VHUṰALI 17

₁Khaṱhulo dzau ndi khulwane,

dzi a konḓa u ṱalutshedza,

ndi zwe vhathu vha sa pfi vha xela.

₂Vhukuma vhavhi vho vha vha tshi ri

vho no ita lushaka lukhethwa dziphuli,

mathina ndi vhone vhaṋe

vhe vha vha vho thubwa nga swiswi,

vha vha zwivhoxwa zwa vhusiku vhulapfu,

vho lala vho hoṋelwa fhasi ha ṱhanga dzavho

sa mathubwa e a pfi

ha tsha vhona nzudzanyo ya Mudzimu ya lini na lini.

₃Vho vhona unga

vhuvhi havho ha tshidzumbe

ho dzumbama fhasi ha lupila lwa khangwa,

hone vha balanganywa

vha tshi khou tetemela nga nyofho,

vha tshi shushedzwa nga mabono.

₄Naho vhe ngomu nḓuni dzavho

vho ḓi pfa vha tshi ofha,

ngauri vho tshenuswa nga mibvumo

i fhanduwaho masia oṱhe,

ha bvelela zwiguru zwo sinyalala.

₅Ho vha hu si na mulilo

u thathaho swiswi iḽo,

na ṋaledzi dzi penyaho a dzo ngo kona

u vhonetshela vhusiku uho vhutswu.

₆Tshedza tshithihi tshe vha tshi vhona

ndi khavhu dza mulilo fhedzi dzo vha ofhisaho!

Vha tshenuwa lwe naho wo no ṱuwa,

nga nyofho vha vhona zwi siho

zwi ofhisaho u fhira mulilo uyo.

₇Manditi avho a u khakhisa vhathu

o vha a si tsha farisa tshithu;

vha sumbedzwa uri zwiḽa

zwe vha zuwa vha ri vho thanya,

zwi vho nyadzea.

₈Vhukuma avho vhe vha fulufhedzisa

u thatha nyofho na zwi ofhisaho

kha vhathu vha mimuya i lwalaho dzhenuwo,

vhenevho vha vho lwadzwa

nga u ofha swiswi ḽi si na phele.

₉Nangwe hu si na tshi ofhisaho,

vho vha vha tshi shushedzwa

nga zwikhokhonono zwi kokovhaho na u xuxudza ha dziṋowa,

₁₀lwe vha fa

vha tshi khou tetemela nga nyofho,

vha sa funi

na u lavhelesa tshikhalani

tsho vha tangelaho ngomu, tshi sa tinyei!

₁₁Vhukuma vhuvhi vhu na vhugoswi, tshaho ndi u ḓihaṱula,

vhu endela u ofha zwone zwo ṋaṋesaho,

zwó ḓiswa nga luvalo lwa valuvalu.

₁₂Iṱali nyofho dzi si zwiṅwe,

dzi tou vha u kundwa u phalalwa nga mihumbulo kwayo;

₁₃arali muthu a sa koni u ḓitika ngayo

ndi hone a tshi ḓo ḓi ṋaṋesa u tshenuwa

a tshi ḓivha hune vhuṱungu hawe ha bva hone.

₁₄Ndi zwe Vhaegipita vha vho farwa

nga khofhe khulu

maḓuvha oṱhe a swiswi iḽo,

vha tambudzwa nga mabono a ofhisaho,

naho ḽi swiswi ḽi si na phele,

unga na hele he swiswi ḽa bva hone i sa koni tshithu.

₁₅Hone vhone vha welwa nga nyofho

vhá songo zwi lavhelela,

vha tou ṋoka.

₁₆Ngauralo, henefho he vha wela hone

vha sokou omelela

vha tshi nga vha ngomu dzhele,

hone tsho vha vhofhaho

dzi nyofho dzavho fhedzi.

₁₇A nga vha mulimi,

kana mulisa wa nngu,

kana a tshi shuma nnḓa sogani –

vhoṱhe vho ḓi tambudzwa u fana,

ngauri vhoṱhe vho vha vho vhoxwa

nga mbofho yeneyo nthihi ya swiswi.

₁₈U tita ha maḓumbu,

kana nyimbo dza u ḓifha dza zwiṋoni

zwi tshi imba matavhini o bvukaho,

kana maḓi a gubunyeaho,

₁₉kana u pwashea ha matombo a welaho fhasi,

kana u gada ha phukha

dzi sa vhonali,

kana u vhomba ha zwivhanda zwi ofhisaho,

kana mubvumo u bvaho phakhoni zwivhangani,

mibvumo iyo yo vha ṋokisa nga nyofho.

₂₀Ḽifhasi ḽoṱhe ḽo vhonetshelwa nga tshedza tsha ḓuvha,

vhathu vha ḓi shuma mishumo yavho

vha sa thithiswi nga tshithu;

₂₁swiswi ḽo vha ḽo tiba Vhaegipita fhedzi,

ḽi tshi ṱula swiswi

ḽine ḽa ḓo fhedza nga u vha tiba;

hone muhwalo wavho muhulu ndi vhone vhaṋe.