KWABASETESALONIKA I 5

₁Ke kaloku ngawo amaxesha namathuba, bazalwana, akufuneki nganto ukuba ndinibhalele; ₂kuba nani ngokwenu niyazi ngokucacileyo, ukuba imini yeNkosi, njengesela ebusuku, yenjenjalo ukuza kwayo. ₃Kuba xenikweni baya kuthi, Luxolo nokunqaba, oko baya kufikelwa yintshabalaliso ngebhaqo, kwanjengenimba komithiyo; baye bengayi kukha basinde. ₄Ke nina, bazalwana, ànisebumnyameni, ukuba imini leyo iniqubule njengesela. ₅Nonke nina ningabokukhanya, abemini; asingabobusuku, asingabobumnyama.

₆Ngoko ke masingalali, njengabanye aba; masiphaphe sibe ziingcathu. ₇Kuba abaleleyo balala ebusuku; nabanxilayo banxila ebusuku. ₈Ke thina bangabemini masibe ziingcathu; masinxibe isigcina-sifuba sokholo nothando, nesigcina-ntloko esilithemba losindiso. ₉Ngokuba uThixo akasimiselanga ngqumbo; usimisele ukuzuza usindiso ngayo iNkosi yethu uYesu Kristu; ₁₀owasifelayo, ukuze nokuba sihleli, nokuba silele, sidle ubomi kwakunye naye.

₁₁Kungoko ndithi, Thuthuzelanani, nákhane, kwanjengokuba nisenjenjalo.

₁₂Ke kaloku siyanicela, bazalwana, ukuba nibazi ababulalekayo phakathi kwenu, abanongamelayo eNkosini, abanilulekayo, ₁₃nibabeke ngokugqithiseleyo kakhulu ukubathanda, ngenxa yomsebenzi wabo. Hlalani ninoxolo phakathi kwenu. ₁₄Siyanivuselela ke, bazalwana, balulekeni abanxaxhayo; bakhuzeni abamxhelo mncinane; basekeleni abathambileyo; yibani nokuzeka kade umsindo kubantu bonke. ₁₅Lumkani, kungabikho bani ubuyekeza ububi ngobubi nakubani; hlalani niphuthuma okulungileyo omnye komnye, nakubantu bonke. ₁₆Hlalani nivuya. ₁₇Thandazani ningayeki. ₁₈Ezintweni zonke bulelani; kuba oko kukuthanda kukaThixo kuKristu Yesu ngani.

₁₉UMoya musani ukumcima. ₂₀Iziprofeto musani ukuzenza into engento. ₂₁Izinto zonke zicikideni, nibambe leyo intle. ₂₂Khumkani kuzo zonke iintlobo zenkohlakalo.

₂₃Wanga ke uThixo woxolo ngokwakhe anganingcwalisa niphelelisekile; uthi, ugqibelele owenu umoya nomphefumlo nomzimba, ugcinwe ngokungenakusoleka ekufikeni kweNkosi yethu uYesu Kristu. ₂₄Uthembekile onibizayo, oya kukwenza nokukwenza oko.

₂₅Bazalwana, sithandazeleni.

₂₆Babuliseni abazalwana bonke ngolwango olungcwele. ₂₇Ndiyanifungisa iNkosi ukuba le ncwadi ileswe kubo bonke abazalwana abangcwele.

₂₈Ubabalo lweNkosi yethu uYesu Kristu malube nani. Amen.