,

vha sa koni u ḓivha AREHONE nga zwivhuya zwi vhonalaho,

vha sa koni u ḓivha Muvhumbi

nga u vhona zwivhumbwa,

ndi matsilu nga tsiko yavho.

₂Hone vhone vho vhona uri

mulilo kana ḓumbu kana muya wa luvhilo,

kana ṋaledzi dzo tangaho shango

kana maanḓa a maḓi,

kana zwivhonetsheli zwa lutomboni,

ndi yone midzimu i vhusaho shango.

₃Zwino arali vho takadzwa

nga u naka ha zwithu izwo vha zwi ita midzimu,

nga vha ḓivhe uri Muṋe wazwo u zwi fhira zwingafhani,

ngauri Musiki wazwo ndi Ene tshisima tsha lunako.

₄Arali vho kanukiswa nga maanḓa azwo na nungo,

nga vha gude nga zwenezwo zwithu

uri o zwi vhumbaho

u zwi fhira zwingafhani nga maanḓa.

₅Hufha hu tshi vhonala lufayo lwa Musiki

kha vhuhulu na lunako lwa zwisikwa.

₆Naho zwo ralo, vhathu avho mulandu wavho ndi muṱuku;

khamusi vho xedzwa nga u ṱoḓa Mudzimu vha tshi mu swela mbilu.

₇Vho vhona mishumo yawe,

vha ḓidina u i ṱalukanya,

vha mbo ḓi kungwa nga lunako lwa zwe vha zwi vhona.

₈Nangwe zwo ralo, na vhone

a vha na tsha u ḓiṱamba ngatsho;

₉arali vho vha vhe na nḓivho

yo eḓanaho ya u tumbula zwa shango,

vho kundwa ngani u wana Muṋe waḽo?

₁₀Vha a ṱungufhadza avho

vha no fulufhela zwithu zwo faho;

vha tshi amba zwithu zwo itwaho nga zwanḓa zwa vhathu

musuku na siliva zwo fuliwaho zwavhuḓi zwi tshi fanyisa zwivhanda,

kana matombo a si na mushumo

o vhaḓwaho kale-kale nga tshanḓa tsha muthu

vha ri ndi midzimu.

₁₁Nga ri dzou sedza muvhaḓi wa thanda:

U rema muri wo fanelaho,

a kwatula gwati ḽoṱhe zwavhuḓi,

a ita mudzio une ra u shumisa,

a u vhaḓa nga vhutsila vhu kanukisaho.

₁₂Mapali a mushumo wawe a a honza

a tshi bika zwiḽiwa zwawe, a ḽa a fura.

₁₃Zwino ho sala bali ḽi si na mushumo

thanda ya magombikwa yo ḓalaho zwimoro;

u ḽi dzhia a ḽi vhaḓa a tshi ḓimvumvusa,

a fanyisa munna nga vhutsila hawe

he a wana nga u ṱolou vhaḓa;

₁₄kana a fanyisa phukha yo vhifhaho,

a i fhoma nga phomo tswuku,

a fhoma badzi ḽiṅwe na ḽiṅwe.

₁₅Ndi hone a tshi i fhaṱela nnḓu yo i fanelaho,

a i nambatedza kha luvhondo nga tshikoko.

₁₆U a tshi tika uri tshi si wele fhasi,

nga u ḓivha uri a tshi koni u ḓiitela tshithu,

a thi ri ndi tshifanyiso,

tshi ṱoḓa u tikedzwa!

₁₇Naho zwo ralo,

musi a tshi rabelela thundu dzawe

kana mufumakadzi, kana vhana,

ha shoni u rerelela tshithu itsho tshi sa tshili.

U ṱoḓa mutakalo kha tshithu tshi si na nungo;

₁₈u ṱoḓa vhutshilo kha tshithu tsho faho;

a humbela u fariswa nga tshithu tshi si na nzhele;

a humbela u tsireledzwa lwendoni nga tshithu tshi sa tshimbili;

₁₉a tshi ṱoḓa u bindula kha zwa vhushavhi kana kha vhutsila hawe,

u zwi humbela kha tshithu

tsha zwanḓa zwi sa koni tshithu.