I‐Genesise 25

₁WAYE u‐Abrahame walekela ukuzeka umfazi, ogama lalingu‐Ketura. ₂Owamzalela u‐Zimrane, no‐Yokeshane, no‐Medane, no‐Midiyane, no‐Shebaki, no‐Shuha. ₃Wati u‐Yokeshane wazala u‐Sheba no‐Dedane: nonyana baka‐Dedane bebengama‐Ashuri, nama‐Letushi, nama‐Lewumi. ₄Nonyana baka‐Midiyane; ngu‐Hefa, no‐Heferi, no‐Hanoki, no‐Abida, no‐Ledaha. Bonke aba bangonyana baka‐Ketura.

₅Waye u‐Abrahame wamnika u‐Yisake konke abenako. ₆Kanti onyana bamashweshwe, abenawo u‐Abrahame, wabanika u‐Abrahame amabaso, wabandulula kuye u‐Yisake unyana wake, nxa asahleli, ukuya ngapambili, ezweni langasecaleni lipuma ilanga.

₇Yiyo le imihla yeminyaka yokuhlala kuka‐Abrahame wabehlala ngako, iminyaka ilikulu linamashumi asixe̔nxe anamihlanu. ₈Wada wapuma umpefumlo u‐Abrahame, wafa enobudala obukolisileyo, elixego, ezele yimihla, wabutelwa ebantwini bake. ₉Baza bamncw̔aba u‐Yisake no‐Shimayeli onyana bake, emqolombeni wase‐Makapela, entsimini ka‐Hefrone, unyana ka‐Tsohare, um‐Hete, engapambi kwe‐Mamre. ₁₀Intsimi owayitenga u‐Abrahame elusatsheni luka‐Hete, kwa kona apo kwancw̔atywa u‐Abrahame, no‐Sara umfazi wake.

₁₁Kwaza kwati, emveni kwokufa kuka‐Abrahame, wandula utixo wamtamsanqela u‐Yisake unyana wake; waye u‐Yisake wahlala ngasequleni le‐Lahai‐roi.

₁₂Ezi ke zizizizukulwana zika‐Shimayeli, unyana ka‐Abrahame, lowo u‐Hagare um‐Jipetekazi, ikobokakazi lika‐Sara, wamzalela u‐Abrahame. ₁₃Nanga amagama onyana baka‐Shimayeli, ngamagama abo njengokuzalwa kwabo: owamazibulo ka‐Shimayeli u‐Nebayoti, no‐Kedare, no‐Adebele, no‐Mibisame, ₁₄no‐Mishama, no‐Duma, no‐Masa; ₁₅u‐Hadade, no‐Tema; u‐Jeture, u‐Nafishe, no‐Kedema. ₁₆Aba bangonyana baka‐Shimayeli, angala̔ namagama abo, ngemizi yabo, nangelali zabo; inkosana ezilishumi linambini njengezizwe zazo. ₁₇Yiyo le iminyaka yokuhlala kwake u‐Shimayeli, iminyaka elikulu linamashumi matatu anesixe̔nxe; waza wapuma umpefumlo, wafa, wabutelwa ebantwini bake. ₁₈Bema kwa se‐Havila kude kwase‐Shure, engapambi kwe‐Jipete, njengokuba kuyiwa e‐Asiriya: wabubela ebusweni babo bonke abazalwana bake.

₁₉EZI ke zizizizukulwana zika‐Yisake, unyana ka‐Abrahame: u‐Abrahame wazala u‐Yisake. ₂₀Wabe u‐Yisake eyiminyaka imashumi mane ubudala bake, akumzeka u‐Rebeka, intombi ka‐Betuweli um‐Siriya wase‐Padane‐arame, udade ka‐Labane um‐Siriya, abe ngumfazi wake.

₂₁Wamana u‐Yisake emkunga uyehova ngenxa yomfazi wake, ngokuba ebeludlolo; waza uyehova wakungeleka kuye, wada wamita u‐Rebeka umfazi wake. ₂₂Kekaloku abantwana babambana embilini wake; waza wati: Nxa kunjalo, kunganina ukuba ndinje nje? Wasuka waya kubuza kuyehova. ₂₃Wayesiti uyehova kuye: Zizibini izizwe ezisesizalweni sako; kanjalo zimbini intlobo zabantu abaya kwahluka ematunjini ako; olunye uhlobo lwabantu luya kugqitisa olunye uhlobo lwabantu ngamandla: woti omkulu akonze komncinane.

₂₄Kekaloku yakuzaliseka imihla yake ukuba azale, nanga amawele esizalweni sake. ₂₅Lapuma elokuqala libomvu, linjengengubo elixonti umzimba wonke; baza balibiza ngegama elingu‐Esau. ₂₆Kamva wapuma umninawe walo, osandla sake sabamba isitende sika‐Esau; kwaza kwabizwa igama lake ngo‐Yakobi. Waye u‐Yisake ebeyiminyaka imashumi matandatu ubudala bake, akubazala.

₂₇Ada akula amakwenkwe lawo; waza u‐Esau waba yindoda eyazana nokuzingela, indoda yasendle; kanti u‐Yakobi ebeyindoda efaneleyo, imi ezintenteni. ₂₈Ute u‐Yisake wamtanda u‐Esau, ngokuba inyama yenyamakazi ibisemlonyeni wake; kodwa u‐Rebeka wamtanda u‐Yakobi.

₂₉Kekaloku u‐Yakobi ebepekile umhluzi; wandula ukuza u‐Esau evela endle, waye ecubukile. ₃₀Waza wati u‐Esau ku‐Yakobi: Kaundidlise kuko okubomvu, okubomvu oko, ngokuba ndicubukile: bekukona kwabizwa igama lake ngo‐Edome. ₃₁Wati u‐Yakobi: Nditengise namhla nje ubuzibulo bako. ₃₂Wati u‐Esau: Bona ke, ndiza mna kububa nje, kwondinceda nto nina obubuzibulo? ₃₃Wayesiti u‐Yakobi: Ndifungele namhla nje! Wasuka wamfungela; waza wamtengisa u‐Yakobi ubuzibulo bake. ₃₄Wandula u‐Yakobi wamnika u‐Esau isonka nomhluzi welentile; owatya, wasela, wesuka, wemka ke: wenje njalo u‐Esau ukudela ubuzibulo.