U‐Yisaya 50

₁Utsho uyehova ukuti: Ipina incwadi yokulahlwa kwonyoko wenu, endandimndulula ngayo? umhlaumbi, nguwupina kwabo ndinetyala kubo endinitengisile kuye? Bona ke, ngenxa yezikohlakalo zenu nitengisiwe, nangenxa yezigqito zenu unyoko wenu undululwe. ₂Kunganina ukuba ekuzeni kwam bekungeko umntu, nasekubizeni kwam bekungeko osabelayo? Isandla sam sike safinyezeka na, ukuba singabi nakukulula? umhlaumbi, akuko kum na amandla okuhlangula? Bona ke, ngokutetisa kwam ndiyomisa ulwandle, ndiyenza imilambo ibe yintlango; intlanzi zayo ziyanuka, ngokuba kungeko amanzi, ziyabuba ngenxanwa. ₃Ndiyambatisa amazulu ubumnyama, nentlakantlaka ndiyayenza ibe sisigubungelo sawo.

₄Inkosi e nguyehova indinikile ulwimi lwabafundisiweyo, ukuze ndikwazi ukusiza odiniweyo ngelizwi; uyavusa ngemiso ngemiso, uyavusa indlebe yam, ukuba ndive njengabafundisiweyo. ₅Inkosi e nguyehova ivulile indlebe yam, andala mna, andihlehlanga ngomva. ₆Ndanika umhlana wam kubabeti, nezidlele zam kubo abandincotula inwele; ubuso bam andibufihlanga kuwo amahlazo namate. ₇Kodwa inkosi e nguyehova iya kundinceda: ngako oko andiyi kumatiswa; ngako oko ndimisile ubuso bam njengelitye elilukuni; ndisazi nje ukuba andiyi kudaniswa. ₈Ukufupi ondigwebelayo: ngubanina oya kupika nam? masime ndawonye: ngubanina ongummangaleli wam? makasondele kum. ₉Bona ke, inkosi e nguyehova iya kundinceda; ngubanina lowo oya kundigweba? Bona ke, bona bonke baya kuguga njengengubo; inundu liya kubadla.

₁₀Ngubanina pakati kwenu omoyikayo uyehova, olivayo ilizwi lesicaka sake, ohambayo ebumnyameni, okungeko ukukanya kuye? makatembe egameni likayehova, ayame kuye utixo wake. ₁₁Bonani ke, nina nonke enipemba umlilo, eniziṙaulayo ngezibane! hambani ekukanyeni kwomlilo wenu, napakati kwezibane enizivutisileyo. Oku niya kuba nako kuvela esandleni sam; niya kulala pantsi elusizini.