Amaculo 88

₁YEHOVA, Tixo wosindiswa lwam! emini nasebusuku ndiyakala pambi kwako. ₂Umtandazo wam mauze ebusweni bako: toba indlebe yako ngasekulileni kwam: ₃ngokuba umpefumlo wam uzele zintsizi, nobomi bam busondele ehadesi. ₄Ndiyabalwa ndawonye nabo behlela esihogweni; ndinjengendoda engenamandla: ₅ndikululekile pakati kwabafileyo, njengababuleweyo abalele encw̔abeni, ongasabakumbuli wena; abanqanyulwe bona esandleni sako. ₆Undibekile esihogweni esingapantsi kanye, ezindaweni ezimnyama, ezinzulwini. ₇Umsindo wako unzima pezu kwam; undibandezele ngawo onke amaza ako. Sela. ₈Abo bazana nam ubakwelelisile kude kum; undenzile into etiyekileyo kubo: ndivalelwe, ndingenakupuma. ₉Iliso lam liyapela ngenxa yembandezelo; ndibizele kuwe, Yehova! ngemihla yonke; ndolule izandla zam ngakuwe.

₁₀Uya kwenza imimangaliso kwabafileyo na? abafileyo bovuka bakudumise na? Sela. ₁₁Ububele bako buya kushunyayelwa encw̔abeni na? nenyaniseko yako ekutshabalaleni na? ₁₂Imimangaliso yako iya kwaziwa ebumnyameni na? nobulungisa bako ezweni lokulibala na? ₁₃Kodwa ndiyakala kuwe, Yehova! nakusasa umtandazo wam wokupangela.

₁₄Yehova! yinina ukuba ulahle umpefumlo wam? yinina ukuba undifihlele ubuso bako? ₁₅Ndingobandezelweyo nohlalel’ ukuqauka kwa sebutsheni bam: nditwele izituso zako ndide ndimatiswe. ₁₆Imisindo yako idlule pezu kwam; izoyikiso zako zindinqamlile. ₁₇Zandingqonga njengamanzi imihla yonke; zandiṙaula kunye. ₁₈Umtandi nomhlobo ubakwelelisile kude kum; abazane bam basebumnyameni.